1, 2. I dyewor me agikki ma Yecu okwo kwede i lobo, pwony ango ma en omiyo bot lukwenane?

 OBEDO i dyewor me agikki ma Yecu okwo kwede i lobo, dok en onongo tye ki lukwenane i kicika ma malo i ot mo i Jerucalem. I kare ma gitye ka cam i otyeno, Yecu oa malo ki i dog cam, okwanyo taulo ci otweyo i pyere. Oonyo pii i becen ci ocako lwoko tyen lupwonnyene kun dunyo ki taulo. I nge tyekone, en odok obedo piny. Pingo Yecu otimo tic man ma opii aye onongo myero otim-mi?​—Jon 13:3-5.

² Yecu openyogi ni: “Wuniang gin ma atimo i komwu?” En omedde ni “Ka an a Rwotwu ki Lapwonywu, alwoko tyenwu, wun bene myero wulwok tyenwu kekenwu; pien an anyuttiwu lanen, wek wun bene wutim gin ma an atimo i komwu.” (Jon 13:12-15) Pien omine kene me timo tic ma opii aye myero otim, Yecu opwonyo lukwenane gin mo ma myero gumak liking i wigi dok ma onongo bikonyogi me bedo jo mamwol i anyim.

3. (a) Tyen aryo kulu, Yecu onyuto nining ni mwolo pire tek? (b) Gin ango ma wabinyamo ipwony man?

³ I kare ma Yecu olwoko tyen lukwenane, meno pe obedo tyen me acel ma en onyuto kwede ni mwolo pire tek. Con kong, ma lukwenane mogo gunyuto cwiny me laro dito, Yecu ocibo latin matidi i dyergi ci owaco botgi ni: “Dano ducu ma jolo latin man i nyinga, nongo ojolo an, dano ducu ma jolo an, nongo ojolo ngat ma oora; pien ngat matidi twatwal i kinwu ducu, en aye ngat madit.” (Luka 9:46-48) Pien en onongo ngeyo ni Luparicayo gimaro bedo ludito, Yecu owaco lacen  i kare ma tye i ticce me pwony ni: “Ngat ma kette kene ni edit, gibidwoke piny, ngat ma mwolle kene gibimiye doko dit.” (Luka 14:11) Ada, Yecu mito ni lulub kore gumwolle kun pe giwakke nyo giger. Pien wamito lubo lanene, kong wanyamu lanen maber me mwolo ma en oweko. Wabineno bene kit ma mwolo konyo kwede ngat ma tye ka nyutone-ni ki dong jo mukene.

4. Wod acel keken pa Lubanga onyuto mwolo nining i kare ma tye i polo?

⁴ Wod acel keken pa Lubanga-ni onyuto mwolo kadi wa i kare ma tye i polo. Ki i polo kunnu, Yecu okwo gin ki Wonne pi mwaki mapol ata. Buk pa Icaya oloko i kom wat macok ma onongo tye i kin Wod gin ki Wonne ni: “Rwot Lubanga dong opwonya i lok ma myero aloki, wek ange lok ma miyo teko bot dano ma ool. En coya woko ki i wang nino kare ducu odiko, en coya [wek] awiny gin ma en pwonya kwede. Rwot Lubanga dong otyeko yabo ita woko, pe ajemo, pe bene alokke ngeya.” (Ic. 50:4, 5) Wod pa Lubanga onyuto cwiny me mwolo dok oketo cwinye me winyo pwony pa Jehovah. Kome onongo mit dok tye atera me nongo pwony ki bot Lubanga me ada. Yecu pud dong oneno maber adada lanen me mwolo pa Jehovah i kit ma en timo ki kica bot dano ma lubalo!

