1. Niye pire tek lakwene? (Nen cal ma tye i pot karatac man.)

 TIKA dong ipenye kekeni ni, ‘An mono atye kodi dano ma Jehovah bilarone i kare me twon can madit atika-ni kun weko adonyo i lobo manyen?’ Ki lok ada, bwot kwako jami mapol ento lakwena Paulo ocoyo gin acel ma pire tek i kare ma owaco ni: “Labongo niye pe twerre me yomo cwinye.” (Ibru 11:6) Man winye calo gin ma konye pe, ento lok ada tye ni, “jo mogo pe gitye ki niye.” (2 Tec. 3:2) Tyeng magi gikonyowa me niang ni dongo niye matek mitte tutwal.

2, 3. (a) Pwony ango ma wanongo ki bot Petero ma lubbe ki kit ma niyewa pire tek kwede? (b) Lapeny mene ma wabinyamogi kombeddi?

² Lakwena Petero otito kit ma niye pire tek kwede i kare ma oloko i kom ‘temo niyewa’ ni “bikelo botwa pak ki deyo ki woro i kare ma Yecu Kricito binen iye.” (Kwan 1 Petero 1:7.) Kit macalo twon can madit atika tye ka nyiko cok tutwal-li, pire tek adada ni omyero wabed ki niye ma weko wabedo i kin jo ma gibinongo mot ka Kabakawa, Yecu Kricito ka ocako loc. Gin ma wamito aye ni wabed ‘jo ma gitye ki niye, ma en aye dong gwoko kwowa.’ (Ibru 10:39) Calo laco ma olego Yecu ni omed niyene-ni, wan bene watwero owaco ni: “Kony niyena ma lam-mi.” (Mar. 9:24) Onyo watwero wacone kit ma lukwena pa Yecu guwaco ni: “Med Niyewa!”​—Luka 17:5.

 ³ I pwony man, wabinyamo lapeny magi: Wan watwero dongo kit man nining? Wan watwero nyutone nining ni watye ki niye? Gen ango ma watye kwede ma nyuto ni Lubanga bigamo legawa ka walege ni omed niyewa?

4. Labol pa jo mene ma romo cuko cwinywa me jingo niyewa?

⁴ Kit macalo “gin ducu ma yam gicoyo i kare macon ca onongo gicoyo me pwonyowa[-ni],” watwero pwonyo jami mapol ki i lanen pa jo ma gunyuto niye dok kicoyo lok komgi i Baibul. (Rom. 15:4) Ka wakwano lok i kom Abram, Cara, Icaka, Yakobo, Rakab, Gideon, Barak, ki dong jo mukene, man cuko cwinywa me ngine kekenwa kit ma niyewa tye kwede. (Ibru 11:32-35) Medo i kom meno, ka wakwano lok i kom omege ki lumege ma gunyuto niye matek i kwogi i kareni, man cuko cwinywa me tute matek wek niyewa ojing. *

5. Elia onyuto nining ni etye ki niye matek i kom Jehovah, dok lanenne konyowa me tam i kom gin ango?

⁵ Labol acel ma nonge i Baibul aye Elia. Go kong jami magi ma gutimme ma ginyuto gen madit ma en obedo kwede i kom Jehovah. I kare ma Elia otito bot Kabaka Akab ni Jehovah biweko piny two woko, en owaco ki tekcwiny ni: “Macalo Rwot [Jehovah] . . . tye makwo-ni, . . . toyo bibedo peke kadi wa kot bene, nio ka doga aye dok biloko.” (1 Luker 17:1) Elia onongo tye ki niyeni ni Jehovah bimiye jami ma mitte ki dok pi jo mukene ka piny otwo woko. (1 Luker 17:4, 5, 13, 14) En obedo ki gen ni Jehovah romo cero latin ma oto. (1 Luker 17:21) En onongo pe ki akalakala mo keken ni Jehovah bicwalo mac ki i polo wango gitumme ki i Wi Got Karmel. (1 Luker 18:24, 37) Ma kare dong oromo ki Jehovah me giko two pa piny man, kadi bed ni gin mo ma nyuto kot pud peke, Elia owaco bot Akab ni: “Cit dong ka cam ki ka mat, pien dwan kot ma mito cwer dong mor winnye.” (1 Luker 18:41) Tika jami magi ma gutimme-ni pe gikonyowa me ngine me niang ka ce niyewa tye matek?

6. Ngo ma wamito ki bot Jehovah wek wadong niye?

⁶ Pe watwero dongo niye piwa kenwa. “Niye” obedo but nyig ma nyak pi cwiny maleng pa Lubanga. (Gal. 5:22, NW.) Pi meno, wanyuto ryeko ka walubo tira ma Yecu omiyo ni myero waleg pi cwiny maleng pien Yecu owacci Won “bimiyo cwiny maleng makato bot jo ma lege.”​—Luka 11:13.

