1-3. (a) Can lim ango ma dano mapol girwatte kwede, dok jo mogo gitemo cobone nining? (Nen cal ma tye i pot karatac man.) (b) Ka lunyodo gutamo i kom a woko ki bot lupacogi, gin giparo gin ango ma lubbe ki gwoko lutinogi?

 MARILYN * owaco ni: “Cwara James onongo dwogo jwi ki i gang tic ma nongo ool adada, dok cente ma en obedo ka nongone tidi ma pe twero wilo jami ducu ma mitte. Onongo amito ni akony kore ki wilo jami mogo mabeco bot wodwa Jimmy, jami ma lutino kwan luwote gitye kwede.” Marilyn onongo bene mito konyo wadine, ki dok gwoko cente pi kare me anyim. Luwote mapol onongo dong gucito i lobbe ma woko ka tiyo cente. Ento i kare ma otamo matut i kom cito i lobo ma woko, tamme opokke iye aryo. Pingo?

² Marilyn obedo ka paro pi gin ma romo timme i kom jo me ode ka epe. Gin bene onongo giworo Jehovah kacel macalo jo me ot. Kadi bed kumeno, en oneno ni jo mogo gucito i lobo ma woko pi kare mo manok, ento lupacogi olo mere gitye ka tic pi Jehovah. Ento en openye kekene ka ce eromo gwoko Jimmy ki ka mabor. Tika en romo konyo wode kun ‘pwonye dok nyebe ki kit mabeco ma Jehovah pwoyo’ ki i Intanet?​—Ep. 6:4.

³ Marilyn openyo tam ki bot dano. Cware onongo pe mito ni ociti kadi bed owacci pe ebijuke. Luelda kacel ki jo mukene  me kacokke gumiye tam ni pe ociti, ento lumegiwa mapol gubedo ka buko mac ni ociti. Gin guwacce ni: “Ka in ada imaro jo me odi, ci omyero iciti. Kadi itye i lobo ma woko, pud iromo tic pi Jehovah.” Kadi bed cwinye obedo ka gung, Marilyn ociko James gin ki wode Jimmy ci ocito ka tic i lobo ma woko. En ocikke botgi ni: “Pe abiri kunnu.”

4. Pingo dano mapol gicito i lobo ma woko, ento angagi ma gigwoko lutinogi?

⁴ Jehovah pe mito ni luticce gubed i can mukato kare woko, dok cito i lobo ma woko obedo yo macon me lweny ki peko man. (Jab. 37:25; Car. 30:8) Yakobo ooro awobene me cito i Ejipt ka wilo cam wek pe gito woko ki kec. * (Acak. 42:1, 2) I kare-ni, pol pa jo ma gicito i lobo ma woko pe giweko pacogi pien ni kec tye ka nekogi. Ento, oromo bedo ni gin gitimo meno pien nongo gitye ki banya madongo. Mukene gimito ni lupacogi gubed ki rwom me kwo maber. Pol pa jo magi gia ki paco gicito i kabedo mukene nyo i lobo ma woko pien gimito jami mabeco kacel ki kwo mayot. Pol kare giweko lutinogi matino i cing laco nyo dako, i cing latin ma dong dit, kwarogi nyo dadagi (atat), wadigi nyo luremgi. Kadi bed jo ma gicito i lobo ma woko cwinygi cwer ni giweko coggi nyo mongi ki dong lutinogi, polgi gitamo ni pe gitye ki gin mo mukene ma giromo timone.

5, 6. (a) Gin ango ma Yecu opwonyo ma lubbe ki nongo yomcwiny kacel ki gwok muromo? (b) Yecu opwonyo lulub kore me lega pi jami mene? (c) I yo mene ma Jehovah goyo laane i komwa?

⁵ I kare pa Yecu, dano mapol onongo gitye lucan dok nen calo gutamo ni gibibedo ki yomcwiny kacel ki gwok muromo ka gitye ki cente mapol. (Mar. 14:7) Ento, Yecu onongo mito ni dano guket gengi ka mukene. En onongo mito ni gugen Jehovah, ngat ma miyo mot mari nakanaka. I pwony ma Yecu omiyo i Wi Got, en otito ni yomcwiny me ada ki dong gwok muromo pe jenge i kom nongo jami me kom, pwonye i rwom mamalo, bedo ki cente oduk nyo jami mukene, ento jenge i kom liremwa ki Wonwa me polo.

