1 Mose 48:1-22
48 Ngɛ ní nɛ ɔmɛ a se ɔ, a de Yosef ke: “Hyɛ, o tsɛ ɔ ngɛ gbɔjɔe.” Kɛkɛ nɛ e ngɔ e binyumu enyɔ ɔmɛ, nɛ ji Manase kɛ Efraim kɛ piɛɛ e he.
2 “Benɛ a de Yakob ke e binyumu Yosef ba konɛ e ba slaa lɛ ɔ,” Israel wlua lɛ nɛ e hi si ngɛ e sa a nɔ.
3 Kɛkɛ nɛ Yakob de Yosef ke:
“Mawu Ope ɔ je e he kpo kɛ tsɔɔ mi ngɛ Luz, ngɛ Kanaan zugba a nɔ, nɛ e jɔɔ mi.
4 Nɛ e de mi ke, ‘Ma ha nɛ o ma fɔ babauu, nɛ ma ha nɛ o he maa hiɛ, nɛ ma ha nɛ o maa pee nimli asafo, nɛ ma ngɔ zugba nɛ ɔ kɛ ha o nina* nɛ maa ba ngɛ o se ɔ kaa weto ní nɛ maa hi si kɛ ya neneene.’
5 Amlɔ nɛ ɔ, o binyumu enyɔ ɔmɛ nɛ a fɔ kɛ ha mo ngɛ Egipt zugba a nɔ loko i ba Egipt ɔ, ye níhi ji mɛ. Efraim kɛ Manase ma ba pee ye níhi kaa bɔ nɛ Reuben kɛ Simeon hu ji ye níhi ɔ.
6 Se bimɛ nɛ a ma fɔ kɛ ha mo ngɛ a se ɔ maa pee o níhi. A ma ná zugba nɛ a nyɛmimɛ ɔmɛ ma ná a eko kaa gbosi ní.
7 Se imi lɛɛ, benɛ i je Padan kɛ ma a, Rahel ba gbo kɛ fɔ ye nɔ ngɛ Kanaan zugba a nɔ, be mi nɛ blɔ saii ngɛ ye hɛ mi loko ma su Efrat ɔ. Lɔ ɔ he ɔ, i pu lɛ ngɛ lejɛ ɔ ngɛ blɔ nɛ yaa Efrat, nɛ ji Betlehem ɔ nɔ.”
8 Kɛkɛ nɛ Israel na Yosef binyumu ɔmɛ nɛ e bi ke: “Mɛnɔmɛ ji nɛ ɔ?”
9 Kɛkɛ nɛ Yosef de e tsɛ ɔ ke: “A ji ye binyumuhi nɛ Mawu kɛ ha mi ngɛ hiɛ ɔ.” Kɛkɛ nɛ Israel de ke: “I kpa mo pɛɛ, ngɔɔ mɛ kɛ ba ye ngɔ konɛ ma jɔɔ mɛ.”
10 Jamɛ a be ɔ mi ɔ, bwɔmi ha nɛ Israel hɛngmɛ nɔ pee kusuu, nɛ e hyɛ we nɔ́ kpakpa ko. Lɔ ɔ he ɔ, Yosef ngɔ mɛ kɛ ba e kasa nya, nɛ e fĩɔ a nya he* nɛ e fua mɛ.
11 Israel de Yosef ke: “I susuu we gblee kaa ma na o hɛ mi, se hyɛ, o nina* po, Mawu ha nɛ i na.”
12 Kɛkɛ nɛ Yosef je mɛ kɛ je Israel nakutso nya, nɛ e kplã si nɛ e ngɔ e hɛ mi kɛ bu zugba.
13 Jehanɛ ɔ, Yosef ngɔ e hiɔ nine kɛ pɛtɛ Efraim he, nɛ e ngɔ e muɔ nine kɛ pɛtɛ Manase he, nɛ e ngɔ mɛ ni enyɔ ɔmɛ kɛ ya da Israel hɛ mi. E ngɔ Efraim kɛ da Israel muɔ nɔ nɛ e ngɔ Manase kɛ da Israel hiɔ nɔ, nɛ Yosef hɛ mɛ kɛ su Israel he.
