1. Ma lubbe ki Matayo 11:28-30, cikke ango ma Yecu omiyo bot lwak ma onongo gitye ka winye?

YECU ocikke bot lwak ma onongo gitye ka winyo lokke kun waco ni, “Wubin bota, . . . ci abimiyo wuywe.” (Kwan Matayo 11:28-30.) Man pe obedo cikke ma tere pe. Me labolle, tam kong i kom gin ma en otimo pi dako mo ma onongo tye ki two malit.

2. Gin ango ma Yecu otimo pi dako mo ma kome onongo lit?

² Dako man onongo mito kony ki kwok matino. En onongo dong olonge bot ludaktari mapol, kun geno ni gibicango twone. I nge canne pi mwaki 12, en pe omedo ki cang. Ma lubbe ki Cik pa Moses, dako-ni onongo kome ki keni. (Levi 15:25) Ci en owinyo ni Yecu twero cango lutwo, pi meno en ocito ka yenyo kony ki bot Yecu. I kare ma en onongo Yecu, en ogudu dog bongone, ci cutcut twone ocang woko! Ento Yecu pe ocango dako-ni keken ci otum​—en bene onyuto woro ki dako-ni. Me labolle, i kare ma Yecu tye ka lok ki dako-ni, en onyuto mar ki woro pire kun lwonge ni “nyara.” Man nen calo ocuko cwiny dako-ni dok omine kero adada!​—Luka 8:43-48.

3. Lapeny mene ma wabigamogi?

³ Waneno ni dako-ni aye ma ocito bot Yecu. En oketo tek me cito bote. Meno tye ada piwa i kare-ni bene​—omyero watute me ‘bino bot’ Yecu. I kareni, Yecu pe timo tango me cango two pa jo ma ‘gibino bote.’ Kadi bed  kit meno, en pud cwalo lwongo man bot dano ni: “Wubin bota, . . . ci abimiyo wuywe.” I pwony man, wabigamo lapeny abic magi: Watwero ‘bino bot’ Yecu nining? Yecu onongo tye ka lok i kom ngo i kare ma owaco ni: “Wuting yatta”? Gin ango ma watwero pwonyone ki bot Yecu? Pingo tic ma Yecu omiyo botwa weko walimo yweyo? Dok i yo ma nining ma watwero medde ki nongo yweyo i te yat pa Yecu?

4-5. I yo mapatpat ango ma watwero ‘bino kwede bot’ Yecu?

⁴ Yo acel ma ‘wabino kwede bot’ Yecu aye ka wapwonyo jami mapol ma Yecu owaco dok otimo kit ma kerowa twero kwede. (Luka 1:1-4) Pe tye ngat mo ma twero timone piwa​—omyero wakwan lok magi wan kikomwa. ‘Wabino bene bot’ Yecu ka wamoko tam me nongo batija ci wadoko lupwonnye pa Yecu.

⁵ Yo mukene ma ‘wabino kwede bot’ Yecu aye ka wacito ka yenyo kony ki bot luelda me kacokke. Yecu tiyo ki ‘mot magi ma gubedo dano-ni’ me gwoko romine. (Ep. 4:7, 8, 11; Jon 21:16; 1 Pet. 5:1-3) Omyero wakwany kare me penyogi pi kony. Pe myero watam ni luelda gubingeyo gin ma watye ka tamone ci gimiyowa kony ma wamito kikome. Tam kong i kom lok pa omego mo ma nyinge Julian. En owaco ni: “Onongo mitte ni awek ticca i Betel pi peko me yot koma, ci larema acel omiya tam ni aleg luelda wek gulima me cuko cwinya. I acakkine onongo atamo ni pe mitte. Ento lacen apenyo pi kony, dok lim meno tye i kin mot mabeco loyo ma anongo i kwona.” Luelda ma lugen, calo gin aryo ma gulimo Julian-ni, gitwero konyowa me ngeyo “tam pa Kricito,” nyo, me niang ki lubo tamme ki kite. (1 Kor. 2:16; 1 Pet. 2:21) Lim ma kit meno tye i kin mot mabeco loyo ma luelda gitwero miniwa.

6. Lok pa Yecu ni “wuting yatta” tyen lokke ngo?

⁶ I kare ma Yecu owaco ni: “Wuting yatta,” en nen calo onongo tye ka waco ni, “Wumine i te twerona.” Twero bene bedo ni en onongo tye waco ni, “Dony i te yatta kweda, ci wabitiyo pi Jehovah kacel.”

