Rosie owacci, “Pol kare abedo ka paro jami ma peya otimme dok ki i tamma nongo peko magi gidongo adada.” Tyeng Baibul mene ma okonye? Acel i kingi aye Matayo 6:34: “Pe wubed ki par mapol pi nino ma diki, pien nino ma diki biparo pire kene.” Rosie owacci lok pa Yecu man okonye me weko paro pi jami ma twero timme diki. En omedde ni “Peko ma atye kwede onongo oromo koma woko ma pe mitte ni apar pi gin ma peya otimme nyo bene pe bitimme.”

Yasmine bene oniang ni par onongo tye ka bwoye woko. “I kare mukene onongo akok pi nino mapol, dok bene onongo pe atwero wa nino i dyewor. Abedo ka winyo calo tam maraco onongo dong tye ka bwoya woko.” Tyeng mene ma okonye? En oloko i kom 1 Petero 5:7: “Wuket parwu ducu i kome [Lubanga], pien en tamo piwu.” Yasmine owacci: “Ka kare woto ki kato, amedde ki lega bot Jehovah dok en ogamo legana. Awinyo calo kitingo yec mapek adada ki i wiya. Tam maraco-ni pud gibino i wiya kare mukene, ento dong angeyo kit me tyekone.”

Latin anyaka mo ma nyinge Isabella owacci: “Atamo ni cwiny me diro timo jami anyim tye i remowa pien babana bene tye ki cwiny meno. Ma ka tiyo jami ma pigi tego abedo mere mot ka neno telebijon. Man kwo marac adada pien medo par dok miyo dano pe tiyo tic maber.” Cik ma iye lac ma okonye tye i 2 Temceo 2:15, ma wacci: “Ket tek kit macalo itwero pi mine keni bot Lubanga macalo ngat ma gipwoyo, latic ma pe ki gin mo ma lewic myero omake iye.” Isabella owacci “Pe amito ni lewic omak Jehovah pi ticca ma pe atimo maber pien abedo ka diro timone con.” En dong kwone oyubbe maber adada.

Kelsey owacci: “I kare mukene nongo atye ki tic ma mito atima oyotoyot ento abedo ka dirone wang ma kare me timone dong pe. Man weko akok dok bene pe anino i dyewor kun abedo ka par. Kit kwo man onongo pe ber pira.” Kelsey onongo kony ki i Carolok 13:16: “Dano ma wiye tiyo cobo ticce ki ngec muromo, ngat ma laming bedo ka nyuto mingone ka maleng.” En otito kit ma tam i kom tyeng man okonye kwede: “Tye me ryeko me yubbe con wek icob ticci. I kare-ni atye ki buk ma acoyo iye jami ma mito atima ma agwoko i ka ticca, man konya weko pe abedo ka diro jami ma mito atima con.”

Kirsten owaco ni, “Cwara oa oweka woko kacel ki lutino angwen matino.” Cik mene ma iye lac me Baibul ma okonye? Carolok 17:17 kwane kit man: “Ngat ma larem bedo ki mar i kare ducu, ki dano ginywalo me nywako peko ki omegine.” Kirsten onongo kony ki i kacokke bot jo ma woro Jehovah calo en. En onongo kony ango? “Lurema gukonya i yo mapol adada! I kare mukene gitenyo jami acama ki ature i nyim doggolana. Ki dek kulu ma lurema mapol gukonyo an ki lutinona me dak i kabedo mapatpat. Ngat acel i kingi okonya me nongo tic. Lurema gumiya kony i kare ducu ma amito kony.”

Delphine, ma waloko i kome i pwony mukato-ni bene onongo winyo calo etye kene. Wiye po i kom kare ma en orweyo jamine ducu: “Abedo ka neno kit ma jo mukene gitye ka kwo maber kun kitung bota kwona onongo tye matek dok bene iya pe yom. Onongo awinyo calo adong kena.” Tyeng acel ma okonye aye Jabuli 68:6: “Lubanga miyo paco bot jo mudong kengi ma piny oloyo, wek gubed iye.” En otito ni: “Onongo angeyo ni tyeng man pe tye ka lok i kom gang kikome i kare-ni. Ento aniang ni Lubanga miniwa gang me cwiny ka ma wanongo iye kwecwiny, ki lurem ma gimaro Jehovah. Onongo angeyo ni pe atwero bedo cok ki jo mukene ka pe atye ki wat macok ki Jehovah. Jabuli 37:4 okonya timo meno, ‘Bed ki yomcwiny i [Rwot] Jehovah, ci en bimiyi gin ducu ma cwinyi mito.’”

En odolo te lokke ni: “Aniang ni meno myero amok liking i kom Jehovah. En pe ki roc mo keken. Ci acoyo piny jami ma amaro timone kacel ki jo mukene wek amak lirem kacel ki jo ma gimaro Jehovah. Apwonye me neno kit mabeco ma jo mukene gitye kwede ki dok pe me keto cwinya i kom gorogi.”

Ki lok ada, jo ma giworo Jehovah pud gitye ki roc. Lucaden pa Jehovah bene gitute ki gorogi calo jo mukene. Ento pwonye ma wanongo ki Baibul cuko cwiny dano me konyo jo mukene kit ma gitwero kwede. Bedo me ryeko me mako lirem ki jo ma kit meno. Kadi bed kit meno, tika cik ma igi lac me Baibul twero konyo dano me cobo peko ma dong nen calo cobogi pe twere i kare-ni, calo two ma pe cang ki arem me to?