WI DOREEN oballe adada i kare kinongo ni cware Wesley, ma tye ki mwaka 54 tye ki two kanca ma mako adam wic. * Ludaktari guwaco ni cware odong ki dwe manok keken me kwo. Doreen owaco ni: “Onongo pe atwero ye lokgi-ni matwal, koma okwe woko pi cabit mapol. Awinyo calo gin meno tye ka timme i kom ngat mo mukene, pe i kom cwara. Pe onongo ayubbe pire.”

Ki cwer cwiny madit, gin mutimme i kom Doreen-ni bene timme i kom jo mapol. Two malit twero mako ngat mo keken i kare-ni. Ki pwoc madit, jo mapol gidyere me gwoko jogi me amara ma gitye ki two malit. Ento gwoko lutwo pe yot. Gin ango ma lupaco gitwero timone me nongo kwe cwiny ki dok me gwoko jogi me amara ma gitwo? Gin ango ma jo ma gigwoko lutwo gitwero timone me lweny ki par ma gikemme kwede ka gitye ka gwoko ngat ma kome lit? Gin ango ma myero kiket i wic ka ngat ma kome lit dong cok to? Me acel, kong wanen pingo gwoko jo ma komgi lit pe yot i kare-ni.

Diro pa lucayan dok olo omedo wel mwaka pa dano. I cencwari mukato angec, kadi wa i lobe ma dong odongo, dano onongo pe girii calo i kare-ni. Dano onongo gito oyotoyot adada ki two nyo can ma poto atura. Onongo tek ada me nongo kony ki i ot yat, ki bene lutwo mapol onongo jo ganggi aye gwokogi dok bene gito ki gang.

I kare-ni, yadi dong tye mabeco dok man okonyo ludaktari me lweny ki two mogo ki dok me medo kare ma kwo pa dano. Two mogo ma onongo twero neko dano oyotoyot adada i kare macon dong i kare-ni ngat moni twero kwo ki two meno pi mwaki mapol. Kadi bed ngat moni twero kwo ki two moni pi kare malac, man pe nyuto ni two meno nongo dong ocang woko. Lutwo meno pol kare gibedo ki goro ma weko pe gitwero gwokke  pigi kengi. Gwoko jo magi odoko tek adada dok mito kero ki cawa malac.

Pol kare dano mapol dong gito ki i ot yat ento pe ki gang. Jo mapol pe dong gingeyo kit ma latwo canne kwede ki to, dok bene jo manok keken aye dong guneno kit ma ngat moni to kwede. Bedo ki lworo pi gin ma twero timme romo gengo ngat moni me gwoko ngat ma kome lit. Gin ango ma twero konye?

Kit ma otimme kwede i kom Doreen, dano mapol wigi nywene woko ka kinongo ni ngat mo ma gimaro tye ki two mo ma pe cang. Ngo ma twero konyi me yubbe pi gin ma twero timme i anyim kadi bed itye ki par, lworo ki dong cwercwiny? Latic mo pa Lubanga olego ni: “Pwonywa me kwano nino me kwowa, wek wabed ki cwiny me ryeko.” (Jabuli 90:12) Leg matek bot Jehovah wek ‘opwonyi kit me kwano nino me kwoni’ ki ryeko wek iti ki kare ma idong kwede me bedo ki joni me amara i yo maber loyo.

Man mito goyo pulan maber. Ka ngat ma kome lit twero lok dok tye ki miti me lok, ci bedo me ryeko me penye anga ma myero omok tam pire ka en dong pe twero timo meno. Wulok i kom gin ma en mito, ka ce myero gikete i macin ka en dong pe twero yweyo pire kene, ka mitte ni kigwokke i ot yat, nyo yat ma mito ni kiti kwede, man twero jwiko lanywen i kinwu dok weko cwinyi pe ngoli kop kace in aye ma imoko tam pi latwo ma dong pe twero yweyo pire kene. Nyamo lok meno con ki tito tam ka maleng twero konyo jo me ot moni me keto tamgi i gwoko latwo. Baibul waco ni: “Yub mo ma giyubo labongo nongo tam muromo pe twero cobbe maber.”​—Carolok 15:22.

