1. Kero mene ma watye kwede ma konyowa me bedo ki kit pa Lubanga?

 JEHOVAH ocweyowa ki kero me niang kit ma jo mukene giwinyo kwede. Olo to watwero niang kit ma ngat moni nongo tye ka winyo kwede kadi bed gin meno nongo peya otimme i komwa. (Kwan Jo Epeco 5:1, 2.) Watwero tic ki mot man ma Lubanga ominiwa-ni nining? Pingo myero wagwokke tutwal i kit ma watiyo kwede ki mot man?

2. Jehovah winyo nining ka watye i peko?

² Cwinywa yom ni Lubanga ocikke me miyo kwo labongo to i polo bot jo ma kiwirogi ki dok kwo ma pe tum bot “romi mukene” ma lugen ma gilubo kor Yecu. (Jon 10:16; 17:3; 1 Kor. 15:53) Ki lok ada, pekki ma guromo lobo i kareni pe gibibalo kwo labongo to i polo ki dok kwo ma pe tum i lobo kany. Jehovah ngeyo arem cwiny ma watye kwede kit macalo en bene onongo ngeyo arem cwiny ma Luicrael gubedo kwede i kare ma gitye opii i lobo Ejipt. Ki lok ada, “i cangi ducu en bene oneno iye can.” (Ic. 63:9) Lacen, Lujudaya gubedo ki lworo madit pien lumonegi onongo pe gimito ni meno guroc ot  pa Lubanga, ento Lubanga owaco ni: “Ngat ma ogudo komwu nongo ogudo tong wang Rwot me mony.” (Jek. 2:8, Baibul pa Katoli) Kit macalo min latin nyuto mar pi latinne-ni, Jehovah bene nyuto mar madit pi luticce dok mito konyogi. (Ic. 49:15) I yo acel-li, Jehovah temme me kette i peko pa jo mukene, dok en bene ominiwa kero meno.​—Jab. 103:13, 14.

3. Ngo ma nyuto ni Yecu onongo tye ki cwiny me kica?

³ Yecu onongo ngeyo arem ma jo mukene gitye ka wok ki iye kadi bed ni meno en pe owok ki iye. Me lapore, lutedero ata-ni onongo gitye ki lworo madit adada i kom lutela dini pien gubedo ka bwologi kun gicomo cik mapol me diyogi. (Mat. 23:4; Mar. 7:1-5; Jon 7:13) Yecu onongo pe lwor dok pe bwolle wacel, ento en onongo ngeyo jami ducu ma dano gikato ki iye kadi bed ni nongo pe otimme i kome. Pi meno, “Ka oneno lwak ci kica omake i komgi mada, pien onongo gitye ka unogi matek, dong gudoko goro, calo romi ma lakwatgi pe.” (Mat. 9:36) Calo Wonne, Yecu onongo lamar dok lakica.​—Jab. 103:8.

4. Ngo ma Yecu otimo i kare ma oneno jo mukene gitye ka deno can?

⁴ I kare ma Yecu oneno dano ka gideno can, kica omakke adada ci okonyogi. Pi meno, en obedo ki mar madit calo Wonne. Me labolle, i kare ma Yecu kacel ki lukwenane gucito ka tito kwena ka mabor, gin onongo guol adada dok gimito ka mo ma dano pe iye wek giywe mot. Pien kica omako Yecu i kom lwak ma onongo gitye ka kure, man omiyo en “opwonyogi ki lok mapol.”​—Mar. 6:30, 31, 34.

5, 6. Myero water luwotwa nining ka wamito nyuto mar pa Lubanga? Mi kong labol. (Nen cal ma tye i pot karatac 24.)

⁵ Watwero nyuto mar ma Lubanga tye kwede i kit ma watero kwede ki luwotwa. Me labolle: Ket kong ni meno bulu mo ma Lakricitayo, ma wabilwongo ni Alan, tye ka tam i kom omego mo muteggi ma kwan pire kene pe yot pien wange pe neno piny maber. En bene nongo tek tutwal me wot i ticwa me pwony i ot ki ot. Alan wiye opo i kom lok ma Yecu owaco ni: “Kit ma wumito dano gutimwu, wun bene wutimgi kumeno.” (Luka 6:31) Pi meno, Alan openye kekene ni, ‘Ngo ma amito ni jo mukene gutim bota?’ En ogamo lapeny man ni, ‘Amito ni gugwe odilo kweda!’ Ento omego muteggi-ni tika romo gweyo odilo? Lok pa Yecu ni tere ni omyero wapenye kekenwa ni, ‘Ngo ma amito ni lawota otim bota ka onongo gin ma tye ka timme i kome-ni aye tye ka timme i koma?

