Jo mapol i lobo-ni gipe ki cam muromo kacel ki kabedo mupore me kwo. Jo mukene gimito gen pi anyim keken. Tutewa me konyo jo magi biweko wanongo cwak ki mot pa Lubanga.

“Ngat ma kica mako i kom lucan [nongo] omiyo banya bot Rwot [Jehovah]; pi meno Rwot bicule pi gin ma en otiyo.”​—CAROLOK 19:17.

Yecu obolo carolok i kom laco mo ma lukwo gupwodde dok guweke macok to. (Luka 10:29-37) Lakica mo ma en pe ngeyo ocung ci okonyo laco ma kigoyo-ni. En otimo meno kadi bed onongo a ki i rok mapat.

Laco ma lakica-ni pe omiyo kony i yo me kom keken ento bene ocuko cwiny laco ma kigoyo-ni, ma man okweyo cwiny ki i pekone.

Pwony ango ma wanongo ki i carolok man? Yecu onongo tye ka nyutu ni myero wakony jo ma gitye ki peko i yo mo keken ma watwero. (Carolok 14:31) Coc Maleng pwonyo ni cokcok-ki Lubanga bigiko can lim ki deno can. Ento watwero bedo ka pennye ni, Lubanga bitimo meno awene dok nining? Pwony ma lubo man binyamo mot ma Lacwecwa ma lamar-ri oyubo piri.