Kekleekle Womi Kɛ Ya Ha Korinto Bi Ɔmɛ 14:1-40
14 Nyɛɛ di suɔmi se, se kɛ̃ ɔ, nyɛɛ ya nɔ nɛ nyɛɛ bɔ mɔde konɛ nyɛ ná* mumi mi nike ní ɔmɛ, se titli ɔ, kaa nyɛ maa gba.
2 Ejakaa nɔ nɛ e tuɔ lilɛ slɔɔto ko ɔ, pi nɔmlɔ nɛ e tuɔ kɛ tsɔɔ, se mohu Mawu, ejakaa nɔ ko bui tue, se mumi ɔ haa nɛ e tuɔ laami sanehi nɛ a ngɛ klɔuu ɔmɛ a he munyu.
3 Se nɔ nɛ e gbaa a, e ngɔɔ e munyu ɔ kɛ fiaa adesahi kɛ maa si, nɛ e woɔ mɛ he wami, nɛ e woɔ a bua.
4 Nɔ nɛ e tuɔ lilɛ slɔɔto ko ɔ fiaa lɛ nitsɛ e he kɛ maa si, se nɔ nɛ e gbaa a lɛɛ, e fiaa asafo kɛ maa si.
5 Amlɔ nɛ ɔ, jinɛ i ko suɔ kaa nyɛ tsuo nyɛ ko tu lilɛ slɔɔtohi, se i suɔ mohu kaa nyɛɛ gba. Ngɛ anɔkuale mi ɔ, nɔ nɛ e gbaa a nɔ kuɔ pe nɔ nɛ e tuɔ lilɛ slɔɔtohi ɔ, lɛɛ ja nɔ ɔ tsɔɔ sisi konɛ e fia asafo ɔ kɛ ma si.
6 Se ngɛ be nɛ ɔ mi ɔ, nyɛmimɛ, ke i ba nyɛ ngɔ nɛ i ba ngɛ lilɛ slɔɔtohi tue, se i gui kpo jemi, aloo ní lemi, aloo gbami ko, aloo tsɔɔmi ko nɔ kɛ tui munyu kɛ tsɔɔ we nyɛ ɔ, mɛni se nyɛ ma ná?
7 E ngɛ kaa bɔ nɛ níhi nɛ wami be a mi ɔ pɛɛɔ ɔ pɛpɛɛpɛ, bɛ jio, saku jio. Ke a pɛmi ɔmɛ ji ekpa ngɛ a sibi a he ɔ, kɛ a ma plɛ kɛ le bɛ ɔ pɛmi kɛ saku ɔ pɛmi mi tso ha kɛɛ?
8 Ejakaa ke titimati ɔ pɛ, se e pɛ́ saminya a, mɛnɔ lɛ e maa pee klaalo kɛ ha ta hwumi?
9 Jã nɔuu kɛ̃ nɛ nyɛ hu ke a nui lilɛ slɔɔto nɛ nyɛ tuɔ ɔ sisi saminya a, kɛ nɔ ko ma plɛ kɛ le nɔ́ nɛ nyɛ ngɛ dee ɔ ha kɛɛ? Ngɛ anɔkuale mi ɔ, nyɛ maa hi munyu tue kɛ maa hi kɔɔhiɔ mi woe.
10 E ma nyɛ maa pee kaa gbi slɔɔtoslɔɔtohi babauu ngɛ je ɔ mi, se kɛ̃ ɔ, ekoeko be nɛ e hɛɛ we sisi numi.
11 Ejakaa ke i nui juɛmi nɛ ngɛ munyu ɔ mi ɔ sisi ɔ, ma pee kaa ma se no kɛ ha nɔ nɛ e ngɛ munyu ɔ tue ɔ, nɛ nɔ nɛ e ngɛ munyu ɔ tue ɔ hu maa pee kaa ma se no kɛ ha mi.
12 Jã kɛ̃ nɛ e ji ngɛ nyɛ blɔ fa mi, akɛnɛ nyɛ suɔ wawɛɛ kaa nyɛ ma ná mumi ɔ nike ní ɔmɛ he je ɔ, nyɛɛ bɔ mɔde kaa nyɛ ma ná nike níhi nɛ fiaa asafo ɔ kɛ maa si ɔ kɛ be nɔ.