5. Yecu onyuto lanen maber me mwolo nining me cobo tele ma obedo i kin en ki Larac-ci?

⁵ Pe ni lumalaika ducu ma i polo onongo gimwol calo Wod acel keken pa Lubanga. Ma ka yeni Jehovah opwonye, lamalaika ma odoko Catan Larac-ci oweko cwiny me awaka ki dong bedo ladit omiyo en ojemo i kom Jehovah. Kitungcel, Yecu onongo pe ki miti me bedo ki twero madit i polo nyo tic ki twerone i yo marac. En macalo Mikael, ladit wi lumalaika, Yecu pe ongwette me tic ki twerone me ‘lweny ki Catan kun pyem kwede pi kom Moses.’ Ma ka meno, Wod pa Lubanga onyuto cwiny me mwolo. Cwinye obedo yom ni eweko jami ducu i cing Jehovah, Langolkop Madit ma loyo polo ki lobo, ni En aye ocob lokke i karene ki cawane.​—Kwan Juda 9.

6. Macalo Meciya, Yecu onyuto mwolo nining i kare ma en oye tic ma kimiye i lobo?

⁶ Jami mukene ma Yecu opwoyogi i kare ma en pud tye i polo kwako lok mapol ma lunebi gutito ni bitimme i kwone macalo Meciya. Pi meno, en nen calo onongo dong ngeyo ni ebideno can ka ebino i lobo. Kadi kumeno, en oye tic ma kimiye me atima i lobo ki dok me to macalo Meciya ma kiciko pire. Pingo? Kun tito pi mwolo ma Wod acel keken pa Lubanga onyuto, lakwena Paulo ocoyo ni: “Kadi bed en onongo tye i cal pa Lubanga kikome, ento en pe oridde ki tek me bedo rom ki Lubanga. Oweko meno ducu, ci okwanyo kit me opii, ka ginywale macalo dano.”​—Pil. 2:6, 7, NW.

7, 8. I yo ango ma Yecu onyuto kwede mwolo i kare me tinone ki dong ticce me pwony?

⁷ “Ka dong okatti macalo dano, omwolle woko gire kene, obedo lawiny nio wa i to, nio bene wa i to i kom yatariya [“yat,” NW].” (Pil. 2:8) Cakke i kare me tinone, Yecu owekiwa lanen  me mwolo. Kadi bed ni lunyodo ma gitye ki roc aye gupite, Yucepu gin ki Maliam, Yecu onyuto mwolo kun “winyogi.” (Luka 2:51) Man pud dong tye lanen maber pi jo matino, pien Lubanga biminigi mot ka giwinyo lunyodogi!

⁸ Ma dong odoko dit, Yecu onyuto mwolo kun keto timo miti pa Jehovah bedo mukwongo ento pe mitine. (Jon 4:34) I kare ma tye i ticce me pwony, Yecu Kricito otiyo ki nying Lubanga kun konyo dano me ngeyo kit mabeco pa Jehovah kacel ki Yubbe pi dano. Yecu bene okwo kun lubo gin ma en opwonyo madok i kom Jehovah. I lega ma en omiyo macalo lapor-ri, gin acel ma pire tek ma en owaco aye ni: “Wonwa ma tye i polo, giwor nyingi maleng.” (Mat. 6:9) Pi meno, Yecu opwonyo lulub kore ni guket pi lonyo nying Jehovah obed gin ma pire tek. En bene otimo kumeno. I kare ma en dong cok to, Yecu olego bot Jehovah ni: “Amiyo nyingi ongene botgi [lukwena], dok abimiyo ngene.” (Jon 17:26) Ki bene i ticce me pwony lung, Yecu odwoko pwoc bot Jehovah pi jami ducu ma etimo i lobo kany.​—Jon 5:19.

