LOK MA I POK NGEYE | ITWERO BEDO COK KI LUBANGA
Pe Tye Yo me Kwo Maber Loyo
Gin ango ma itwero timone me bedo cok ki Lubanga? Dong watyeko neno jami mogo ma itwero timone wek idong wat macok ki Lubanga. Gin aye:
-
Nge dok iti ki nying Lubanga, ma nying meno aye Jehovah.
-
Lok kwede nino ducu i lega dok ikwan Lokke.
-
Tute matek nino ducu me timo gin ma Jehovah mito.
Nyikke cok bot Lubanga kun itiyo ki nyinge, ilego bote, ikwano Lokke, dok itimo gin ma yomo cwinye
Ma lubbe ki jami magi, tika itwero wacone-ni itye ka timo jami ma weko inyiko cok ki Lubanga? Tika tye kabedo mogo i kwoni ma mitte ni myero itim alokaloka iye? Labongo akalakala, kadi bed ni tute mitte pud watwero nongo adwogi mabeco.
Jennifer ma bedo i lobo Amerika owaco ni: “Wanongo adwogi maber ka watute me bedo ki wat macok ki Lubanga. Wat ma kit man keliwa mot mapol: medo genwa i kom Lubanga, miyo waniang kite, ento ma pire dong tek loyo aye ni marwa pi Jehovah dongo. Pe tye yo mo me kwo maber loyo man!”
Ka imito bedo ki wat macok ki Lubanga, Lucaden pa Jehovah cwinygi bibedo yom me konyi. Gitwero keto yub me kwano Baibul kwedi, labongo cul mo keken. Gin bene gijoli i cokkegi me kwano Baibul i Ot me Ker macok kwedi, ka ma ibibedo ki yomcwiny me rwatte ki jo ma gitero watgi ki Lubanga calo gin ma pire tek adada. * Ka itimo meno, in bene ibibedo calo laco jabuli ma owaco ni: “Ki tung bota, bedo cok ki Lubanga aye ber.”—Jabuli 73:28.
^ para. 9 Me penyo wek kikwan Baibul kwedi, nyo me ngeyo ka ma Ot me Ker macok kwedi tye iye, tim ber ipeny ngat ma omini magajin man nyo cit i kabedowa me intanet, www.jw.org, ci nen wi lok matino tino ma tye i te lok ma wacci KUBBE KWEDWA.
