1. Kit macalo kicweyowa i cal pa Lubanga-ni, kero ango ma watye kwede?

 POL kare dano gitiyo ki carolok man ni: “Obong dyang ma angec lubo ma anyim” nyo “aweno pe weko wiye.” Ki lok ada, lutino mapol olo to gical ki lunyodogi. Man twere pien lutino gilako remo pa wegigi ki megigi. Jehovah, Wonwa me polo aye Ngat ma Omiyo kwo. (Jab. 36:9) Dok wan lutinone olo to wacal kwede. Pien Lubanga ocweyowa i calle, watye ki kero me lwodo lok ki dok moko tam i kom gin moni, ki bene me dongo ki dok gwoko lirem.​—Acak. 1:26.

2. Laremwa ki Jehovah jenge i kom gin ango?

² Jehovah twero bedo Laremwa maber loyo ducu. Larem ma kit man jenge i kom mar pa Lubanga piwa ki dong niyewa i kom en gin ki Wode. Yecu owaco ni: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” (Jon 3:16) Watye ki labol mapol pa jo ma gubedo ki wat macok ki Jehovah. Kong dong wanyamu lok i kom jo aryo.

3, 4. Pingo wat ma obedo i kin Jehovah ki Abraim onongo pat ki ma obedo i kin En ki Luicrael?

³ Jehovah olwongo Abraim, ma en kwaro pa Luicrael-li ni; ‘larema.’ (Ic. 41:8) Buk me Tekwaro me aryo 20:7 bene tito ni  Abraim obedo larem Lubanga. Pingo laco man ma lagen-ni obedo ki larem matek ki Lacwecce? Pien Abraim onongo tye ki niye.​—Acak. 15:6; kwan Yakobo 2:21-23.

⁴ I acakkine, Jehovah onongo tye macalo Wego ki dok Larem likwayo pa Abraim, ma gudoko rok me Icrael-li. Ento ki cwercwiny madit, kingi oballe woko ki Lubanga. Pingo? Pien pe gubedo ka keto niyegi i kom cikke pa Jehovah.

5, 6. (a) Jehovah odoko Laremi nining? (b) Lapeny mene ma myero wapenye kwede?

⁵ Ka imedde ki pwonyo jami mapol madok i kom Jehovah, niyeni kacel ki marri i kome bimedde ki dongo. Tam kong i kom kare ma iniang ni Lubanga obedo Dano Adana, ngat ma itwero bedo ki wat macok kwede. Ipwonyo bene ni wan ducu kinywalowa ki bal pienni Adam pe obedo lawiny. Iniang bene ni dano gupokke woko ki Lubanga. (Kol. 1:21) I ngeye, iniang ni Wonwa me polo pe bor kwedwa ento paro piwa adada. I kare ma wapwonyo kit ma en omiyo kwede ginkok pa Yecu, wacako dongo laremwa ki Lubanga pien waketo niyewa i kom mic man.

⁶ Ka watamo i kom kit ma wadoko kwede larem Jehovah, waromo penye kekenwa ni: ‘An tika atye ka dongo laremwa ki Lubanga? Tika genna ki marra pi Jehovah, Larema ma amaro adada-ni, tye matek dok tye ka dongo nino ducu?’ Ngat mukene ma yam obedo ki wat macok ki Jehovah aye Gideon. Kong dong wanenu lanen maber ma en oweko ki pwony ma watwero nongo ki iye.

7-9. (a) Gin ango ma otimme i kwo pa Gideon, dok adwogine obedo ningo? (Nen cal ma tye i pot karatac 23.) (b) Watwero bedo Larem Lubanga nining?

⁷ Langolkop Gideon otiyo pi Jehovah i kare ma kwo tek adada bot Luicrael i nge donyo i Lobo ma Kiciko Pire-ni. Lungolkop cura 6 waco ni lamalaika pa Jehovah olimo Gideon i Opra. I kare meno, jo Midian onongo gimaro lweny i kom Luicrael. Pi tyen lok meno, Gideon pe obedo ka dino ngano i laro moyo ento i bur biyo olok ka ma eromo kanone woko oyotoyot ki bot jo Midian. Gideon obedo ki ur madit ni lamalaika otuc ci olwonge ni “twon oteka lweny.” Kadi bed ni Jehovah olaro Luicrael ki i opii i lobo Ejipt, Gideon onongo tye ki akalakala ka En bikonyogi doki i kare meno. Lamalaika-ni oloko macalo lawang Lacwec kun cuko cwiny Gideon ni Jehovah tye ki cwak i kome.

