TIKA in bene itamo ni camucana pud bimedde dok pe bigik? Ka itamo kumeno, lworo ma kit meno gire pe rac. Cakke ma naka yam, dano gutemo gamente mapat pat. Ento, inongo ni pe gumedo ki jwayo camucana matwal kadi matidi mo. Tika waromo bedo ki gen ni olo nino mo camucana bigik?

Lagamme tye ni eyo, kit ma Baibul tito kwede! Baibul wacciwa ni Lubanga bijwayo camucana woko matwal ki i lobo-ni. En bitimo man nining? En bitic ki Ker-re, gamente me polo ma bikelo alokaloka i lobowa-ni. Man aye Ker ma Yecu opwonyo lulub kore me lega pire-ni. I lega ma bene i kine mogo kilwongo ni Lega pa Rwotwa nyo Wonwa ma Tye i Polo-ni, Yecu owaco ni: “Ker meri obin; giti gin ma imito i lobo.”​—Matayo 6:10.

Ma lubbe ki Yecu Kricito ma en aye Laloc me Ker-ri, Baibul wacciwa ni: “En laro dano ma piny obwoyo ka okok bote, konyo lucan ki jo ma pe gitye ki ngat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo. En kokogi ki i tim bwami ki i un ma gibedo ka unogi kwede; kwogi pire tek bote ma pe wacce.” (Jabuli 72:12-14) Tyeng man nyuto ni kica mako Yecu i kom jo ma camucana ogudogi, dok en bikonyo jo ma kiunogi! Man tye me kwe cwiny adada.

Pien Ker pa Lubanga nongo tye i cing Laloc matek dok ma lakica, Ker-ri bijwayo camucana matwal ki i lobo-ni. Bitimo man nining? Ker-ri bikwanyo jami adek ma gikelo camucana.

I kare-ni, wan ducu myero walweny ki cwiny me bal ma kinywalowa kwede, cwiny man weko watimo gin marac. (Jo Roma 7:21-23) Kadi bed kit meno, pud tye jo ma cwinygi atir ma gimito timo jami mabeco. Gin giketo niye i kom ginkok pa Yecu dok kiromo timigi kica pi balgi. * (1 Jon 1:7, 9) Jo man ginongo adwogi maber ki i mar madit ma pud dong loyo ma Lubanga onyuto kit ma kicoyo kwede i Jon 3:16: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”

Pi jo ma lugen, Lubanga bitimo gin mo mamwonya  adada pigi. I lobo manyen ma tye ka bino-ni, en bijwayo bal ducu kun motmot weko jo ma lugen gibedo labongo roc dok nongo gitye ki kit ma atir. (Icaya 26:9; 2 Petero 3:13) Cwiny me bal pe dong biweko dano mo bedo lacamucana. I te Ker pa Lubanga, jo ma lugen ‘gibigonyogi woko ki i opii me bedo gin ma top.’​—Jo Roma 8:20-22.

Tye me cwer cwiny ni i kare-ni, dano mapol ginywaro luwotgi. Ginywaro jo ma rwomgi lapiny kacel ki lucan dok bene gibito jo mukene me donyo itim me camucana. Baibul ciko jo ma kit meno ni: “Latim marac myero obwot timme marac, ki dano ma pe kite atir bene owek tamme ma pe ber-ri.” Ka lucamucana-ni gungut, Baibul owacci Lubanga ‘biweko balgi woko ducu.’​—Icaya 55:7.

Ento, Lubanga bityeko jo ma guding ma pe gimito lokke me timo gin maber. Pien Lubanga bitic ki Ker-re, cikke man ma tye i Baibul-li wang ma ocobbe: “Gen Rwot [Jehovah], * lub yo mere . . . yin ibino neno kite ame jo areco to kede.” (Jabuli 37:34, Baibul me leb Lango) Ka dong jo maraco kityekogi woko ducu, adwogi marac ma camucana kelo pe dong bigudo jo ma lugen ma giworo Lubanga.

Catan Larac-ci aye pud dong labal loyo lubal ducu. Cwinywa pud dong yom ni cokcok-ki Jehovah bigengo Catan wek pe dok obwol dano. Ka i ngeye, Lubanga bineke woko matwal. Dok bene lamone man ma kite rac-ci pe dong biweko dano gibedo lucamucana.

Oromo bedo ni tam man ni Lubanga bijwayo jami ducu ma kelo camucana-ni obedo lek ki boti. Iromo penye kekeni ni, ‘Lubanga tika ada twero kelo alokaloka ma kit man? Ka twero, ci pingo en pe otimo wacon?’ Magi lapeny mabeco dok Baibul miniwa lagam mucwiny. * Wakwayi me ngiyo piri keni gin ma Baibul pwonyo ma lubbe ki kare me anyim, ka nongo dong camucana pe matwal.