“Ka wubilego gin mo bot Won, en bimiyowu i nyinga.”​—Jon 16:23.

Lok pa Yecu meno nyuto ka maleng ni Jehovah mito ni waleg bote, ma pe watiyo ki cal nyo wawok ki bot jo maleng, lumalaika, nyo kwariwa ma guto, ento i nying Yecu Kricito. Ka walego bot Lubanga i nying Yecu, ci wanyuto ni waniang tic ma pire tek ma Yecu otimo piwa. Yecu owaco ni, “Pe tye ngat mo ma bino bot Won, kono ki i an keken.”​—Jon 14:6.

“Wuyab cwinywu woko ducu bote.”​—Jabuli 62:8.

Ka watye ka lega bot Jehovah, omyero walok kwede kit ma waloko ki wego ma lamar. Me ka kwano legawa akwana ki i buk nyo nwoyo lega ma wamako i wiwa, omyero walok kwede ki woro kun watito lok ma i cwinywa.

“Ka walegge gin mo kun walubo gin ma en mito, ci en winyo legawa.”​—1 Jon 5:14.

I Baibul, Lubanga Jehovah owacciwa gin ma en bitimo piwa kacel ki gin ma en mito ki botwa. Wek Lubanga ojol legawa, omyero waleg “kun walubo gin ma en mito.” Me timo meno, mitte ni wakwan Baibul wek wange en maber. Ka watimo meno, legawa biyomo cwinye.

Leg pi Jami ma Mitte pi Kwoni. Watwero lega bot Lubanga pi jami ma mitte pi kwowa me nino ducu​—cam, ginaruka, ki kabedo. Waromo lega bene pi ryeko me moko tam ma atir kacel ki kero me kanyo pekkiwa. Watwero lega ni Lubanga omed niyewa, owek balwa, dok okonywa.​—Luka 11:3, 4, 13; Yakobo 1:5, 17.

Leg pi Jo Mukene. Lunyodo ma gimaro lutinogi cwinygi bedo yom ka lutinogi marre i kingi. Jehovah bene mito ni lutinone ma i lobo gupar pi luwotgi. Pore me lega pi cwari nyo dakoni, lutinoni, wadini, kacel ki luremi. Lapwonnye Yakobo ocoyo ni, “Ngat acel acel myero oleg Lubanga pi lawote.”​—Yakobo 5:16.

Tit ki Lubanga Pwoc ma Tye i Cwinyi. Baibul loko kit man i kom Lacwecwa: “En otimowu ber kun cwalo botwu kot mucwer ki i polo, dok miyowu kit cam mapatpat ma cek ka karegi oromo ma miyo wuyeng ki cam, cwinywu bene bedo yom.” (Tic pa Lukwena 14:17) Ka watamo i kom jami ducu ma Lubanga otimo piwa, man bitugo cwinywa me mine pwoc i lega. Ngene kene ni, omyero bene wanyut pwoc bot Lubanga ki i kit ma wakwo kwede.​—Jo Kolocai 3:15.

I kare mukene, cwinywa twero tur pien pe wanongo lagam pi legawa cutcut. Meno tika tyen lokke ni Lubanga pe paro piwa? Pe tye kit meno! Nen kong gin mutimme i kwo pa dano mogo ma nyuto pingo pire tek ni wamedde ki lega.

Steve, ma kiloko i kome i pwony me acel otito ni, “Ka onongo pe amedde ki lega, kono onongo arwenyo gen woko me bedo ki yomcwiny i kwona doki.” Gin ango ma okelo alokaloka meno? En ocako kwano Baibul dok opwonyo pingo pire tek me diyo cwinye i lega. Steve owaco ni, “Alego bot Lubanga me pwoye pi kony ducu ma anongo ki bot lurema me amara. I kare-ni atye ki yomcwiny makato kare mo keken.”

Laminwa Jenny kono, ma onongo yam winyo calo pe epore me lega bot Lubanga? En owaco ni, “I kare ma onongo awinyo ni konya pe ma loyo, abako doga bot Lubanga wek okonya aniang pingo awinyo kit meno.” Man okonye nining? Jenny owaco ni, “Lok ki Lubanga okonya me nene kekena kit ma en nena kwede, ki me niang ni kadi bed cwinya ngola kop marac, Lubanga pe tera kit meno. Okonya bene pe me ilo cinga woko.” Adwogine obedo nining? En owaco ni, “Lega okonya me neno Jehovah calo Lubanga ma tye ada, ma Larem, dok Wego ma lamar ma bikonya kare ducu teke amedde ki tute me timo mitine.”

Kong dok wanenu gin mutimme i kwo pa Isabel. I kare ma en ogamo ic, ludaktarne guwacce ni en binywalo latin ma tye ki goro mapol. Man oturo cwinye adada. Ludaktar mogo bene guwacce ni oony iye woko. En owaco ni, “Awinyo calo onongo abito woko pi arem ma onongo tye i cwinya.” Isabel otimo gin ango? En otito ni, “Alego ci dok alego bot Lubanga wek okonya.” I nge kare mo, en onywalo latin awobi, Gerard, ma tye lagoro. Tika Isabel winyo ni Lubanga ogamo legane? Ada, en winyo kit meno! I yo ma nining? Isabel otito ni, “Ka aneno woda ma dong tye ki mwaka 14, tye ka nongo mit pa kwo kadi bed tye lagoro, aniang ni en aye lagam maber loyo me legana, mot mamwonya loyo ma Jehovah omina.”

Lok ma oa ki i cwinye meno weko watamo i kom lok pa laco jabuli ma owaco ni: “Ai Rwot [Jehovah], iwinyo lega pa jo mamwol; ibimiyo gibedo ki tekcwiny, ibiciko iti.” (Jabuli 10:17) Man pud dong tyen lok maber ya me diyo cwinywa i lega!

I Baibul, wanongo lega pa Yecu mapol. Legane ma ngene loyo aye lega ma en opwonyo ki lupwonnyene. Ngo ma waromo pwonyo ki i lega meno?