⁸ Gideon openye kekene i kom kit ma ‘ebilaro kwede jo Icrael ki i cing jo Midian.’ Jehovah ogamo atir ni: “An aye abibedo kwedi; dok ibineko jo Midian ducu macalo obedo dano acel keken.” (Lungol. 6:11-16) Ki lok ada, Gideon obedo ki akalakala i kom kit ma lok meno bicobbe kwede, man omiyo en openyo pi lanyut. I kare ma en tye ka lok ki lamalaika, Gideon pe obedo ki akalakala mo keken ni Jehovah tye Dano Adana kikome.

⁹ Gin mutimme i ngeye ojingo niye pa Gideon dok onyikke cok bot Lubanga. Gideon otedo dek ci oketo i nyim lamalaika-ni. I kare ma lamalaika ogudo cam-mi ki lut ma omako i cinge ci owang woko i yo me tango, Gideon oniang ni Jehovah aye ocwalo lamalaika man. Gideon owaco ni: “Maa do, ai Rwot Lubanga! Pien dong aneno lamalaika pa Rwot [Jehovah] wang ki wang.” (Lungol. 6:17-22) Tika gin man mutimme-ni opoko kin Gideon ki Lubangane? Pe wacel! Olungtukene aye otimme. Gideon ocako ngeyo Jehovah i yo ma oweko en obedo ki kuc kwede. Wangeyo man pien Gideon ocano keno tyer i kabedo meno ci ocako  nyinge ni: “Rwot [Jehovah] aye kuc.” (Kwan Lungolkop 6:23, 24.) Ka walwodo lok i kom jami ma Jehovah timo piwa nino ducu, man miyo waniang ni en obedo Larem me ada. Ka walego bot Lubanga teretere, ci wabibedo ki kuc madit kwede dok watwa bijing matek.

10. Ma lubbe ki Jabuli 15:3, 5, gin ango ma Jehovah mito ni watim wek wabed lureme?

¹⁰ Ento, wek Jehovah obedo Laremwa, tye jami mogo ma en mito ni watimgi. I Jabuli cura 15, Daudi owero i kom gin ma myero watim wek wabed ‘welo i kema pa Jehovah,’ nyo wabed larem Lubanga. (Jab. 15:1) Kong wanenu jami aryo ma mitte​—omyero wagwokke ki kwoto nying jo mukene ki dong wanyut ni wagenne i ticwa ducu. Ma lubbe ki jami magi, Daudi oloko i kom welo ma bedo i kema pa Jehovah ni: “Pe coko lok me kwot i lok ma en loko, . . . dok pe gamo lim ma giwile kwede i mung wek giwe lok odok i kom dano ma pe ki bal.”​—Jab. 15:3, 5.

11. Pingo omyero wagwokke ki kwoto nying jo mukene?

¹¹ I Jabuli mukene, Daudi owaco ni: “Gwok lebi pe ilok gin marac.” (Jab. 34:13) Ka pe walubo tira man, kinwa twero pokke woko ki Wonwa me polo ma kite atir-ri. Ki lok ada, kwoto nying obedo kit Catan, lamone madit pa Jehovah. “Larac-ci” obedo nyig lok me leb Grik ma te lokke gonye ni “lakwot nying.” Wek pe walok nying jo mukene odok bar tukowa, omyero watam kiryo ma peya waloko i kom ngati mo keken wek wabed cok ki Jehovah. Man tye tutwalle ma lubbe ki kit ma waneno kwede jo ma kicimogi me telo kacokke. ​—Kwan Jo Ibru 13:17; Juda 8.

12, 13. (a) Pingo omyero wabed jo ma genne i jami ducu? (b) Bedo ma wagenne twero gudo jo mukene nining?

