Lukiko Madit obedo gurup mo matidi pa Lukricitayo ma guteggi i yo me cwiny ma gimiyo tira bot Lucaden pa Jehovah ma i twok lobo ducu. Ticgi kwako jami aryo magi:

•   Gidoro yubo cam me cwiny ma jenge i Baibul ma kati i bukke, cokke, ki dong cukul pa Lucaden pa Jehovah.—Luka 12:42.

•   Gineno wi tic pa Lucaden pa Jehovah i wi lobo ducu. Me cobo man, gimiyo tira i kom kit ma ticwa me pwony myero owot kwede dok gidoro kit ma kitiyo kwede ki mot ma kimiyo.

 Lukiko Madit lubo lanen pa ‘lukwena ki ludongo ma i Jerucalem’ me cencwari me acel, ma onongo gimoko tam ma pigi tego ma kwako jo me kacokke ducu. (Tic pa Lukwena 15:2) Calo co magi ma gubedo lugen-ni, lumemba me Lukiko Madit bene pe gitye lutela me dulwa. Gitiyo ki Baibul me nongo tira, dok giye ni Lubanga Jehovah ocimo Yecu Kricito me bedo Lawi kacokke.—1 Jo Korint 11:3; Jo Epeco 5:23.

 Lumemba me Lukiko Madit aye Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, ki dong Jeffrey Winder. Gitiyo ki i gang kalwa madit ma tye i Warwick, New York, U.S.A.

 Lukiko Madit tye ki komitti abicel ma neno wi ticwa mapatpat, dok lamemba acel acel nongo tye i komitti acel nyo makato.

•   Komitti ma Kubo Kin Ticwa: Komitti man neno wi tic ma kubbe ki cik pa gamente, konyo jo ma gitye ka kato ki i can ma poto atura, konyo Lucaden ma kitye ka unogi pi niyegi, ki dong miyo kony mukene ma mitte pi oyot bot Lucaden pa Jehovah.

•   Komitti ma Neno Lok Kom Lubetel: Komitti man doro wi yub ducu ma kwako Lubetel.

•   Komitti ma Doro Tic me Goyo Bukkewa: Komitti man neno goyo ki poko bukke ma jenge i Baibul kacel ki gedo odi me cokkewa, opic me gonyo leb, ki dong jang gang kal mapatpat.

•   Komitti ma Doro Tic me Tito Kwena: Komitti man doro tic me tito “kwena maber me Ker pa Lubanga.”—Matayo 24:14.

•   Komitti me Pwony: Komitti man doro tic me yubo cam me cwiny ma wanongo ki i cokke, cukul mapatpat, ki dong dwan ma kimako kacel ki vidio.

•   Komitti ma Doro Tic me Yubo Cam me Cwiny: Komitti man doro tic me yubo cam me cwiny ma kati i bukke, ki ma nonge i kabedowa me intanet dok neno bene wi tic me gonyo leb.

 Medo i kom tic pa komitti magi, Lukiko Madit bene bedo ki cokke cabit ki cabit me nyamo lok ma kwako dulwa. I cokke magi, lumemba me Lukiko Madit ginyamo ngo ma Ginacoya waco, dok gilubo tela pa cwiny maleng pa Lubanga wek okonygi me moko tam acel.—Tic pa Lukwena 15:25.

 Magi gubedo Lukricitayo ma gigenne ma gikonyo Komitti pa Lukiko Madit. (1 Jo Korint 4:2) Gitye ki kero kacel ki ngec madok i kom tic pa komitti ma gitiyo iye, dok bene gibedo tye i cokkegi ma bedo cabit ducu. Kadi bed ni pe ginywako i moko tam, ento gimiyo ngec mogo ma twero bedo me kony, gikonyo me keto tam ma kimoko i tic, ki dong me neno ka tam meno tye ka tic maber. Lukiko Madit bene twero cwalogi me limo utmege ma i but lobe mapatpat, nyo me miyo pwony i yub mogo calo cokkewa ma bedo mwaka ki mwaki nyo kwero kwan me Gilead.