⁶ Alan pud obedo ngat mayot, ento tye ki kero me niang gin ma en peya owok ki iye. En ocwalo kare ki omego muteggi-ni kun keto cwinye mot me winyo lokke. Motmot, Alan oniang peko ma ngat muteggi wok ki iye pien en nongo kwano Baibul nyo wot i ticwa me pwony tek. I kare ma Alan okette i ka omego mutii-ni, en ocako neno kit ma etwero konye kwede. Wan bene watwero timo gin acel-li. Myero watemme me kette i peko pa omegiwa ka wamito lubo lanen me mar pa Jehovah.​—1 Kor. 12:26.

7. Wan waromo niang peko pa utmegiwa nining?

⁷ Pol kare pe yot me niang arem ma jo mukene gitye ka wok ki iye. Jo mapol gikato ki i pekki matego ma wan peya  wawok ki iye. Mogo bino macalo adwogi me awano, two, nyo tiyo. Jo mukene gideno can pienni nongo cwinygi otur, gitye ki par matek adada, kiterogi i yo me gero nyo kibuto kwedgi tektek i kare mukato angec. Jo mukene gitye i paco ma jone dinigi opokke nyo bene mogo gitye i odi ma tye iye lanyodo acel keken. Dano ducu gitye ki peko dok pekki magi ducu pe girom. Pi meno, wan watwero nyuto mar calo Lubanga nining? Myero waket cwinywa ka winyo lokgi mot wek waniang olo to kit ma giwinyo kwede. Man biweko wakonyogi pien nongo watye ka nyuto mar calo Jehovah. Pekowa patpat ento waromo cuko cwinygi i yo me cwiny kun waminigi kony ma mitte.​—Kwan Jo Roma 12:15; 1 Petero 3:8.

8. Gin ango mumiyo Yecu onyuto cwiny me kica?

⁸ Wod pa Lubanga owaco ni: “En Mamalo Twal . . . timo ber bot jo ma pe pwoye ki bot jo maraco.” (Luka 6:35) Labongo akalakala, Yecu onyuto cwiny me kica calo Lubanga. Gin ango ma okonyo Yecu me timo meno? En onyuto cwiny me kica pien obedo ka tam i kom kit ma lokke kacel ki ticce gudo kwede jo mukene. Me labolle, dako mo ma onongo kingeyo ni twon labal adada obino bote, obedo ka koko kun dunyo tyene ki yer wiye. Yecu oniang ni dako-ni ongut i kom balle, dok onongo ngeyoni cwinye bitur ka eryeme ki gero. Ma ka meno, opwoye dok otimme kica pi balle. I kare ma Laparicayo mo oloko marac i kom gin mutimme-ni, Yecu bene oloko bote i yo me kica.​—Luka 7:36-48.

9. Gin ango ma romo konyowa wek wanyut cwiny me kica calo Lubanga? Mi labol.

⁹ Wan watwero nyuto cwiny me kica calo Lubanga nining? Lakwena Paulo ocoyo ni: “Latic pa Rwot myero obed ngat ma pe da atata, myero obed ngat ma lakica bot dano ducu” (2 Tem. 2:24) Ngat ma lakica tamo matut ma peya oloko nyo otimo gin mo wek pe ecwer cwiny jo mukene. Tam kong kit ma waromo nyutone ni wan lukica i kabedo macalo magi: I gang tic, ladit ticwa pe tye ka timo ticce maber. Gin ango ma ibitimo? Omego mo obino i cokke pi tyen mukwongo i nge dwe mapol. Ngo ma wabiwaco bote? I ticwa me pwony, rwod ot mo owaco ni, “Ticca pol ma pe aromo lok kwedi kombeddi.” Tika wabiparo pire dok wanyuto cwiny me kica? I paco, luotwa openyowa ni, “Pingo pe kong onongo iwacca gin ma ibitimo i Ceng Abicel?” Tika wabigamo lokke i yo me kica? Ka watemme me kette i peko pa jo mukene kun watamo i kom kit ma lokwa kacel ki ticwa romo gudogi kwede, ci waromo niang kit ma myero wanyut cwiny me kica calo Jehovah i lokwa kacel ki ticwa.​—Kwan Carolok 15:28.