14 Se Israel ngɔ e hiɔ nine kɛ fɔ Efraim yi mi, nɛ e ngɔ e muɔ nine kɛ fɔ Manase yi mi. E ngɛ mi kaa Efraim ji jokuɛ nɛ Manase ji kekleekle bi mohu lɛɛ, se e je blɔ nɛ e ngɔ e nine kɛ pue a yi mi jã.
15 Kɛkɛ nɛ e jɔɔ Yosef nɛ e de ke:
“Anɔkuale Mawu ɔ, nɔ nɛ ye nɛ̃ Abraham kɛ ye tsɛ Isak nyɛɛ ngɛ e hɛ mi ɔ,Anɔkuale Mawu ɔ, nɔ nɛ e hyɛ ye nɔ ngɛ ye si himi mi tsuo kɛ ba si mwɔnɛ ɔ ligbi nɛ ɔ,
16 Hiɔwe bɔfo ɔ nɛ jeɔ mi kɛ jeɔ ye amanehlu ɔmɛ tsuo a mi ɔ nɛ jɔɔ nyumuwi ɔmɛ.
Á ngɔ ye biɛ kɛ tsɛ mɛ, nɛ́ a ngɔ ye nɛ̃ Abraham kɛ ye tsɛ Isak a biɛ kɛ tsɛ mɛ,A he nɛ hiɛ babauu ngɛ zugba a nɔ.”
17 Benɛ Yosef na kaa e tsɛ ɔ hiɔ nine ngɛ Efraim yi mi ɔ, e bua jɔɛ he, lɔ ɔ he ɔ, e bɔ mɔde kaa e ma je e tsɛ ɔ nine kɛ je Efraim yi mi kɛ fɔ Manase yi mi.
18 Yosef de e tsɛ ɔ ke: “Tsaatsɛ, pi jã, ejakaa nɔ nɛ ɔ ji kekleekle bi. Ngɔɔ o hiɔ nine kɛ fɔ e yi mi.”
19 Se e tsɛ ɔ kplɛɛ we, nɛ e de ke: “I le, ye bi, i le. Lɛ hu e ma ba pee ma agbo, nɛ e ma ba pee nɔmlɔ ngua. Se kɛ̃ ɔ, e senɔ ɔ ma ba pee nɔmlɔ ngua pe lɛ, nɛ e nina* he ma ba hiɛ babauu nɛ e maa pee je mahi.”
20 Lɔ ɔ he ɔ, e ya nɔ nɛ e jɔɔ mɛ jamɛ a ligbi ɔ, nɛ e de ke:
“Ke Israel bi ɔmɛ ngɛ a sibi jɔɔe ɔ, a wo o biɛ ta nɛ́ a de ke,‘Mawu nɛ e ha nɛ o pee kaa Efraim kɛ Manase.’”
Lɔ ɔ he ɔ, e ya nɔ nɛ e ngɔ Efraim kɛ sɛ Manase hlami.
21 Kɛkɛ nɛ Israel de Yosef ke: “Hyɛ, i miɔ nɛ ma gbo, se bɔ fɛɛ bɔ nɛ ji ɔ, Mawu maa ya nɔ nɛ e kɛ nyɛ maa hi si, nɛ e maa kpale nyɛ kɛ ho nyɛ nɛmɛ ɔmɛ a zugba a nɔ ya.
22 Imi lɛɛ, i ngɔ zugba kake* kɛ ngɛ he piɛɛe ha mo pe nɔ́ nɛ i ha o nyɛmimɛ ɔmɛ ɔ, zugba a nɛ i kɛ ye klaate kɛ ye kɛ̃ɛ̃ kpɔ ngɛ Amor bi ɔmɛ a dɛ ɔ.”
Sisi Ningmahi
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ E ma nyɛ maa pee kaa a tsitsa he, aloo a hɛ nya, aloo a he kpa ko.
^ Ngɛ Hebri gbi mi ɔ, “ngmɛdu.”
^ Ngɛ Hebri gbi mi ɔ, “ngmɛdu.”
^ Aloo “yoku he zugba kake.” Ngɛ Hebri gbi mi ɔ, “konɔ kake.”