¹² Lutic pa Jehovah kingeyogi pi bedo jo ma gigenne. Lakwena Paulo ocoyo ni: ‘Wuleg Lubanga piwa, pien wan wangeyo ada ni cwinywa gire leng, dok wamito ni wabed jo ma genne kare ducu.’ (Ibru 13:18) Pien wamoko tamwa me ‘bedo jo ma genne kare ducu,’ omyero wagwokke pe me kwalo utmegiwa. Me lapore, ka gitiyo piwa, omyero wanen ni waterogi i yo mupore dok waculgi ma rwatte ki kit ma wawinye kwede. Macalo Lukricitayo, omyero wabed jo ma genne bot luticwa ki dong dano ducu. Dok bene ka watiyo bot Lakricitayo lawotwa, omyero wagwokke ki kodi tam moni ni omyero kiterwa i yo madok pat.

¹³ Dano me loboni pol kare gipwoyo Lucaden pa Jehovah pi bedo jo ma genne. Me lapore, ladit mo ma loyo kampuni me gedo oniang ni Lucaden pa Jehovah pol kare gigwoko lokgi. En owacci, “Wun pol kare wucobo cikkewu.” (Jab. 15:4) Bedo ma wagenne konyowa me gwoko liremwa ki Jehovah. Medo i kom meno, kelo bene pak i kom Wonwa me polo.

14, 15. Watwero konyo jo mukene nining me doko lurem Jehovah i ticwa me pwony?

¹⁴ Kadi bed giye ni Lubanga tye, dano mapol ma waloko kwedgi i ticwa me pwony pe gineno Lubanga calo Laremgi maber loyo ducu. Ento, watwero konyogi nining? Nen kong gin ma Yecu owaco ki lupwonnyene gin 70 i kare ma ocwalogi ki aryo aryo ka tito kwena: “Ot ducu ma wudonyo iye, wukwong waco ni, ‘Kuc obed i ot man.’ Ka latin me kuc tye kunnu, ci kucwu bibedo i kome; ento ka pe, ci kucwu bidwogo botwu.” (Luka  10:5, 6) Watwero konyo dano me jolo lok ada ka ce wanyuto cwiny me lirem. Bot jo ma gidagwa, timo man konyogi me jwayo cwiny me gero ma gitye kwede dok weko giwinyo lok me ada i nino mukene.

¹⁵ Ka ce warwatte ki jo ma gumoko liking calo okwodo i kom dini me goba nyo gilubo tim mogo me tekwaro ma pe rwatte ki cik me ginacoya, omyero wamedde ki nyuto botgi cwiny me lirem kun bene wagwoko kuc kwedgi. Wan macalo Lucaden pa Jehovah, wajolo ngati mo keken i cokkewa, tutwalle jo ma cwinygi otur pi jami maraco ma dano gitye ka timone i loboni dok bene gimito pwonyo jami mapol madok i kom Lubanga Jehovah ma waworo-ni. Pwony ma kati kare ki kare, ma wi lokke tye ni “Baibul Loko Kwo pa Dano” tye ki labol mapol pa jo ma kong cwinygi otur ento gunongo kony i nge kwano Baibul.

16. Pingo kitwero lwongowa ni lurem Jehovah ki dok “lutic kacel” kwede?

¹⁶ Jo ma gitiyo kacel pol kare gidoko lurem ma gipoko pyer ngwen. Jo ducu ma gudyero kwogi bot Jehovah gitye ki mot me bedo lureme ki dok “lutic kacel” kwede. (Kwan 1 Jo Korint 3:9.) Ka wamedde ki tito kwena ki dok loko dano me doko lupwonnye pa Yecu, ci wabipwonyo kit mamwonya pa Wonwa me polo. Waneno kit ma cwiny mere maleng konyowa kwede me tito kwena maber-ri.

17. Cam me cwiny ma wanongo i yub me gure madito, me nino acel ki dong me adwol ginyuto nining ni Jehovah tye Laremwa maber loyo ducu?

