Nong Pwony Ki I Lok Pa Lubanga

Gen Mo Tika Dok Tye pi Jo Muto?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Gen ango ma tye pi jo muto?

I kare ma Yecu oo i Betania ma tye cok ki Jerucalem, lareme Lajaro onongo dong oto orii pi nino angwen. Yecu ocito ka ma kikano iye kom lyel gin ki Marita kacel ki Maliam, lumegi Lajaro. Inge cawa manok keken, dano mapol gugure kenyo. Tika itwero tamo yomcwiny ma Marita gin ki Maliam gubedo kwede i kare ma Yecu ocero omingi?​—Kwan Jon 11:20-24, 38-44.

Marita onongo tye ki gen ni jo muto gibicerogi. Lutic ma lugen pa Jehovah gungeyo wacon ni i anyim, Lubanga bicero jo muto wek gukwo i lobo.​—Kwan Yubu 14:14, 15.

2. Jo muto gitye nining?

Kadi bed teko mo me kwo nyo “yweyo me kwo” weko dano kacel ki lee gibedo makwo, wan pe watye ki tipo mo ma pe to ma medde ki kwo i kabedo mukene i nge to. (Latitlok 3:19; Acakki 7:21, 22) Wan watye ginacweya ma kicweyowa ki apwa me ngom. (Acakki 2:7; 3:19) Ka adamwa oto, tamwa bene rweny woko. Pi meno, i nge cero en, Lajaro pe owaco gin mo keken mutimme i kare ma en oto pien jo muto pe gingeyo gin mo.​—Kwan Jabuli 146:4; Latitlok 9:5, 10.

Nen ka maleng ni, jo muto pe gitwero deno can. Pi meno, pwony ni Lubanga uno dano i nge to-ni tye pwony goba. Meno balo nying Lubanga. Lok man me wango dano i mac-ci winyone pe mit bote wacel.​—Kwan Jeremia 7:31.

 3. Tika watwero lok ki jo muto?

Jo muto pe gitwero lok. (Jabuli 115:17) Ento ka lumalaika maraco giloko ki dano, gin gibwologi ni gibedo tipo pa ngat mo muto. (2 Petero 2:4) Jehovah ogengo ni pe myero ki tem lok ki jo muto.​—Kwan Nwoyo Cik 18:10, 11.

4. Anga ma kibicerogi?

I lobo manyen ma tye ka bino-ni, dano milion mapol ata ma gitye i lyel kibicerogi. Kadi wa jo ma gutimo jami maraco pienni onongo pe gingeyo Jehovah kibicerogi bene.​—Kwan 2 Petero 3:13; Tic pa lukwena 24:15.

Jo ma kibicerogi-ni gibipwonyo lok ada ma dok i kom Lubanga ci ginyutu niye i kom Yecu kun giwinyo lokke. (Niyabo 20:11-13) Jo ma gibicer ci gitimo jami mabeco gibinongo mit pa kwo pi naka i lobo. Ento, jo mukene i kin jo ma kicerogi-ni gibimedde ki timo jami maraco. Nicergi bibedo “cer me ngolo kop.”​—Kwan Jon 5:28, 29.

5. Nicer nyutiwa gin ango i kom Jehovah?

Nicer twere pien Lubanga ocwalo botwa Wode wek oto piwa. Man obedo kica ki mar ma Jehovah onyutu.​—Kwan Jon 3:16; Jo Roma 6:23.

Pi ngec mukene, nen dul me 6 ki 7 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.

[Cal ma tye i pot karatac 22]

Adam kicweyo ki i apwa