⁶ I lega ma Yecu omiyo macalo lapor-ri, en opwonyowa pe me lega pi lim oduk, ento pi jami ma wamito pi nino ducu, ma man kwako ‘camwa me tin.’ En owaco ka maleng bot jo ma gitye ka winye ni: “Pe wukan lonyo piwu kenwu i lobo, . . . Ento wukan lonyo piwu kenwu i polo.” (Mat. 6:9, 11, 19, 20) Watwero bedo ki gen ni Jehovah bigoyo laane i komwa kit ma en ocikke kwede. Mot ma Lubanga miniwa pe kwako mere nyuto ni en cwinye yom i komwa; ento en bene miniwa jami ma wamito. Ada, yo acel keken me nongo yomcwiny kikome kacel ki gwok muromo aye me geno Wonwa ma lamar-ri ma ka geno cente.​—Kwan Matayo 6:24, 25, 31-34.

7. (a) Jehovah omiyo tic me gwoko lutino bot angagi? (b) Pingo lunyodo aryo ducu myero gugwok lutinogi kacel?

⁷ ‘Keto cwinywa i kom nongo kit ma atir pa Lubanga’ kwako neno tic me gwoko jo me odiwa kit ma Jehovah neno kwede. Cik ma Kimiyo bot Moses gudo Lukricitayo kit man ni: Lunyodo myero gupwony lutinogi i yo me cwiny. (Kwan Nwoyo Cik 6:6, 7.) Lubanga omiyo tic me gwoko lutino bot lunyodo, pe bot kwaro nyo dayo nyo ngat mukene. Kabaka Solomon owaco ni: ‘Latin, winy lok ma woru pwonyi kwede, pe ikwer winyo pwony pa meni bene.’ (Car. 1:8) Jehovah mito ni lunyodo aryo ducu myero gubed tye wek  gunywak i tiro ki dong pwonyo lutinogi. (Car. 31:10, 27, 28) Lutino gipwonyo jami mapol ki bot lunyodogi, tutwalle i yo me cwiny, ka giwinyo lunyodogi ka lok i kom Jehovah nino ducu dok gineno lanengi maber.

8, 9. (a) Alokaloka macalo mene ma timme ka lanyodo pe bedo kacel ki jo me ode? (b) Ka lunyodo ki lutino pe gibedo kacel, adwogi maraco ango ma twero bino?

⁸ Jo ma gicito i lobo ma woko pol kare gingeyo ni olo to gibirwatte ki pekki mogo, ento gin pe gineno adwogi maraco ma wotgi-ni bikelone i kom lupacogi. (Car. 22:3) * I kare ma Marilyn ocito woko litap, en ocako winyo arem cwiny malit adada pien en opokke woko ki jo me ode. Cware ki wode bene guwinyo arem cwiny. Jimmy obedo ka penye ni, “Pingo iweka?” Marilyn onongo tye ki pulan me tic i lobo ma woko pi dwe manok, ento en ori pi mwaki mogo ci ocako neno alokaloka ma pe oyomo cwinye i kom jo me ode. Jimmy onongo cwinye nok me lok kwede dok pe mito titte lok ma i cwinye. Ki cwer cwiny, Marilyn owaco ni, “En onongo dong pe mara.”

⁹ Ka lunyodo ki lutino pe gibedo kacel, yomcwinygi rweny woko ki dong nenogi i kom gin matir ki marac balle woko. * Ka lutino pud gitino, ento gimedde ki bedo patpat ki lunyodogi, ci man kelo adwogi marac adada. Marilyn otito bot Jimmy ni etye ka jalle me miyo kony muromo bote. Ento ki bot Jimmy, en otamo ni minne oweke woko. I acakkine, cwinye obedo ka cwer ni minne pe. Ento, i kare ma minne odwogo ka limme, cwinye onongo pud tye ka cwer dok pe omito bedo kwede. Jimmy otamo ni pe pore me winyo dog minne ki dok nyutte mar kit ma lutino ma kiwekogi paco gitimo kwede.​—Kwan Carolok 29:15.