Pol kare gin ma pire tek ma lagwok latwo twero timone aye me kweyo cwiny latwo meno. Mitte ni gicuk cwiny ngat macok to wek onge ni gimarre dok ni en pe tye kene. Itwero timo meno nining? Kwan bukke nyo wer wer, yer bukke nyo wer ma twero jingo cwiny dok ma en maro. Jo mapol cwinygi kwer ka jo me gang gimako cingi dok giloko kwedgi mot ki mwolo.

Bedo ber ka lagwok latwo nyuto wele ma gibino bot latwo wek ongegi. Kwed mo acel waco ni: “It ngat moni aye to me agikki. Latwo moni pud twero winyo lok kadi bed nen calo onino, pi meno gwokke ki waco lok mo ka itye ka ngete ma pe itwero wacone ka wange twolo.”

Ka twere wuleg kacel kwede. Baibul tito ni i kare mo lakwena Paulo kacel ki luwote mogo onongo  gitye i lyeto magwar, dok kwogi bene onongo tye ka mading. Kony ango ma gin guyenyo? Paulo owaco bot lureme ni: “Myero wuribbe kwedwa i lega.” (2 Jo Korint 1:8-11) Twero bedo me kony adada ka ilego ki cwinyi ducu i kare ma wutye ki par matek nyo i kare ma kom latwo lit adada.

Wabedo ki cwercwiny matek adada ka waniang ni ngat ma wamaro cok to. Man pe tye me ur pien onongo pe kicweyowa ni wato. Pe kicweyowa ni myero waye to calo gin ma jwi ma timme i kwo pa dano ducu. (Jo Roma 5:12) Lok pa Lubanga lwongo to ni “lakwor.” (1 Jo Korint 15:26) Pi meno, obedo gin ma niange ka cwinywa cwer ka watamo i kom to pa ngat ma wamaro, dok bene meno timme i kom dano ducu.

Kadi bed kumeno, byeko gin ma romo timme i kom jo me gangwa twero jwiko lworo dok konyowa me timo gin mo keken ma watwero wek latwo obed agonya. Kiryeyo jami mogo ma twero timme i kom latwo i bok ma wiye tye ni “ Kare me Agikki me Kwo.” Ki lok ada, pe jami ma kiryeyogi-ni ducu timme kit ma kinyuto kwede. Ento, olo to jami mogo i kingi timme i kom lutwo mapol.

Ka ngat ma wamaro oto, bedo me ryeko me kubbe ki lurem macok ma onongo con guye me miyo kony. Jo ma gubedo ka miyo kony kacel ki jo me gang myero kijing cwinygi ni arem pa ngat ma gimaro-ni dong ogik woko, dok pe dong tye ka deno can mo. Lacwecwa cuko cwinywa ki mar ni “jo ma dong guto woko pe gingeyo gin mo.”​—Latitlok 9:5.

Pire tek ni wajenge i kom Lubanga pe i kare ma two tye matek keken ento bene i kare me kumo i nge oto. En twero konyi kun tiyo ki lok kacel ki tic pa jo mukene. Doreen owaco ni “Apwonye pe me kwero kony pa ngat mo keken. Ki lok ada, kony ma kiminiwa onongo pol adada. Wan ki cwara wangeyo atir ni Jehovah aye ma onongo tye ka konyowa kun wacci, ‘An atye kwedwu me konyowu ki i peko man.’ Wiya pe biwil pi kony magi.”

Ada, Lubanga aye lagwokwa ma pire tek loyo. Macalo Lacwecwa, en niang arem kacel ki par ma watye kwede. En twero dok tye atera me konyowa kun cuko cwinywa me lweny ki pekkiwa. Maber dong loyo, en ocikke ni cokcok-ki, ebijwayo to ki pete tere ducu, ki dok me cero dano bilion ma guto ma wiye po i komgi. (Jon 5:28, 29; Niyabo 21:3, 4) Ci dong dano ducu gibiwaco lok ma lakwena Paulo ocoyo ni: “In to, locci dong tye kwene? In to, aremmi kono tye kwene?”—1 Jo Korint 15:55.