Tam kong i kom wat ma pud dong cok loyo ma dano aryo gitwero bedo kwede​—wat i kin rudi. a Gitye ki wat mo macok adada. Nancy Segal, ngat ma loyo ka kwano lok i kom rudi, dok en kikome bene obedo latin rudi owaco ni rudi mogo “giniang lok ducu i komgi kekengi maber loyo ngat mo keken.” Dako mo acel ma obedo rudi oloko i kom wat ma tye i kin en ki laminne kit man ni: “Angeyo jami ducu i kome, en bene ngeyo jami ducu i koma.”

Ngo ma miyo lutino rudi gitye ki niango ma kite dok pat i kingi? Lukwed lok giwaco ni gin ma weko rudi magi gibedo cok tutwal pe kabedo ma orumogi kacel ki lunywalgi keken, ento DNA ma tye i remogi. b

TAM KONG: Ngat ma ocweyo DNA mamwoya-ni, ngeyowa maber adada ma loyo dano mo keken. Man aye ma oweko Daudi ocoyo i jabuli ni: “Yin en ame icwea iyi totta. Yin ingeo kite ame cogo koma okukuba kede lung, i kare ame ocwea iyi totta, i kare ame ocweo koma i mung. . . . Ineno koma kede wangi kun mom ru ocweo otum, dul koma acel acel tye ocoo oko i bukki.” (Jabuli 139:13, 15, 16; Lango Baibul) Lubanga kene aye ngeyo dok niang kit ma ecweyowa kwede ki bene jami ducu ma timme i kwowa. Kit macalo Lubanga ngeyowa i yo matut tutwal-li, man cuko cwinywa ni en ada niang jami ducu madok i komwa.

Daudi olego ni: “Ai Rwot [Jehovah], in dong ingiyo kwona ci ingeya woko! Kadi abedo piny nyo kadi aa malo, in ingeyo; iniang tamma woko ki ka mabor. Kadi ma peya aloko lok mo, nen, ai Rwot, in dong ingeyo lok ma abiloko ducu.” (Jabuli 139:1, 2, 4) Medo i kom meno, Jehovah “ngiyo cwiny dano ducu, dok ngeyo gin ma cwiny dano yubo ducu ki tamme ducu.” (1 Tekwaro 28:9; 1 Camuel 16:6, 7) Tyeng magi nyuto gin ango i kom Lubanga?

Kadi bed pe watito maber kit ma wawinyo kwede ka watye ka lega bot Lubanga, ento Lacwecwa pe neno gin ma watimo keken ento bene niang tyen lok mumiyo watimo. Medo i kom meno, en niang jami mabeco ma cwinywa mito timone, kadi bed gorowa twero gengowa woko ki timone. Ki lok ada, pien Lubanga aye ma oketo mar i cwinywa, en tye atera​—dok ki miti—​me niang maber tamwa kacel ki mitiwa.​—1 Jon 4:7-10.

 Ginacoya cuko cwinywa ni

• “[Jehovah] neno jo ma kitgi atir, dok ciko ite, winyo legagi.”​—1 PETERO 3:12.

• Lubanga bene ocikke ni: “Abipwonyi dok abicimmi yo ma myero ilubi; abimiyi ryeko dok abineni.”​—JABULI 32:8.

Tika bedo ki ngec ni Lubanga niang kwo ma wakato ki iye ki kit ma wawinyo kwede twero konyowa me kanyo peko? Tam kong i kom gin mutimme i kom laminwa Anna, ma a ki i lobo Nigeria. En otito ni, “Kwo matek ma akato ki iye oweko abedo ka pennye kekena ka omyero amedde ki bedo kwo. I nge to pa cwara, onongo atye ka twoyo latin anyakana ma tye ki two ma kwoto wi lutino (hydrocephalus) i ot yat, ci an bene kinongo ni two kanca omako cakka. Pi man, kiyanga, medo i kom meno kimina yat matego (chemotherapy). Obedo tek ma pe wacce me bedo latwo ma kigama i wi kitanda kun kitungcel nyara bene tye i wi kitanda.”

Ngo ma okonyo Anna me kanyo pekone? En owaco ni: “Abedo ka lwodo ginacoya calo Jo Pilipi 4:6, 7, ma wacci ‘kuc pa Lubanga ma kato ngec pa jo ducu gwoko cwinywu ki tamwu maber.’ Kare ducu ka atamo i kom tyeng man, awinyo ni atye ki wat macok adada ki Jehovah pien en ngeya maber makato kit ma an angeye kweda kekena. Anongo cuko cwiny madwong adada ki bot omegi ki lumegina me cwiny ma i kacokke pa Lukricitayo.”

“Kadi bed ni pud atye ka yelle, ento yotkoma ki yotkom nyara dong tye maber ber. Kit ma Jehovah tye tung botwa-ni, wapwonnye pe me bedo ki tam marac ka warwatte ki pekki. Yakobo 5:11 cuko cwinywa ni: ‘Jo ma yam guciro matek, walwongogi ni lugum kom. Wutyeko winyo bene kit macalo Yubu yam ociro kwede can, dok wuneno agikki me tic pa Rwot [Jehovah] i kome, kit ma Rwot won kica timo kwede ber bot dano.’ Jehovah oniang peko pa Yubu maber adada, dok watwero bedo ki gen ni en bene niang peko mo keken ma wakato ki iye.