1-2. I yo ma nining ma waromo lubo kwede kor tyen Yecu? Lapor mene ma twero konyowa me niang lok man?

GO KONG ni itye i kin dano ma gitye ka ngolo bar ma opong ki bom owic. Ngat mo ma ladiro adada tye ka telo wiwu. Ka en tye ka wot, en weko kor tyene dong i kweyo. I cawa mo, inongo ni dong pe itye ka neno kom ngat ma tye ka telowu-ni! Kadi bed kit meno, komi pe omyel. Me ka meno, in kacel ki luwot luwoti wumedde ki lubo kor tyen ngat-ti macok adada!

² Lobo marac ma wakwo iye i kare-ni tye calo bar ma kitero owic iye dok wan Lukricitayo me ada watye calo luwot iye. Watye ki pwoc ni Jehovah omiyowa Latela maber loyo​—Wode Yecu Kricito ma watwero lubo kore macok. (1 Pet. 2:21) Ma lubbe ki buk mo ma tito lok i kom Baibul, ki kany Petero oporo Yecu ki ngat ma telo wi dano i kabedo ma pe gingeyo. Calo ngat ma tye ka telo wi dano kun weko kor tyene, Yecu owekiwa kor tyene ma watwero lubone. Kong dong wanyamu lapeny adek ma kwako lubo kore. Tyen lokke ngo me lubo kor tyen Yecu? Pingo omyero watim meno? Dok watwero timone nining?

3. Tyen lokke ngo me lubo kor tyen ngat mo?

³ Tyen lokke ngo me lubo kor tyen ngat mo? I Baibul, lok man ni “wot” ki dok ‘tyen’ i kare mogo kwako kit ma ngat moni kwo kwede. (Acak. 6:9; Car. 3:23) Lanen ma ngat moni weko kitwero porone ki kor tyen ma en weko ka tye ka wot. Pi meno, lubo kor tyen ngat moni tyen lokke ni lubo lanene, nyo poro kite.

4. Tyen lokke ngo me lubo kor Yecu?

 ⁴ Dong tyen lokke ngo me lubo kor Yecu? Me ketone macek, tyen lokke ni lubo lanene. I ginacoya ma pwony man jenge iye, lakwena Petero onongo tye ka lok i kom lanen maber ma Yecu oweko pien en okanyo aunauna. Ento tye yo mapol ma watwero lubo kwede lanen pa Yecu. (1 Pet. 2:18-25) Ki lok ada, kwo pa Yecu ducu​—jami ducu ma en owaco dok otimo​—obedo lanen ma en owekiwa me aluba.

5. Tika twere pi dano ma gitye ki roc me lubo lanen pa Yecu ma roc mo pe iye-ni? Tit kong.

⁵ Macalo jo ma gitye ki roc, tika watwero lubo lanen pa Yecu? Ada, watwero. Pe watwero lubo lanen pa Yecu labongo roc mo. Ento, ka walubo lanene kore ki kore, kun watimo jami ducu ma watwero macalo dano ma gitye ki roc, ci nongo watye ka lubo lok pa lakwena Jon ma owaco ni: ‘Wulub kit kwo acel ma yam Yecu olubo.’​—1 Jon 2:6.

6-7. Pingo watwero waco ni lubo kor tyen Yecu binyikowa cok bot Jehovah?

⁶ Lubo kor Yecu binyikowa cok bot Jehovah. Pingo watwero waco kit meno? Mukwongo, Yecu owekiwa lanen maber i kit me kwo i yo ma yomo cwiny Lubanga. (Jon 8:29) Pi meno, ka walubo kor Yecu, wabiyomo cwiny Jehovah. Dok watwero bedo ki gen ni Wonwa me polo binyikke cok bot jo ma gitute me bedo lureme.​—Yak. 4:8.