10, 11. Gin ango ma twero konyowa me bedo ki ryeko pa Lubanga? Mi kong labol.

¹⁰ Bedo ki kero me niang gin ma pe otimme i komwa romo konyowa me lubo lanen me ryeko pa Jehovah wek wange ka ticwa twero kelo adwogi marac. Ryeko obedo kit acel ma pire tek pa Jehovah dok ka en mito tic kwede, ci romo neno i yo matut adwogi ma romo bino pi ticwa. Kadi bed pe wangeyo gin ma bitimme anyim, ento ber ka watamo i kom kit ma adwogi me ticwa bigudo kwede wan ki jo mukene. Luicrael pe gutamo i kom kit ma kwero bedo luwiny bot Lubanga bikelo adwogi maraco. Moses onongo ngeyo ni Luicrael pud gibitimo jami maraco i wang  Jehovah kadi bed ni En otimogi jami mabeco. I kare ma Moses tye ka lok ki Luicarel, en oloko kwedgi kun wero ni: “Pien gin aye rok ma gikwiya yubo lok, niang lok bene loyogi woko. Ka nene giryek, kono giniang lok man, kono gingeyo [gitamo i kom] agikki me kwogi.”​—Nwo. 31:29, 30; 32:28, 29.

¹¹ Myero watam nyo bene wago adwogi ma ticwa twero kelone ka wamito lubo ryeko pa Lubanga. Me labolle, ka wutye ka winye me nyom, myero wunge ni meno miti me komwu nongo tye matek mukato kare woko. Pe myero waket yub nyo watim gin mo keken ma twero keto watwa ki Jehovah ka mading! Ma ka meno, waketu i tic tira me ginacoya ma waco ni: “Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.”​—Car. 22:3.

12. Bedo ka lwodo lok i kom jami maraco twero kelo adwogi marac nining?

¹² Ngat ma ryek ngeyo ni meno lwodo lok romo bedo calo mac. Mac twero bedo me kony ka watiyo kwede i yo maber, calo me tedo. Ento bene twero bedo gin marac adada ka kitiyo kwede i yo marac, me labolle, ka owango ot ci oneko dano. I yo acel-li bene, watwero nongo adwogi maber ki i lwodo lok kace konyowa me lubo kit pa Jehovah. Ento, twero bedo rac adada ka walwodo lok i kom miti maraco. Me labolle, ka waloko odoko kitwa me bedo ka lwodo lok i kom jami maraco, man miyo wacako goyo jami mogo i wiwa ma pe gitwero timme. Ki lok ada, bedo ka lwodo lok i kom jami maraco twero balo watwa ki Jehovah!​—Kwan Yakobo 1:14, 15.

13. Kit kwo ma nining ma Kawa obedo ka tamone?

¹³ Tam kong i kom kit ma Kawa ocako dongo kwede ki miti me camo nyig yat ma Lubanga ogengogi ni pe gucam, “yat me ngeyo gin maber ki marac.” (Acak. 2:16, 17) Twol owacce ni: “Pe wubito. Pien Lubanga ngeyo ni, ka wucamo, ci wangwu biyabbe woko, ci wubidoko calo Lubanga, miyo wungeyo gin maber ki gin marac.” Kawa “oneno ni yat-te ber me acama, dok nen ma mwonya bene.” Adwogine obedo nining? En “opwono nyige, ocamo; omiyo mogo bot cware, ci ocamo.” (Acak. 3:1-6) Ki bot Kawa, tye gin mo ma ogudo cwinye i tam ma Catan omiyo-ni. Ma ka ye ni Jehovah aye otite gin maber ki marac, en onongo bimoko tamme pire kekene. Man pud dong okelo adwogi marac adada! Pien Adam pe obedo lawiny man oweko  “bal yam obino i lobo . . . ka dong to obino pi bal.”​—Rom. 5:12.