10. (a) Ka lunyodo gicwalo mic ma ka bedo kacel ki lutinogi, man twero gudo lutino nining? (b) Gin ango ma lanyodo pe romo timone ka en temme me gwoko lutinone ki ka mabor?

¹⁰ Marilyn otemo yomo cwiny Jimmy ki cwale cente ki mic mapol, pien en onongo bedo ka mabor. Ento en oniang ni etye ka nyiko wode cen ki bote dok etye ka pwonye me keto jami me kom macalo gin ma pire tek loyo lupacone nyo Jehovah. (Car. 22:6) Jimmy obedo ka wacce ni: “Pe idwog paco, bed ka cwala jami mapol.” Marilyn ocako niang ni pe eromo gwoko wode kun ecoyo waraga, egoyo  cim, nyo eloko kwede i vidio. En owaco ni, “Pe itwero waco bot latinni ni obut maber kun ikwako kore nyo i noto lemme ki i intanet.”

11. (a) Bedo ka mabor ki luoti pien ni itye ka tic twero gudo nyomwu nining? (b) Laminwa mo acel oniang nining ni myero edok cen paco?

¹¹ Wat i kin Marilyn ki Jehovah, ki dong cware James onongo tye ka balle woko. En onongo woto i cokke kacel ki ticwa me pwony kicel keken i cabit acel nyo bene pe cito. Ki bene, onongo mitte ni en okwer winyo lok pa ladit ticce ma obedo ka bite me buto kwede. Kit macalo Marilyn ki James onongo kingi bor ma pe gitwero lok i kom pekki ma gitye ka wok ki iye-ni, gin gucako tito bot jo mukene kit ma giwinyo kwede ki i cwinygi, omiyo manok kono gutimo abor. Marilyn oniang ni kadi bed ni gin ki cware pe gitimo abor, ento gin onongo pe gitwero lubo tira me Baibul ni gibed kacel kun gicobo mitigi me buto. Gin onongo pe gitwero nywako tam ma obino atura i wigi, neno wanggi, bwunyo, mako cinggi, kwako korgi, nyuto ‘mar’ nyo cobo ‘mitigi’ me buto. (Wer. 1:2; 1 Kor. 7:3, 5) Ki bene onongo pe gitwero woro Jehovah ki cwinygi ducu kacel ki wodgi. Marilyn owacci, “I kare ma apwonyo ki i gure madit ni bedo ki woro pi jo me ot kare ki kare pire tek wek wabwot i nino madit pa Jehovah, aniang ni omyero adok paco.” En odok ci ocako dongo wat ma i kingi macalo jo me ot ki bene watte ki Jehovah.

12. Tam ango ma jenge i Ginacoya ma kitwero miyone bot jo ma pe gibedo kacel ki lupacogi?

¹² I kare ma Marilyn omoko tamme me dok paco, jo mukene gumiye tam mabeco ento mogo gumiye tam marac. Luelda me kacokke ma onongo en tye iye i lobo ma woko-ni gupwoye pi niyene ki tekcwinye. Ento, jo mogo ma guweko coggi nyo mongi kacel ki lupacogi onongo pe gimito. Ma ka lubo lanenne maber-ri, gin gutemo balo cwinye. Gin gubedo ka wacce ni, “I nge kare manok keken nongo idwogo cen. Ibikwo nining ka idok paco?” Ma ka loko lok ma balo cwiny kuman, Lukricitayo myero ‘gupwony mon matino me maro coggi ki litinogi ki gwoko pacogi, wek pe omi jo mukene guyet lok pa Lubanga.’​—Kwan Tito 2:3-5.

13, 14. Pingo mito niye matek adada me keto Jehovah macalo ngat ma pire tek loyo cobo miti pa lupaco? Mi lapor.

¹³ Jo mapol ma giweko lobegi-ni nongo gudongo i lobo ka ma kitero tekwaro ki wadi, tutwalle lunyodo, calo pigi tek loyo. Ka Lakricitayo okwero lubo tekwaro nyo miti pa lupacone wek eyom cwiny Jehovah, man nyuto niye matek adada.

