Tika Ibigeno Lubanga?

GO KONG ni itye ki laremi mo ma igeno adada, ento en otimo gin mo ma pe itwero niang iye. Jo mukene gikok i kome dok gingolo kop i wiye kun giwacci laremi-ni cwinye col. Tika ibirune me ye lokgi, kece ibikuro wang ma iwinyo lok pa laremi-ni? Ka laremi-ni onongo pe tye me tito gin mutimme, tika ibidiyo cwinyi kun pe ingolo kop i wiye cutcut?

Ma pud peya igamo, omyero kong ibed ki ngec muromo. Itwero penye kekeni ni, ‘Tika atye ki ngec muromo i kom larema-ni, ki dok gin ango mumiyo agene adada?’ Opore me penye kumeno. Ento, tam kong: Ma pud peya wangolo kop i wi Lubanga ni en cwinye col, pe kong omyero mono wapenye ki kodi lapeny acel-li?

Itwero nongo ni tek tutwal me niang jami mogo ma Lubanga otimogi, nyo gin mumiyo oweko gutimme. Kit ma gutimo kwede, tye jo mapol ma gibiwacci ni Lubanga cwinye col kun gicuko cwinyi ni ingol kop i wiye ma lubbe ki gin mumiyo en timo jami mogo. Tika ibidiyo cwinyi i kom Lubanga kun pe ingolo kop i wiye cutcut wang ma inongo ngec muromo? Lagamme jenge i kom ngec muromo ma itye kwede i kom Lubanga. Omyero bene itam i kom jami mabeco ma Lubanga otimo boti.

Ka ce ikato ki i kwo matek, cwinyi romo bwoli me wacci Lubanga pe obedo laremi matwal. Ento tam kong manok. Lubanga aye mono oweko kwoni obedo tek, nyo kece omini jami mabeco? Kit ma dong waneno kwede, Catan aye “lalo lobo man,” ento pe Jehovah. (Jon 12:31) Pi meno, Catan aye okelo can mapol ma dano gitye ka denone-ni ki ngolo kop alenga i loboni. Tika bene iye ni roc ma watye kwede kacel ki jami mogo ma gingolle atura giweko wadeno can?

Gin ango ma Lubanga obedo ka timone? Tam kong i kom gin ma Baibul waco: Lubanga aye ngat “muketo polo ki lobo”; ticce bene kwako kit ma en ocweyo kwede komwa i yo me “aura”; ki dok bene ni Jehovah aye “Lubanga ma omiyo kwo ki yweyo boti-ni.” (Jabuli 124:8; 139:14; Daniel 5:23) Man ducu te lokke ngo?

Man te lokke ni waywe dok wakwo pien en aye Lacwecwa. (Tic pa Lukwena 17:28) Man bene te lokke ni mic me kwo, lobo man ma nen mwonya-ni, yomcwiny ma bedo ki lurem keliwa, yomcwiny me camo dek, mako cing jo ma wamarogi, winyo wer, ki dong ngweyo ngwec ature​—magi ducu gubedo mic mua ki bot Lubanga. (Yakobo 1:17) Tika pe iye ni mic magi ducu ginyuto ni en Larem ma opore me nongo worowa kacel ki genwa?

Kadi bed kumeno, itwero nongo ni tek me geno Lubanga. Gwok nyo itamo ni ipe ki ngec muromo i kome wek igene. Man niange. I pwony magi, pe waromo nyamo jami ducu mumiyo dano giwacci Lubanga cwinye col. Ento, itamo ni pe opore me medo ngecci i kom Lubanga? * Watye ki gen ni ka itimo kumeno, ci ibinongo ngec me ada i kom Lubanga. En tika cwinye col? Ma ka meno, “Lubanga aye mar.”​—1 Jon 4:8.

[Lok ma tye piny]