Lanebi Moses owaco ni ka walubo cik pa Lubanga, ci wabinongo motte. (Nwoyo Cik 10:13; 11:27) Pe myero wawiny Lubanga pi lworo nongo pwod. Kit pa Lubanga mabeco aye tugo cwinywa me lubo cikke pien wamare dok pe wamito ni watim gin mo ma cwero cwinye. Coc Maleng waco ni, “Maro Lubanga en aye gwoko cikke.”​—1 Jon 5:3.

Ento i yo ma nining ma bedo luwiny bot Lubanga weko wanongo motte? Nen kong yo aryo magi.

“An a Rwot Lubangawu amito pwonyowu wek wubed maber, . . . kun atelowu i yo ma myero wuwot iye.”​—ICAYA 48:17.

Lacwewa, Lubanga Jehovah, ngeyowa maber dok miniwa tira ma wamito. Ka wamito ni pwonye okonywa me moko tam mabeco, omyero waniang gin ma Lubanga mito ni watim ki i Coc Maleng ci waket pwony magi i tic.

“Gitye ki gum [yomcwiny], jo ma giwinyo lok pa Lubanga, dok gigwoko!”​—LUKA 11:28.

I kare-ni, dano milion mapol ma gilubo Lok pa Lubanga gitye ki yomcwiny me ada. Me labolle, tam kong i kom laco mo i lobo Spain ma onongo tye ki akemo malyet dok maro lweny i kom jo mukene​—kadi wa dakone. I nino mo acel, en okwano gin ma lanebi Moses ocoyo i kom mwolo pa Yucepu, wod pa Yakobo. Kicato Yucepu macalo opii dok kitweye i buc labongo bal mo; kadi bed kit meno, en omedde ki bedo mwol, ogwoko kuc, dok otimo kica. (Acakki, cura 37-45) Laco ma a ki i lobo Spain-ni owaco ni: “Tamo i kom labol pa Yucepu otugo cwinya me dongo kit me mwolo, kica, ki jukke ken. Macalo adwogine, kombeddi dong atye ki kwo me yomcwiny.”

Coc Maleng miyo tira i kom kit ma omyero water kwede jo mukene. Wabineno lok meno i yo matut i pwony ma lubo man.