7. Tit kit ma waromo weko niyewa bedo matek kwede.

⁷ Ka teke dong watye ki niye matek, ci omyero wayelle adada wek pe otur. Niyewa kiromo porone ki mac. Ka ki cwinyo yen, macce twero medde oyotoyot dok bedo lyet adada. Ento, ka pe kibedo ka medo yenne, ci kwe woko doko lodi keken, ka i ngeye doko buru. Ento ka imedde ki medo yen iye, ci medde ki lyel nakanaka. I yo acel-li, wan bene niyewa kwe woko ka pe wakwano Lok pa Lubanga kare ki kare. Ka wakwano Baibul motmot, ci watwero dongo mar matut pire ki pi Ngat ma Ocoyo, dok meno weko niyewa dongo medde.

8. Gin ango ma bikonyowa me dongo ki dok gwoko niyewa?

 ⁸ Ngo mukene ma iromo timone me dongo ki dok gwoko niyeni? Pe itam ni jami ma ipwonyogi nio wa i kare ma inongo iye batija dong giromo. (Ibru 6:1, 2) Coo piny lok mogo ma lunebi guwaco i Baibul ki kit ma gucobbe pien gimini tyen lok mucwiny me bedo ki niye matek. Itwero bene tic ki lok pa Lubanga me pimo wek inen ka niyeni tek ma lubbe ki kit ma kicoyo kwede i Baibul.​—Kwan Yakobo 1:25; 2:24, 26.

9, 10. Jami magi gikonyowa nining me dongo niye: (a) lurem mabeco? (b) cokke? (c) ticwa me pwony?

⁹ Lakwena Paulo owaco bot Lukricitayo luwote ni gitwero ‘bedo ki kare me cuko cwinygi kekengi pi niye pa ngat acel acel.’ (Rom. 1:12) Ka nongo wabedo kacel ki luye luwotwa, wan watwero dongo niye pa ngat acel acel, tutwalle ka watye ki jo ma dong ‘kitemo niyegi.’ (Yak. 1:3) Bedo ki jo maraco neko niyewa ento lurem mabeco gidongo niyewa. (1 Kor. 15:33) Meno aye tyen lok acel mumiyo kiminiwa tira ni omyero pe wawek “cokke kacel,” ento wamedde kun “wacuku cwinywa kekenwa.” (Kwan Jo Ibru 10:24, 25.) Tyen lok mukene aye ni pwony ma kimiyogi i cokke magi gitye ki lok ma jingo niyewa. Man rwatte ki lok ma Paulo owaco ni: “Niye bino pi winyo lok ma gitito.” (Rom. 10:17) Tika watye ka weko bino i cokke doko kitwa?

¹⁰ Ka wanywako i ticwa me pwony, ci wadongo niye pa luwotwa kacel ki megwa. Calo Lukricitayo me kare macon, omyero wapwonye me keto niyewa ducu i kom Jehovah kun waloko ki tekcwiny i cawa mo keken.​—Tic 4:17-20; 13:46.

11. Pingo Kaleb gin ki Yocwa gubedo ki niye matek dok watwero bedo calo gin nining?

¹¹ Niyewa dongo ka waniang kit ma Jehovah konyowa kwede ki dok gamo legawa. Man aye gin mutimme i kom Kaleb gin ki Yocwa. Gin gunyuto niye i kom Jehovah i kare ma gucito ka roto Lobo ma Kiciko Pire-ni. Ento, niyegi obedo ka dongo medde ameda i kare ma guneno kit ma Jehovah konyogi kwede. Man aye gin mumiyo Yocwa ociko Luicrael matek ni: “Gin mabeco ducu ma yam Rwot Lubangawu ociko piwu gin ducu gucobbe kakare, pe tye acel mo ma pe otimme.” Lacen en omedo ni: “Pi meno dong wulwor Rwot [Jehovah], wuti bote ki lengcwiny ki gen madwong. . . . Ento an gira ki jo ma i oda ducu wabitiyo bot Rwot [Jehovah].” (Yoc. 23:14; 24:14, 15) Ka wan bene waneno kit ma Jehovah konyowa kwede, man biweko niyewa doko matek.​—Jab. 34:8.

12. Wan wanyuto nining ni watye ki niye matek?

¹² Watwero nyuto nining ni watye ki niye matek? Lapwonnye Yakobo ogamo lapeny meno i kare ma owaco ni: “Abinyutti niyena ki ticca.” (Yak. 2:18) Jami ma watimogi ginyuto ni watye ki niye me ada. Kong wanenu labol mogo.

13. I yo macalo mene ma tic me tito kwena twero nyuto kwede ni watye ki niye?

¹³ Nywako i tito kwena obedo yo acel maber loyo ma wanyuto kwede ni watye ki niye matek. Pingo wawaco kumeno? Pien ka watito kwena, ci nongo watye ka nyutone ni agikki piny dong cok adada dok “pe bigalle.” (Ibru 2:3) Me ngeyo ka ce watye ki niye matek, watwero penye kekenwa ki lapeny magi: ‘Tic me tito  kwena-ni tika pire tek bota? Tika atye ka tute me tito bot jo mukene lok i kom Lubanga? Tika ayenyo yo mapat pat me medo cawana i tic pi Jehovah?’ (2 Kor. 13:5) Ada, ‘tuco ki dogwa’ obedo yo maber loyo me nyuto ni watye ki niye i cwinywa.​—Kwan Jo Roma 10:10.