⁷ Me aryo, Yecu olubo lanen pa Wonne labongo roc mo. Meno aye oweko Yecu onongo twero waco ni: “Ngat ma oneno an dong oneno Won.” (Jon 14:9) Waromo poro kit pa Yecu kun bene walubo kit ma en otero kwede jo mukene.  Me labolle, en onyuto kica pi ladobo mo, dako mo ma tye ki two malit, ki jo ma gurwenyo danogi me amara i to. Ka walubo lanen pa Yecu, ci nongo watye ka lubo lanen pa Jehovah bene. (Mar. 1:40, 41; 5:25-34; Jon 11:33-35) Ka watute matek me bedo calo Jehovah, wat i kinwa kwede bene bijing bedo matek.

8. Tit kong pingo lubo lanen pa Yecu bikonyowa me “loyo” lobo.

⁸ Lubo kor tyen Yecu weko lobo man marac-ci pe wiro tamwa woko ki i tic pi Jehovah. I dyewor me agikki me kwone i lobo, Yecu onongo twero waco ni: “An dong aloyo lobo.” (Jon 16:33) En onongo tye ka waco ni pe eweko tam, yub, kacel ki jami ma jo me lobo man gitimo odoro kwone. Wi Yecu pe owil i kom tyen lok ma omiyo kicwale i lobo​—ma en aye me lonyo nying Jehovah. Wan kono? I lobo man, tye jami mapol adada ma twero wiro tamwa woko ki i tic pi Jehovah. Ento, calo Yecu, ka waketo cwinywa i tiyo miti pa Jehovah, wan bene wabibedo ki kare me “loyo” lobo.​—1 Jon 5:5.

9. Ngo ma myero watim wek wamedde ki wot i yo ma terowa i kwo ma pe tum?

⁹ Lubo kor tyen Yecu terowa i kwo ma pe tum. I kare ma awobi mo ma lalonyo openyo ngo ma myero etim wek enong kwo ma pe tum, Yecu ogamme ni: ‘Bin ilub kora.’ (Mat. 19:16-21) Bot Lujudaya mogo ma onongo pe giye ni Yecu obedo Kricito, en owaco ni: “Romina . . . luba. Amiyogi kwo ma pe tum.” (Jon 10:24-29) Bot Nikodemo, lamemba me Lukiko pa Lujudaya ma onongo mito ngeyo pwony pa Yecu, Yecu owaco ni “dano ducu ma ye en” gibinongo “kwo ma pe tum.” (Jon 3:16) Wanyuto niyewa i kom Yecu ka waketo i tic jami ma en opwonyo dok walubo jami ma en otimo. Ka watimo meno, wabimedde ki wot i yo ma tero dano i kwo ma pe tum.​—Mat. 7:14.

10. ‘Ngeyo’ Yecu maber kwako gin ango? (Jon 17:3)

¹⁰ Ma peya wacako lubo kor tyen Yecu macok, myero kong wange en maber. (Kwan Jon 17:3.) ‘Ngeyo’ Yecu obedo gin ma pe bigik. Myero wamedde ameda ki ngeyo Yecu maber​—ma meno kwako pwonyo kite, tamme, ki rwomme me kit ma atir. Labongo paro pi mwaki ma wabedo kwede i ada, wan ducu omyero wamedde ki ngeyo Jehovah ki Wode.

11. Ngec ango ma tye i Jiri angwen-ni?

¹¹ Me konyowa ngeyo Wode maber, Jehovah oweko kicoyo Jiri angwen i Lokke. Jiri angwen-ni tye ki jami mutimme i kwo pa Yecu kacel ki ticce me pwony. Bukke magi tittiwa jami ma Yecu owaco dok nyutiwa  jami ma en otimo ki kit ma en onongo winyo kwede. Bukke angwen magi gikonyowa me ‘tam i kom’ lanen pa Yecu. (Ibru 12:3) Bedo calo gitye ki kor tyen ma Yecu owekiwa. Pi meno, ka wakwanyo kare me kwano Jiri, wabimedde ki ngeyo Yecu maber. Macalo adwogine, watwero lubo kor tyene macok.

12. Ngo ma watwero timo ka wamito nongo adwogi maber ki i Jiri?

¹² Wek wanong adwogi maber ki i Jiri angwen-ni, myero watim gin mo makato kwanone keken. Mitte ni wakwany kare me kwano ki lwodo lok ma iye i yo matut. (Por ki Yocwa 1:8) Kong dong wanyamu tam aryo ma twero konyowa me lwodo lok ma nonge i Jiri ki ketone i tic i kwowa.