14. Baibul cikowa nining i kom tim me tarwang?

¹⁴ Bal ma Kawa otimo i poto me Eden-ni pe obedo tim me tarwang. Ento, Yecu ocikowa pe me bedo ka lwodo lok i kom tim me carocaro. En owaco ni: “Dano mo ma neno dako ce paro ni ebed kwede, meno nongo dong otimo abor woko kwede ki i cwinye.” (Mat. 5:28) Medo i kom meno, Paulo bene ocikowa ni: ‘Pe wutam pi kwowu me kit pa dano ma ginywalowu kwede pi cobo mitiwu.’​—Rom. 13:14.

15. Kit kodi lonyo ango ma myero wakan piwa, ki dok pingo?

¹⁵ Gin acel madok rac adada en aye bedo ka lek ni meno walony kun nongo watwa ki Lubanga tye ka mading. Ki lok ada, lonyo tye ‘macalo cel ma gigero ocudo malo likung ma gwoko en i tamme.’ (Car. 18:11) Yecu omiyo labol ma nyuto adwogi marac ma bino ka ngat moni “kano lonyo pire kene, kun pe tye ki lonyo bot Lubanga.” (Luka 12:16-21) Jehovah cwinye bedo yom ka watimo jami ma yomo cwinye. (Car. 27:11) Cwinywa pud dong bedo yom ya ka watye ki wat maber kwede pien nongo wakano ‘lonyo piwa kenwa i polo’! (Mat. 6:20) Wat maber ki Jehovah en aye obedo lonyo ma pire tek adada ma watwero nongone.

16. Gin ango ma twero konyowa ka watye ki par?

¹⁶ Go kong par ma wabedo kwede ka waketo kerowa ducu i tute me kano “lonyo piwu kenwu i lobo.” (Mat. 6:19) Yecu otiyo ki labol me tito ni meno “paro lok me lobo man, ki maro lonyo” romo diyo lok me Ker-ri. (Mat. 13:18, 19, 22) Kadi bed ni meno watye ka paro pi cente nyo pe, ento tye jo mogo ma i cawa ducu gibedo mere ka tamo pi jami marac ma twero timme. Ka pe wagwokke, bedo ki par mukato kare i cawa ducu twero weko komwa bedo lit nyo bene wadoko goro i yo me cwiny. Myero wagen Jehovah dok bene wiwa myero opo ni meno “par mapol gengo dano me bedo ki yomcwiny, [ento] lok maber me kica aye romo kweyo cwinye.” (Car. 12:25) Lok maber me cuko cwiny ma a ki bot ngat ma ngeyo peko ma watye ka kato ki i iye weko wabedo ki yomcwiny. Tito lok ma i cwinywa bot lunyodowa, luotwa, nyo luwotwa ma gigenne dok ma gineno jami kit ma Lubanga neno kwede twero konyowa me lweny ki par.

17. Jehovah konyowa me lweny ki parwa nining?

¹⁷ Pe tye ngat mo ma niang parwa makato Jehovah. Paulo ocoyo ni: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.” (Pil. 4:6, 7) Tam kong i kom jo ma gigwokowa ki jami ma gibalo niyewa​—luye luwotwa, luelda, lagwok ot ma lagen, lumalaika, Yecu, ki dong Jehovah kikome.

18. Bedo ka lwodo lok twero konyowa nining?

¹⁸ Kit ma dong waneno kwede, bedo ka lwodo lok romo konyowa me nyuto kit mogo pa Lubanga, calo mar. (1 Jon 4:8) Wabibedo ki yomcwiny ka wanyuto mar me ada, walwodo lok i kom adwogi maraco ma ticwa kelo, ki dok ka wagwokke ki par ma bigengowa bedo ki yomcwiny. Pi meno, myero dong wati maber ki mot man ma Lubanga ominiwa me goyo cal gin moni i wiwa ki dok me lubo lanen me mar, kica, ryeko ki dok yomcwiny pa Jehovah.​—Rom. 12:12.