9. Gin ango ma Jekaria ocoyo ma lubbe ki Meciya, dok Yecu ocobo nining?

⁹ Jekaria ocoyo kuman ma lubbe ki Meciya ni: “Wubed ki yomcwiny madwong, wun jo Cion! Wugo kijira, wun jo Jerucalem! Wunen Kabakawu bino botwu; ki wayo me loyo lweny, kun obedo i wi kana ki mwolo, i wi latin kana.” (Jek. 9:9) Lok pa lanebi man ocobbe i kare ma Yecu odonyo i Jerucalem ma peya kwer me Kato oromo i mwaka 33 K.M. Lwak gupeto bongigi kacel ki jang yadi i dye gudo. Ada, gang ducu otugge woko pire i kare ma en odonyo iye. Yecu onyuto mwolo kadi bed ni lwak gupakke ni en Kabaka.​—Mat. 21:4-11.

10. Bedo lawiny pa Yecu nio wa i to-ni onyuto gin ango?

¹⁰ Yecu Kricito obedo mwol dok lawiny i lobo kany nio wa i tone i kom yat. En onyuto  labongo akalakala ni dano adana-ni twero gwoko genene bot Jehovah kadi kiket atematema malit i kome. Yecu bene onyuto ni Catan twon lagoba i lokke ni dano gitiyo pi Jehovah pien en konyogi. (Yubu 1:9-11; 2:4) Pien en owinyo Wonne, Kricito oilo malo twero me loc pa Jehovah. Nen calo oyomo cwiny Jehovah i kare ma en oneno ka Wode cung matek kun gwoko genene.​—Kwan Carolok 27:11.

11. Ginkok pa Yecu Kricito omiyo gen ango bot jo ma lugen?

¹¹ Pien en oto i kom yat, Yecu bene omiyo ginkok wek elar dano ki i bal kacel ki to. (Mat. 20:28) Man omiyo kare bot dano ma lubalo me kwo pi naka kun gitimo gin ma Jehovah mito. Paulo ocoyo ni: “Kit meno bene tic me kit ma atir pa dano acel okelo loyo kop ki kwo pi jo ducu.” (Rom. 5:18) To pa Yecu oyabo yo bot Lukricitayo ma kiwirogi me kwo i polo ki dong kwo ma pe tum i lobo kany pi “romi mukene[-ni].”​—Jon 10:16; Rom. 8:16, 17.

12. Yecu onyuto mwolo nining i kit ma en otero kwede dano ma gitye ki roc?

¹² Yecu olwongo jo ducu ‘muol ki ma yec onurogi’ me bino bote. En owacci: “Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu.” (Mat. 11:28, 29) Mwolo oweko Yecu onyuto kica dok pe obedo ki apokapoka i kit ma en tero kwede ki dano ma luroc. En onongo pe penyo lupwonnyene me timo gin makato kerogi. Yecu onongo pwoyogi dok cuko cwinygi. En pe oweko gutamo ni konygi pe. Yecu onongo pe ger nyo diyogi. Ento, en ominigi gen ni ka gubedo cok kwede dok gulubo pwonye, ci gibinongo yweyo pien yatte yot dok yecce bene pe pek. Man aye gin muweko co ki mon, lutino ki jo muteggi guwinyo agonya ka Yecu tye botgi.​—Mat. 11:30.

13. Yecu onyuto cwiny me kica nining i kom jo ma gitye ka deno can?

¹³ Ibedone kacel ki lutedero mogo i Icrael, kica omako Yecu i komgi pienni gin gudeno can dok en otute ki kerone ducu me konyogi. Cok ki gang me Jeriko, en orwatte ki latowang mo ma nyinge Bartimayo gin ki lawote ma pe kingeyo nyinge. Gin gubako doggi bot Yecu ni okonygi ento lwak gujukogi ni guling woko. Pud dong onongo yot bot Yecu me cayo lutowang magi! Ma ka meno, pi kicane, Yecu owacci kikelgi bote ci en oyabo wanggi. Ada, Yecu olubo lanen pa Wonne, Jehovah,  i nyuto mwolo kun nyuto cwiny me kica bot lubalo.​—Mat. 20:29-34; Mar. 10:46-52.