13. Itwero weko lok ma ikwano ki i Jiri bedo mamit nining?

¹³ Mukwongo, wek lok ma itye ka kwano ki i Jiri obed mamit. Ti ki keroni me goyo jami i wi me neno ki winyo gin ma tye ka timme. Me konyi timo meno, tim kwed i bukke ma dul pa Jehovah omiyowa. Ngi jami mutimme wiati nyo jami mutimme i nge lok ma itye ka kwanone-ni. Yeny ngec mukene ma kwako jo ki kabedo ma kiloko i komgi. Por lok ma itye ka kwano i Jiri meno ki kit ma kiloko kwede i kom gin acel-lu i Jiri mukene. I kare mogo, laco Jiri acel twero lok matut i kom gin moni ma nongo laco Jiri mukene oweko woko.

14-15. Ngo ma omyero watim wek waket i tic jami ma wapwonyo ki i Jiri?

¹⁴ Me aryo, ket i tic i kwoni gin ma ikwano ki i Jiri. (Jon 13:17) Itwero timo meno nining? I nge kwano gin mo ma kicoyo i Jiri i yo matut, pennye kekeni ni: ‘Tika tye pwony mo ma atwero nongo ki i gin ma kicoyo kany ma aromo tic kwede i kwona? Atwero tic ki gin ma akwano-ni nining me konyo ngat mukene?’ Tam i kom ngat mo ma ingeyo, ci i yo me mar dok ki diro, nywak kwede pwony ma inongo ki i gin ma ikwano.

 ¹⁵ Kong dong wanenu labol mo i kom kit ma watwero keto tam aryo magi i tic. Wabinyamo labol pa dato ma lacan ma Yecu oneno i ot pa Lubanga.

16. Tit kong jami mutimme ma kitito i Marako 12:41.

¹⁶ Wek gin ma itye ka kwano-ni obed mamit. (Kwan Marako 12:41.) Go kong gin ma tye ka timme. Jami magi otimme i Nican 11, mwaka 33 K.M.​—cabit acel keken ma Yecu peya oto. I nino meno, Yecu onongo otero kare malac ka pwonyo dano i ot pa Lubanga. Ento lupwonye dini gubedo ka laro lok kwede. Con kong, jo mogo i kingi gupenyo Yecu ni en onongo twero me tiyo tic magi ki kwene. Mukene gubedo ka penye lapeny ma gitamo ni en pe twero gamo. (Mar. 11:27-33; 12:13-34) Kombeddi dong Yecu okobo i kabedo mukene i ot pa Lubanga. En twero neno canduk me gwoko lim, pi meno, nen calo en onongo tye i kabedo ma kilwongo ni Dyekal ma Kiyubo pi Mon Keken. En obedo piny ci ocako neno ka jo mapatpat gibolo motgi i canduk me gwoko lim. En oneno kit ma lulonyo mapol gibolo kwede cente madwong. Nen calo en obedo cok adada ma twero winyo koko pa nyig cente ka kibologi i canduk me gwoko lim.

17. Gin ango ma dato ma kiloko i kome i Marako 12:42 otimo?

¹⁷ Kwan Marako 12:42. I nge kare mo, Yecu oneno dako mo. En obedo “dato mo ma lacan.” Kwone onongo tek adada; dok nen calo en onongo pe ki cente muromo me wilo jami ma mitte pi kwo. Kadi bed kit meno, en ocito ka ma canduk lim tye iye dok obolo nyig cente aryo matino, ma nen calo opoto mere laling i canduk. Yecu ngeyo wel cente ma dato-ni obolo i canduk lim. En obolo nyig cente aryo ma kilwongo ni lepta, ma meno aye cente ma onongo tidi loyo i kare meno. Cente meno tidi tutwal ma pe twero wilo kadi ojwinyojwiny acel, ma onongo obedo winyo ma dong wele yot loyo ma kicato me acama.

