Abraim Laco Ma Obedo Ki Niye

Abraim ocung woko i dyewor ma piny oling dok opye mot. I kare ma tye ka neno lakalatwe ma i dan polo, en ocako tamo pi cikke ma Lubanga ociko ni likwaye bibedo pol calo lakalatwe meno. (Acakki 15:5) Bot Abraim, lakalatwe meno onongo gipoyo wiye i kom cikke pa Jehovah. Onongo gimiyo Abraim bedo ki gen. Tam kong, ka Jehovah tye ki teko me cweyo polo ki lobo wa ki jami ducu ma tye igi, ci en mono pe romo miyo kero bot Abraim gin ki Cara wek gunywal latin? Meno aye kit niye ma Abraim obedo kwede.

NIYE OBEDO GIN ANGO? Kit ma kitiyo kwede i Baibul, “niye” te lokke ni ye i kom gin ma pe nen ento nongo ojenge i kom lanyut ma tye. Dano ma tye ki niye i kom Lubanga keto cwinye i kom cobbe pa cikke pa Jehovah, kun bedo ki gen calo iwacci dong cikke meno ocobbe woko.

ABRAIM ONYUTO NIYE NINING? Abraim onyuto ni eye cikke pa Lubanga. Pi niye, Abraim oweko lobo tugi ma kinywale iye, kun bedo ki gen ni Jehovah bicobo Cikkene me nyuto bote lobo mukene. Pi niye, Abraim obedo macalo welo i lobo Kanaan, kun geno ni likwaye wang ma gucamo lobo meno. Dok pi niye, Abraim otemo tyero wode, kun bedo ki gen ni Jehovah tye ki twero me cero Icaka woko ki i kin jo muto.​—Jo Ibru 11:8, 9, 17-19.

Abraim oketo cwinye i kom gin ma anyim ento pe gin mukato. Kadi bed ni Abraim gin ki Cara onongo gubedo ka kwo kwo me lonyo i Ur ka i poro ki me can i Kanaan-ni, gin pe “gubedo ka tamo pi lobo ma yam gin gua ki iye ca.” (Jo Ibru 11:15) Ma ka meno, gin gubedo ka paro pi kit ma Lubanga biminigi mot kwede ki dong likwayogi i kare me anyim.​—Jo Ibru 11:16.

Abraim tika onongo tye ki tyen lok matir me bedo ki niye? Meno ngene kene. Jehovah ocobo cikkene ducu ma en ociko. Likwayo pa Abraim gunya gudoko pol dok matek, rok me Icrael. Lacen, Luicrael gubino gubedo i Kanaan, en ngom ma Jehovah ocikke pire bot Abraim-mi.​—Yocwa 11:23.

PWONY ANGO MA WANONGO? Watwero bedo ki gen ni Jehovah bicobo cikkene ducu. Kadi bed ni mukene pe twere ki bot dano, ento wageno ni ki bot “Lubanga jami ducu twere.”​—Matayo 19:26.

Lanen pa Abraim-mi bene pwonyowa pe me keto cwinywa i kom jami mukato angec, ento i kom jami ma wabinongo i anyim. Meno aye gin ma laco mo ma nyinge Jason opwonye me  timone. Two mo marac ma kweyo dano omake ma oweko en okwe woko. Jason owacci: “Omyero aye ni i cawa mukene acako paro jami mukato angec.” En omedo ni: “Jami mogo matino tino aye dong aparo loyo, calo gwako kor Amanda dakona.”

Ento, Jason tye ki niye matek ni Jehovah bicobo cikkene ducu, ma man kwako loko lobowa-ni me doko paradic ki dok ni jo ma lugen kibiminigi kwo ma pe tum kun gibedo ma komgi yot. * (Jabuli 37:10, 11, 29; Icaya 35:5, 6; Niyabo 21:3, 4) Jason owaco ni: “Abedo ka poyo wiya kekena ni kwo maber loyo pud tye anyim.” En otito bene ni: “Cokcok-ki olo, par, cwer cwiny ki dong poto cwiny​—jami magi ducu gibibedo pe matwal.” Calo Abraim, man pud dong tye lanen maber adada me niye!

[Lok ma tye piny]