¹⁷ Ka ce wamedo cawa ma watero i tito kwena, ci wabiwinyo ni wacok ki Jehovah adada. Me lapore, waneno kit ma Jehovah balo kwede yub pa lumonewa ma gimito gengo ticwa me tito kwena-ni. Tam kong i kom mwaki mogo mukato angec. Tika dong waneno kit ma Lubanga tye ka telowa kwede? Watye ki ur madit pi cam me cwiny ma kitye ka pokone kare ducu-ni. Yub me gure madito, me nino acel ki dong me adwol ginyuto ni Wonwa ma lamar-ri ngeyo pekki ma wakemme kwedgi ki dok jami ma wamitogi. Me nyuto yomcwinygi pi gure mo mutimme, luot mo acel ocoyo ni: “Yub me gure man pud dong ogudo cwinywa adada. Wawinyo ki i cwinywa ni Jehovah maro wan ducu dok bene mito ni wanong adwogi maber.” I nge bedo tye i gure mo bene i lobo Ireland, luot mo ma gia ki i lobo Germany gunyuto pwocgi pi kit ma kijologi ki dok kigwokogi kwede, kun giwaco ni: “Pwocwa madit atika cito bot Jehovah gin ki Kabaka Yecu Kricito. Gin gulwongowa me bedo i kin jo ma gunote kacel i woro me ada. Pe watye ka lok aloka i kom note man ento watye ka nongo  mitte nino ducu. Jami mutimme i gure man i Dublin, i lobo Ireland, bibedo ka poyo wiwa i kom mot madit ma watye kwede me tic kacel kwedwu pi Lubangawa madit-ti.”

18. Lapeny mene ma watwero penye kwede ma lubbe ki kit ma waloko kwede ki Jehovah?

¹⁸ Lurem pa jo moni doko tek ka ce gikubbe i kingi. I kare man ma diro me tet omedde i rwom ma lamal tutwal-li, dano mapol gimaro nywako lok ki lurem i intanet ki dok bene gitiyo ki cim me cwalo lok macego cego. Ento, tika wan ki acel acel bene wamaro lok ki Jehovah, Laremwa maber loyo ducu-ni? Ada, en aye ngat ma ‘Gamo lega-gu ducu.’ (Jab. 65:2) Tika wan walego bote kare ki kare?

19. Kony ango ma tye ka wanongo ni tek tutwal me tito gin ma i cwinywa bot Wonwa me polo?

¹⁹ Lutic mogo pa Lubanga ginongo ni tek me tito kit ma giwinyo kwede ki i cwinygi. Ento, man aye gin ma Jehovah mito ni watim ka walego bote. (Jab. 119:145; Koko 3:41) Pud watwero nongo kony kadi bed wanongo ni tek tutwal me tito gin ma i cwinywa. Paulo ocoyo bot Lukricitayo me Roma ni: “Pe wangeyo lego Lubanga i kit ma myero waleg kwede, ento cwiny kikome bako doge ma ka-kawa, kun cur lalingling. Ngat ma ngiyo cwiny dano ngeyo tam pa cwiny maleng, pien cwiny maleng bako doge pi jo pa Lubanga kun lubo gin ma Lubanga mito.” (Rom. 8:26, 27) Lwodo ki i cwinywa lok ma kicoyo i bukke mogo me Baibul calo Yubu, Jabuli ki dong Carolok bikonyowa me tito bot Jehovah gin ma tye okanne i cwinywa.

20, 21. Lok ma Paulo ocoyo i Jo Pilipi 4:6, 7 kweyo cwinywa nining?

²⁰ Ka watye i peko ma odiyowa woko, omyero waket i tic tira ma Paulo omiyo bot jo Pilipi ni: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene.” Kubbe ma kit man ki Laremwa maber loyo ducu-ni bikweyo cwinywa. Paulo ocoyo ni: “Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.” (Pil. 4:6, 7) Omyero wabed ki pwoc kare ducu pi “kuc pa Lubanga” ma gwoko cwinywa kacel ki tamwa-ni.

²¹ Lega konyowa me dongo lirem i kinwa ki Jehovah. Pi man, omyero dong ‘waleg Lubanga ma pe wakeng.’ (1 Tec. 5:17) Pwony man myero ojing wat ma tye i kinwa ki Lubanga ki dok mitiwa me lubo cikke. Wacwalu wunu kare me lwodo lok i kom mot ma watye kwede pien Jehovah aye Wonwa, Lubangawa, ki dong Laremwa.