14, 15. (a) Wan watwero nyuto niye i kwowa me nino ducu nining? (b) Tit gin mo mutimme ma nyuto ni niye matek mitte.

¹⁴ Wanyuto bene niye i kom Jehovah ka nongo wakanyo pekki me lobo man. Kadi bed komwa lit, cwinywa otur, cwinywa cwer, nyo watye i pekki mukene ma temo niyewa, pud wabedo ki gen ni Jehovah gin ki Wode ‘gibikonyowa i kare ma mitte.’ (Ibru 4:16) Wanyuto gen ma kit meno ka walego pi kony ma mitte ento pe ni kicob mitiwa i yo me cwiny keken. Yecu owaco ni waromo lega pi jami me kom, ma man kwako “camwa me nino ducu.” (Luka 11:3) Jami mogo ma kicoyogi i Baibul giminiwa gen ni Jehovah romo miniwa jami ma mitte. I kare ma piny otwo adada i lobo Icrael, Jehovah omiyo cam kacel ki pii bot Elia. Kit ma Jehovah owaco kwede, “Agak gutero kwon ki ringo-gu bote i odiko, ka dok otyeno bene guterre kwon ki ringo. En obedo ka mato pii i kulu Kerit.” (1 Luker 17:3-6) Watye ki niye ni Jehovah bikonyowa wek wanong gin ma wamito.

¹⁵ Watye ki gen ni keto cik ma igi lac me Baibul i tic konyowa me nongo ginacama. Laminwa mo munyomme ma nyinge Rebecca, ma bedo i lobo Asia, owaco ni meno aye gin mutimme i kom jo me ode. Gin gutiyo ki Matayo 6:33 ki Carolok 10:4 i kwogi kun giketo pi Ker-ri bedo mukwongo dok bene gitiyo matek. Rebecca owaco ni i kare mo cware oniang ni dog ticce kacel ki lyeto ma etye ka nongone ki iye romo balo watgi ki Jehovah, ma oweko en oweko tic meno woko. Ento, gin gitye ki lutino angwen ma myero gugwoki. Rebecca  owacci man aye gin mutimme: “Wacako cato cam. Man aye kit ma wabedo ka kwo kwede ma oweko wawinyo ni Jehovah pe owekowa ata. Pe tye nino mo acel ma wakeng cam.” Tika in bene itye ki niye ni meno tira ma Baibul miyo i kareni tiyo bot dano ducu?

16. Adwogi maber ango ma wanongo ka wageno Lubanga?

¹⁶ Omyero wabed ki gen ni ka walubo cik pa Lubanga, ci man bikeliwa adwogi maber. Paulo otiyo ki lok ma kicoyo i Kabakuk kun waco ni: “Ngat ma kite atir pi niye bibedo kwo.” (Gal. 3:11; Kab. 2:4) Pi meno, pire tek ni omyero waket niye i kom Ngat ma ada romo konyowa. Paulo poyo wiwa ni: “Deyo obed bot Lubanga ma twero tiyo tic madwong twatwal ma kato gin ma watwero lego pire nyo keto i tamwa, pi tekone ma tye ka tic i komwa.” (Ep. 3:20) Lutic pa Jehovah gitute ki kerogi ducu me timo mitine, dok gigeno ni Jehovah bigoyo laane i kom tutegi. Tika cwinywa pe yom ni Lubangawa tye kwedwa?

17. (a) Kigamo lega pa lukwena nining i kare ma gulego ni kimed niyegi? (b) Pingo wageno ni kibigamo legawa me medo niyewa?

¹⁷ I nge nyamo jami magi ducu, watwero bene winyo kit ma lukwena guwinyo kwede i kare ma guwaco ni: “Med Niyewa!” (Luka 17:5) Yecu ogamo legagi i Pentekote 33 i kare cwiny maleng olor i wigi ci gin guniang yub pa Lubanga i yo matut. Man ojingo niyegi. Macalo adwogine, gin gucako tito kwena magwar i kare meno. (Kol. 1:23) Tika waromo bedo ki gen ni kibigamo legawa ka walego ni kimed niyewa? Baibul wacciwa ni watwero bedo ki gen ka “walubo gin ma en [Lubanga] mito.”​—1 Jon 5:14.

18. Jehovah goyo laa i kom jo ma giketo niye i kome nining?

¹⁸ Jehovah cwinye bedo yom i kom jo ma giketo gengi ducu i kome. Jehovah bigamo legawa ka walego ni meno kimed niyewa, dok niyewa bidongo matek adada ma weko ‘gibikwanowa ni wan jo ma myero i ker pa Lubanga.’​—2 Tec. 1:3, 5.