18. Ma lubbe ki Marako 12:43, 44, ngo ma Yecu owaco madok i kom mot pa dato ma lacan-ni?

¹⁸ Kwan Marako 12:43, 44. Gin ma dato-ni otimo ogudo cwiny Yecu matek. Pi meno, en olwongo lupwonnyene ci ocimo dato-ni kun waco ni: “Dato man ma lacan-ni en aye dok obolo lim madwong makato jo ducu.” En otittigi ni: “Jo mapol [tutwalle lulonyo] gugito but limgi madwong-ngi aye gubolo, ento en i canne-ni, obolo limme ducu ma en tye kwede, ma onongo konyo kwone.” I kare ma dato ma lagen-ni omiyo centene me agikki i nino meno, en onongo tye ka keto kwone i cing Jehovah kun ngeyo ni Jehovah tye ki mar ma pe lokke dok bimine jami ma mitte pi kwo.​—Jab. 26:3.

19. Pwony ma pire tek ango ma watwero nongo ki i lok pa Yecu madok i kom dato ma lacan-ni?

¹⁹ Ket pwony man i tic i kwoni. Pennye kekeni ni, ‘Pwony ango ma atwero nongo ki i lok pa Yecu madok i kom dato ma lacan-ni?’ Tam kong i kom dato meno. Nen calo en onongo tye ki miti me miyo makato bot Jehovah. Kadi bed kit meno, en otimo gin ma etwero; omiyo ki Jehovah gin maber loyo ma etye kwede. Dok Yecu bene ongeyo ni mot pa dato-ni pire tek adada bot Wonne. Man aye dong pwony ma pire tek botwa: Cwiny Jehovah bedo yom ka wamine gin maber loyo ma watye kwede​—meno aye tic ma watiyo pire ki cwinywa ducu. (Mat. 22:37; Kol. 3:23) Cwiny Jehovah bedo yom ka neno  watimo gin maber loyo ma watwero! Cik ma iye lac meno gudo cawa ki kero ma watiyo kwede i worowa, me labolle ki nywako i tic me pwony kacel ki cokke.

20. Itwero keto i tic pwony madok i kom dato ma lacan-ni nining? Mi labol.

²⁰ Itwero keto i tic pwony ma inongo ki i lok kom dato-ni nining? Tam i kom jo ma gitwero nongo cuko cwiny ka ipoyo wigi ni Jehovah cwinye yom pi tic ma gitimo pire. Me labolle, tika ingeyo lamego mo muteggi ma kome pe yot dok tekone nok ma i kare-ni gwok tamo ni konye pe nyo cwinye pide pien pe tiyo matek i tic me pwony? Nyo gwok iromo tam i kom omego mo ma tye ki two malit ma pe cang ma cwinye tur pien pe twero cito i cokke ducu i Ot me Ker? Tute me konyo jo ma kit meno ki loko “lok mabeco keken ma dongo tam pa dano.” (Ep. 4:29) Nywak kwedgi pwony ma cuko cwiny ma wanongo ki i lok kom dato ma lacan-ni. Lokki me cuko cwiny twero konyogi me moko ni cwiny Jehovah bedo yom ka wamine gin maber loyo ma watye kwede. (Car. 15:23; 1 Tec. 5:11) Ka ipwoyo jo mukene pi miyo Jehovah gin maber loyo ma gitye kwede​—kadi bed nen tidi—​ci nongo itye ka lubo kor tyen Yecu macok.

21. Gin ango ma imoko tammi me timone?

²¹ Watye ki pwoc madit adada ni lok ma tye i Jiri tittiwa jami mapol adada mutimme i kwo pa Yecu, pien gikonyowa me lubo lanenne nyo kor tyene macok! Pingo pe iket yub me kwan piri keni nyo Woro pi Jo me Ot ma kwako Jiri angwen-ni? Myero wiwa opo ni ka wamito nongo adwogi maber ki i kwan ma kit meno, myero wawek obed mamit dok waket i tic i kwowa. Medo i kom lubo gin ma Yecu otimo, myero bene wawiny lokke. I pwony ma lubo man, wabineno gin ma watwero pwonyo ki i lok me agikki ma Yecu owaco macalo dano.