13 Enɛ ɔ he ɔ, nyɛ ha nɛ nɔ nɛ e tuɔ lilɛ slɔɔto ko ɔ nɛ e sɔle konɛ e nyɛ nɛ e tsɔɔ sisi.
14 Ejakaa ke i ngɛ sɔlee ngɛ lilɛ slɔɔto ko mi ɔ, ye nike ní nɛ mumi ɔ ha mi ɔ lɛ ngɛ sɔlee, se ye juɛmi ɔ lɛɛ e wui yiblii.
15 Lɛɛ mɛni lɛ e sa peemi mɔ? Ma ngɔ mumi ɔ nike ní ɔ kɛ sɔle, se ma ngɔ ye juɛmi hu kɛ sɔle. Ma ngɔ mumi ɔ nike ní ɔ kɛ la yi jemi la, se ma ngɔ ye juɛmi hu kɛ la yi jemi la.
16 Ke pi jã a, lɛɛ ke o kɛ mumi ɔ nike ní ɔ ngɛ Mawu yi jee ɔ, akɛnɛ nɔ kpa nɛ e ngɛ nyɛ kpɛti ɔ li nɔ́ nɛ o ngɛ dee ɔ he je ɔ, kɛ e ma plɛ kɛ he o si nami ɔ nɔ ke, “Amen” kɛɛ?
17 Ngɛ anɔkuale mi ɔ, o ngɛ si nae ngɛ blɔ kpakpa nɔ mohu lɛɛ, se e fiɛ nɔ kpa a kɛ mɛ si.
18 I naa Mawu si kaa i tuɔ lilɛ slɔɔtohi fuu pe bɔ nɛ nyɛ tsuo nyɛ tuɔ ɔ.
19 Se kɛ̃ ɔ, ngɛ asafo ko mi ɔ, i kɛ ye juɛmi* maa tu munyungu kakaaka enuɔ, konɛ ma kɛ tsɔɔ ni kpahi ní* mohu pe nɛ ma tu munyungu kakaaka akpe nyɔngma ngɛ lilɛ slɔɔto ko mi.
20 Nyɛmimɛ, nyɛ ko pee nyɛ he jokuɛ tsɔwi ngɛ nyɛ nɔ́ sisi numi mi, mohu ɔ, nyɛɛ pee nyɛ he jokuɛ tsɔwi ngɛ yayami blɔ fa mi; nɛ nyɛɛ pee nyɛ he nihi nɛ a wa saminya ngɛ nyɛ nɔ́ sisi numi mi.
21 A ngma ngɛ Mlaa a mi ke: “Yehowa* de ke, ‘Ma ngɔ ma se bi a lilɛhi kɛ nibwɔhi a nyahi kɛ tu munyu kɛ tsɔɔ nimli nɛ ɔmɛ, nɛ ngɛ lɔ ɔ mi po ɔ, a be mi tue bue.’”
22 Enɛ ɔ he ɔ, lilɛ slɔɔtohi pee we okadi kɛ ha we nihi nɛ a he ye ɔ, mohu ɔ, kɛ ha nihi nɛ a he we yi ɔ, jã kɛ̃ nɛ gbami hu pi kɛ ha nihi nɛ a he we yi ɔ, mohu ɔ, kɛ ha nihi nɛ a he ye ɔ.
23 Enɛ ɔ he ɔ, ke asafo ɔ tsuo nya ba bua ngɛ he kake nɛ mɛ tsuo a ngɛ lilɛ slɔɔtohi tue, nɛ ni kpa amɛ aloo nihi nɛ a he we yi ɔ ba lejɛ ɔ, anɛ a be dee ke nyɛ yi puɛ lo?
24 Se ke nyɛ tsuo nyɛ ngɛ gbae nɛ nɔ ko nɛ e he we yi aloo nɔ kpa ko ba mi ɔ, mɛ tsuo a ma kã e hɛ mi, nɛ a maa hyɛ e mi saminya.
25 Kɛkɛ ɔ, e tsui mi laami sane ɔmɛ maa je kpo heii, nɛ e ma kpla si nɛ e maa ngɔ e hɛ mi kɛ bu si nɛ e ma ja Mawu, nɛ e maa hi jajee ke: “Mawu ngɛ nyɛ kpɛti niinɛ.”
26 Lɛɛ nyɛmimɛ, mɛni lɛ e sa peemi mɔ? Ke nyɛ nya ba bua a, nɔ kake ngɛ la ko, nɔ kpa ngɛ tsɔɔmi ko, nɔ kpa hu ngɛ kpo jemi ko, nɔ kpa ngɛ lilɛ slɔɔto ko, nɛ nɔ kpa hu ngɛ gbi sisi tsɔɔmi ko. Nyɛ ha nɛ níhi tsuo nɛ maa ya nɔ ɔ nɛ fia nɔ kɛ ma si.