14. Adwogi maber ango ma obino pien Yecu onyuto cwiny me mwolo?

¹⁴ Yecu onyuto cwiny me mwolo ma man okelo yomcwiny ki adwogi maber. Cwiny Jehovah obedo yom me neno Wode ka mwolle itiyo mitine. Lukwena ki lupwonnye pa Yecu guwinyo agonya kwede pi mwolone ki i cwinye. Yecu omiyo gudongo i yo me cwiny pien onyuto lanen maber, opwonyogi, ki dong opwoyogi. Lutedero bene gunongo mot ki i mwolo pa Yecu pien en okonyogi, opwonyogi dok ocuko cwinygi. Ki lok ada, pi ginkok pa Yecu, dano ducu gibinongo mot ki iye pi naka.

15. Adwogi maber ango ma Yecu onongo ki i mwolone?

¹⁵ Ento Yecu kono? En tika onongo adwogi maber ki i mwolone? Ada, Yecu owaco bot lupwonnyene ni: “Ngat ma kette kene ni edit, gibidwokke piny.” (Mat. 23:12) Lok magi ocobbe ada i kom Yecu. Paulo otito ni: “Lubanga omiye [Yecu] dit ma malo twatwal, dok bene omiye nying ma tye malo makato nying mukene ducu, wek gin ducu ma tye i polo ki i lobo, kadi gin ducu ma tye piny i te lobo, gurum conggi piny me woro nying Yecu, leb ducu myero otuc bene ni, Yecu Kricito aye Rwot, kun kelo deyo bot Lubanga Won.” Pi mwolo pa Yecu kacel ki gwoko genene i lobo, Jehovah omiyo dit ma malo bot Wode kun miye twero ni olo cwec ducu me polo ki lobo.​—Pil. 2:9-11.

16. Gin ango ma nyuto ni Wod pa Lubanga bimedde ki nyuto mwolo i kare me anyim?

¹⁶ Wod pa Lubanga bimedde ki nyuto mwolo wa i kare me anyim. Kun tito kit ma Yecu bitic kwede i kom Lumonene ka tye Kabaka i Polo, laco jabuli owero ni: “Ring ngwec me loc kikome ki deyo ka lweny pi ada [“ki mwolo,” NW] dok pi gwoko kit ma atir; wek cingi malacuc otim tim ma kelo lworo.” (Jab. 45:4) Pi ada kacel ki gwoko kit ma atir, Yecu Kricito bingwec ki mwolo i lweny me Armagedon. Gin ango ma bitimme i agikki me Loc me Mwaka Alip Acel pa Meciya ka nongo en dong “otyeko turo kit loc ki twero ki tek ducu me cwiny”? En tika dok binyuto mwolo? Ngene kene, pien en ‘bimiyo ker i cing Lubanga Won.’​—Kwan 1 Jo Korint 15:24-28.

17, 18. (a) Pingo pire tek ni lutic pa Jehovah gulub lanen maber me mwolo ma Yecu oweko? (b) Gin ango ma wabinyamo ipwony ma lubo man?

¹⁷ Ento wan kono? Tika wabilubo lanen pa Yecu kun wabedo mwol? Tika Yecu Kricito, macalo Kabaka, bilarowa ka obino ka ngolo kop i Armagedon? Kit ma en bingwec kwede nyuto ni en bilaro jo mamwol dok kitgi atir. Man te lokke ni mwolo pire tek ka wamito bwot. Medo i kom meno, kit macalo mwolo pa Yecu Kricito okelo adwogi maber bote ki dong jo mukene-ni, mwolowa bene bikeliwa adwogi mapol.

¹⁸ Ngo ma bikonyowa me lubo lanen maber me mwolo ma Yecu oweko-ni? Wan waromo nyuto mwolo nining kadi bed warwatte ki pekki mapat pat? Lapeny magi kibigamogi ipwony ma lubo man.