Pe tye ngat mo ma tye ki cal pa Yecu ma kimako. En pe ocung ni kimak calle nyo ni kicwe calle. Kadi bed kumeno lugo cal mapol gutemme me goyo calle pi cencwari mapol.

Ki lok ada, lugo cal magi ducu pe guneno kit ma Yecu onongo nen kwede. Kit me tekwaro, niye me dini mapol, ki dong miti pa luwil cal magi weko kigoyo cal pa Yecu ma lubbe ki mitigi. Kadi bed kit meno, kit ma kigoyo ki cal magi romo weko dano bedo ki tam marac i kom Yecu ki pwonye.

Lugo cal mukene gigoyo cal pa Yecu calo dano ma goro ma cwinye tye ka cwer adada dok nongo ye wiye olot mabor ki ye tike nongo tye manok. Ka mukene, kinyutu Yecu calo ngat ma tye ki kom me cwiny, ma dero orumu ka wiye dok pat ki jo ma i ngete. Tika cal ma kumeno nyuto anga ma Yecu obedo kikome? Waromo ngeyone nining? Yo acel me ngeyone aye me neno ngo ma Baibul waco i kom kit ma Yecu gwok onongo nen kwede. Man twero konyowa me bedo ki neno matir i kom Yecu.

Yecu owaco lok meno i lega nen calo i kare ma en onongo iye batija. (Jo Ibru 10:5; Matayo 3:13-17) Kom meno onongo nen nining? Mwaki 30 mukato angec, lamalaika Gabriel owaco ki Maliam ni: “Nen, ibiyac, ibinywalolatin laco, . . . Wod pa Lubanga.” (Luka 1:31, 35) Pi meno, Yecu onongo pe ki roc, calo Adam i kare ma kicweye. (Luka 3:38; 1 Jo Korint 15:45) Yecu myero obed ni onongo tye laco ma odongo madit, bene nen calo onongo cal ki mine Maliam ma onongo Lajudaya.

Yecu onongo tye ki ye tik kit macalo onongo obedo tekwaro pa Lujudaya, kadi bed ni Luroma onongo pe gimaro ye tik. Lakodi ye tik meno onongo weko kiworo ngat moni; dok pe bedo bor ma oket ata. Labongo akalakala Yecu onongo gwoko dok ngado ye tike ki ye wiye maber ma pe bedo mabor tutwal. Jo ma onongo gitye Ajula pa Lubanga calo Samson keken, aye ma onongo pe kilyelo ye wigi ki ye tikgi.​—Wel 6:5; Lungolkop 13:5.

Yecu obedo lacwer bao pi mwaki 30, ma onongo tiyo ki cinge labongo jami tic ma watye kwede i kare-ni. (Marako 6:3) Pi meno, en nen calo onongo ongwel matek adada. I acakki me ticce me pwony, en ‘oryemo lucat wil ducu woko ki iot pa Lubanga, kacel ki romi ki twoni. Oketo limpa lulok-cente, oryebo mejagi’ labongo kony pa ngat mo. (Jon 2:14-17) Tic meno onongo mito laco ma ongwel dok matek adada. Yecu otiyo ki kom ma Lubanga omiye me tiyo tic pa Lubanga: “Myero atit lok me kwenamaber me ker pa Lubanga i gang mukene bene,pien giora pi lok man.” (Luka 4:43) Onongo mito kero ki teko madwong adada me wot ki tyene ka tito kwena maber-ri i lobo Palestine.

Yecu onongo obedo dano ma iye yom ma oweko “jo ducu muol ki ma yeconurowu” gujolo lwongone ki yomcwiny. (Matayo 11:28-30) Bedo dano ma iye yom ki ma lakica onongo moko cikkene me miyo yweyo bot jo ma giye nongo pwony ki bote. Man oweko wa lutino onongo gimito bedo i nget  Yecu, Baibul wacciwa ni, ‘En otingo lutino i kore.’​—Marako 10:13-16.

Kadi bed ni Yecu obedo ki arem madwong madong cok to, en onongo pe obedo dano ma iye kec kare ducu. Me labolle, Yecu omiyo kony i karama me nyom i Kana i kare ma en oloko pii odoko kongo. (Jon 2:1-11) I karama mukene Yecu omiyo pwony mo ma wi dano pe biwil iye.​—Matayo 9:9-13; Jon 12:1-8.

Ma dong pire tek loyo weng, kit ma Yecu onongo pwonyo kwede oweko jo ma winyo lokke gubedo ki yomcwiny pi gen me kwo ma pe tum. (Jon 11:25, 26; 17:3) I kare ma lukwenane 70 gutitte jami mabeco mutimme i ticgi me pwony, en “obedo ki yomcwiny” madwong ci owacci: “Cwinywu obed yom, piennyingwu gicoyo i wi polo.”​—Luka 10:20, 21.

Lutela dini i kare pa Yecu-gi ca onongo gin luyub lok kun nongo cwinygi tye me ywayo tam pa dano i komgi ki me nyuto twerogi. (Wel 15:38-40; Matayo 23:5-7) Ento Yecu onongo pe tye kit meno, en ociko lukwenane pe me ‘bwoyo lwakgi ki tek.’ (Luka 22:25, 26) Ki lok ada, Yecu ocikogi ni: “Wugwokke i kom lupwony-cik ma gimaro wot ma guruko bongngi maboco-ni, dok gimito dano gubed ka motogi wa i cuk-gu.”​—Marako 12:38.

Ka ni kipor Yecu kwedgi, en obedo ka bedo kacel ki dano ma onongo poko en i kin jo mukene-ni tek. (Jon 7:10, 11) Kadi wa i kin lukwenane 11 ma lugen-ni, pokone bene onongo tek. Meno aye gin muweko Juda odoto lem Yecu wek obed macalo “lanyut” bot jo ma onongo gimito make.​—Marako 14:44, 45.

Kadi bed ni lok kome mogo pe kingeyo, ento tye lok ada ni meno Yecu onongo pe nen kit macalo jo mukene gubedo ka goyo calle-ni. Gin ma pire tek loyo kit ma en onongo nen kwede kikome aye kit ma wanene kwede i kare-ni.

Yecu owaco lok meno i nge tone. (Jon 14:19) En omiyo kwone “me koko jo mapol.” (Matayo 20:28) Nino adek i nge tone, Lubanga ocere woko macalo “cwiny” dok oweko en “onyute” bot lupwonnyene mogo. (1 Petero 3:18; Tic pa Lukwena 10:40) Yecu onongo nen nining i kare ma en onyute bot lupwonnyene? Nen calo onongo pat ki kit ma en onongo nen kwede con, pien kadi wa lureme macok kong pe guniang i kome i acakkine. I kare ma Maliam Lamagdala onene, onongo tamo ni en obedo lapur mo; dok i kare ma lupwonnyene aryo gitye ka cito i Emau, gutamo ni en obedo welo mo.​—Luka 24:13-18; Jon 20:1, 14, 15.

Myero wago cal pa Yecu i wiwa nining i kare-ni? Mwaki 60 i nge to pa Yecu, lakwena Jon oneno Yecu i ginanyuta. Jon pe oneno ngat ma kiguro i kor yatariya macok ki to. Ma ka meno, en oneno “Kabaka ma loyo luker ducu ki Rwot pa rwodi,” Kabaka me Ker pa Lubanga, ma cokcok-ki biloyo lweny i kom lumone pa Lubanga, dano wa ki jogi ducu, ci bikelo mot mapol bot dano pi naka.​—Niyabo 19:16; 21:3, 4.