27 Nɛ ke nɔ ko tuɔ lilɛ slɔɔto ko ɔ, nyɛ ha nɛ e pee ni enyɔ pɛ, nɛ ke a he hiɛ hluu ɔ, a pee ni etɛ, nɛ nɔ kake nɛ e gbe nya loko nɔ kpa hu nɛ e tu e nɔ́, nɛ e sa kaa nɔ ko nɛ e tsɔɔ sisi.
28 Se ke sisi tsɔɔlɔ ko be ɔ, lɛɛ e sa nɛ e ma e nya ngɛ asafo ɔ mi nɛ e tu kɛ tsɔɔ lɛ nitsɛ e he kɛ Mawu.
29 Nyɛ ha nɛ gbali enyɔ aloo etɛ nɛ a tu munyu, nɛ nyɛ ha nɛ ni kpa amɛ nɛ a kɔ se.
30 Se ke nɔ kpa ko nine su kpo jemi ko nɔ be mi nɛ e hii si ngɛ lejɛ ɔ, lɛɛ ha nɛ kekleekle munyu tulɔ ɔ nɛ e ma e nya.
31 Ejakaa nyɛ tsuo nyɛ ma nyɛ maa gba, se nɔ kake nɛ e gbe nya loko nɔ kpa nɛ e je sisi, bɔ nɛ pee nɛ nyɛ tsuo nyɛɛ kase ní, nɛ a wo nyɛ tsuo he wami.
32 Nɛ gbali ɔmɛ a mumi ɔ nike ní ɔmɛ ɔ, gbali ɔmɛ lɛ e sa kaa a kudɔ mɛ.
33 Ejakaa Mawu ɔ, pi Mawu nɛ e peeɔ e ní basabasa, se mohu ɔ, e ji tue mi jɔmi Mawu.
Kaa bɔ nɛ e ji ngɛ ni klɔuklɔu ɔmɛ a we asafo ɔmɛ tsuo a mi ɔ,
34 ha nɛ yi ɔmɛ nɛ a ma a nya ngɛ asafo ɔmɛ a mi, ejakaa a ngmɛ́ mɛ blɔ kaa a tu munyu. Mohu ɔ, ha nɛ a ba a he si kɛ ha nyumuhi* kaa bɔ nɛ Mlaa a hu tsɔɔ ɔ.
35 Ke a suɔ kaa a maa kase nɔ́ ko ɔ, nyɛ ha nɛ a bi a hunomɛ ngɛ we mi, ejakaa e ji zo kaa yo maa tu munyu ngɛ asafo ɔ mi.
36 Anɛ nyɛ ngɔ nɛ Mawu munyu ɔ je lo, aloo nyɛ ngɔ pɛ nɛ e ba su?
37 Ke nɔ ko susu kaa gbalɔ ji lɛ, aloo a kɛ mumi ɔ dloo lɛ ɔ, e sa nɛ e kplɛɛ nɔ kaa níhi nɛ i ngɛ nyɛ ngmae ɔ ji Nyɔmtsɛ ɔ kita.
38 Se ke nɔ ko bui nɔ́ nɛ ɔ, lɛ hu a be lɛ bue.*
39 Enɛ ɔ he ɔ, ye nyɛmimɛ, nyɛɛ ya nɔ nɛ nyɛɛ hi mɔde bɔe kaa nyɛ maa gba, se kɛ̃ ɔ, nyɛ ko tsi lilɛ slɔɔtohi a tumi nya.
40 Se nyɛ ha nɛ níhi tsuo nɛ ya nɔ ngɛ blɔ nɛ e he tsɔ nɔ, kɛ blɔ nya tomi nya.*
Sisi Ningmahi
^ Aloo “nyɛɛ kɛ hɛdɔ nɛ hla.”
^ Aloo “nɔ́ sisi numi.”
^ Aloo “ma ngɔ ye nya mi munyu kɛ tsɔɔ ni kpahi ní.”
^ Hyɛ Munyu Komɛ A Sisi Tsɔɔmi.
^ Hela, “a ngɔ a he kɛ wo nyumuhi a sisi.”
^ E ma nyɛ maa pee kaa “ke nɔ ko li nɔ́ nɛ ɔ, e maa ya nɔ nɛ e be lee.”
^ Aloo “ngɛ blɔ nɛ a to nya nɔ.”