¹⁴ Nen kong gin mutimme i kom Carin:  “I kare ma anywalo Don, wan ki cwara onongo watiyo i lobo ma woko, dok onongo pud acako kwano Baibul akwana. Dano ducu me pacona gubedo ki gen ni abicwalo Don gang wek lunyodona gugwokke nio ka watye ki cente muromo.” I kare ma Carin ojemo ni ebigwoko Don en kikome, wadine medo ki cware guwacci kome wac dok bene gubedo ka nyere. Carin owaco ni, “I kom lok, i kare meno pe abedo ka niang atir atir ngo marac ki cwalo Don bot lunyodona pi mwaki mogo manok keken. Ento onongo angeyo ni Jehovah omiyowa tic me gwoko en​—wan lunyodone.” I kare ma Carin dok ogamo iye, cware ma pe obedo Lacaden-ni owacci myero oo iye woko. Tam maber ma Carin omoko con ojingo niyene ma oweko en ocung matek me lubo tira pa Jehovah. Kombeddi, en ki cware kacel ki lutinone cwinygi yom ni gibedo kacel. Ka Carin onongo ocwalo wode acel nyo gin ducu ni jo mukene aye gugwokki, onongo kono okelo adwogi marac adada.

15, 16. (a) Tit kong gin mutimme i kom laminwa mo acel ma pe odongo i cing lunyodone. (b) Pingo en pe ocwalo nyare wek odong i cing mamane?

¹⁵ Lacaden mo ma nyinge Vicky owaco ni: “Pi mwaki mogo manok, dadana (atat) aye ogwoka, kun lunyodona gigwoko lamera matidi. I kare ma acako bedo kacel ki lunyodona, kit ma onongo anenogi kwede onongo pe rom. Lamera matidi onongo loko kwedgi ata, kwako korgi, dok tye ki wat macok kwedgi. Onongo awinyo ni abor ki lunyodona, dok bene kadi wa i kare ma adoko dit, onongo tek me tittigi lok ma i cwinya. An kacel ki lamera wacikke bot lunyodowa ni wabigwokogi ka dong gutii. Abigwokogi pien ni myero agwokgi, ento lamera obigwokogi pien ni marogi.”

¹⁶ Vicky owaco ni, “Mamana mito ni acwal nyara bote wek egwoke, kit macalo en con ocwala bot minne-ni. Ento atitte i yo me kica gin mumiyo pe abilubo tamme. Wan ki cwara wamito gwoko latinwa i yo pa Jehovah. Dok pe amito ni abal wat i kin an ki nyara i kare me anyim.” Vicky dong oniang ni gin maber loyo me atima aye me keto Jehovah kacel ki cikke macalo jami ma pigi tego loyo nongo cente nyo cobo miti pa lupacone. Yecu owaco ka maleng ni: “Pe tye dano mo ma twero tic ki rwodi aryo,” tic pi Lubanga ki dok Lonyo.​—Mat. 6:24; Nia 23:2.

17, 18. (a) I yo mene ma Lukricitayo kare ducu gitwero yero gin ma gimito? (b) Lapeny mene ma wabinyamo i pwony ma lubo man?

¹⁷ Wonwa, Jehovah, tye atera me konyowa wek wanong jami ma wamitogi ka ce waketo pi Ker-ri ki nongo kit ma atir ma en tye kwede bedo mukwongo i kwowa. (Mat. 6:33) Pi meno, Lukricitayo me ada kare ducu gitwero yero gin ma gimito. Jehovah ocikke me miyowa ‘yo ma myero wabwot kwede’ ma pe mitte ni watur cik me Baibul, kadi bed ni watye ka wok ki i kwo matek rom mene. (Kwan 1 Jo Korint 10:13.) Ka ‘wadiyo cwinywa kun wakuro’ Jehovah, ka ‘wageno’ en kun walego pi ryekone kacel ki tirane ki dok walubo cikke, ci ‘en bikonyowa.’ (Jab. 37:5, 7) En bigoyo laa i kom tutewa me tic pire macalo Rwotwa acel keken me ada. Ka waketo en mukwongo i kwowa, ci en bimiyo kwowa bedo “maber.”​—Por ki Acakki 39:3.

¹⁸ Gin ango ma kiromo timone me yubo wat ma oballe? Ngo ma waromo timone me nongo jami ma mitte pi jo me odiwa labongo cito i kabedo ka mabor kwedgi? Dok waromo cuko cwiny jo mukene nining me bedo kacel ki lupacogi? Pwony ma lubo man bigamo lapeny magi.