7. Ma lubbe ki Matayo 28:18-20, tic ango ma kiminiwa, dok watwero bedo ki gen ango?

⁷ Wajolo lwongo pa Yecu ka wadyero kwowa bot Jehovah ci wanongo batija. Lwongo meno tye pi jo ducu​—Yecu pe bikwero ngat mo keken ma mito tic pi Lubanga. (Jon 6:37, 38) Lulub kor Kricito ducu kiminigi mot me nywako i tic ma Jehovah omiyo bot Yecu. Watwero bedo ki gen ni Yecu kare ducu bibedo kwedwa kun konyowa me timo tic meno.​—Kwan Matayo 28:18-20.

8-9. Pingo onongo jo mamwol gimaro bedo cok ki Yecu, dok lapeny ango ma omyero wapennye kwede?

⁸ Jo ma mwol onongo gimaro bedo cok ki Yecu. (Mat. 19:13, 14; Luka 7:37, 38) Pingo? Tam kong i kom apokapoka i kin Yecu ki Luparicayo. Luparicayo onongo pe gimaro dano dok gin luwakke. (Mat. 12:9-14) Yecu onongo mwol dok lamar. Luparicayo onongo gimito yweka dok ni kitergi calo jo ma pigi tek. Yecu owaco ni mito yweka pe opore, en opwonyo lulub kore me bedo jo ma mwol kun gitiyo pi jo mukene. (Mat. 23:2, 6-11) Luparicayo gudiyo jo mukene pien dano onongo  gilworo gin ma bitimme i komgi ka pe guwinyo Luparicayo. (Jon 9:13, 22) Yecu ocuko cwiny jo mukene ki ticce me mar kacel ki lokke me kica.

⁹ Tika dong itye ka lubo lanen pa Yecu? Pennye kekeni ni: ‘Tika jo mukene ginena calo ngat ma mwol dok ma pe keco oyot? Tika atye atera me timo tic ma rwomme lapiny pi konyo jo mukene? Tika anyuto cwiny me kica bot jo mukene?’

12-14. Pingo timo tic ma Yecu omiyo botwa weko walimo yweyo?

¹² Pingo timo tic ma Yecu omiyo botwa weko walimo yweyo? Tye tyen lok mapol, ento wabinyamo adek keken.

¹³ Watye ki luneno mabeco loyo. Kadi bed ni Jehovah obedo Ngat ma Mamalo Twal, en kite pe rac ma pe nyuto pwoc pi luticce. En tero tic ma watimo calo gin ma pire tek. (Ibru 6:10) Dok en miyowa teko ma wamito me cobo ticwa. (2 Kor. 4:7; Gal. 6:5) Kabakawa Yecu owekiwa lanen maber loyo i kom kit me tero jo mukene. (Jon 13:15) Dok luelda ma gigwokowa gitute matek me lubo lanen pa Yecu, “lakwat romi madit.” (Ibru 13:20; 1 Pet. 5:2) Gitute matek me bedo lukica, cuko cwinywa, ki dong nyuto tekcwiny ka gipwonyo dok gigwokowa.

¹⁴ Watye ki lurem mabeco loyo. Pe tye jo mukene ma gitye ki lurem ma marogi kacel ki tic ma keligi adwogi maber calo wan. Tam kong: Watye ki mot me tic kacel ki jo ma gilubo rwom me kwo ma atir, ento pe gikette malo kengi ni kitgi atir. Gitye ki diro ento gimwol, dok pe ginene ni rwomgi lamal loyo jo mukene. Pe giterowa macalo lutic luwotgi keken, ento bene macalo luremgi. Dok margi piwa tek adada mumiyo gitye atera me to piwa!

15. Omyero wawiny nining i kom tic ma watye ka timone-ni?

¹⁵ Watye ki tic maber loyo. Wapwonyo dano lok ada i kom Jehovah dok wayaro ka maleng goba pa Catan. (Jon 8:44) Catan keto yec mapek i wi dano ma pe gitwero tingone. Me labolle, en mito ni watam ni Jehovah pe bitimiwa kica pi balwa dok en pe twero marowa. Man obedo twon goba marac adada ma turo cwiny dano! Ka ‘wabino bot’ Kricito, ci kitimiwa kica i kom balwa woko. (Rom. 8:32, 38, 39) Pud dong tye me yomcwiny me konyo dano wek gujenge i kom Jehovah ki me neno kit ma man weko kwogi doko ber kwede!

16. I yo ma nining ma yec ma Yecu owaco ni wating-ngi pat ki yec mukene ma watingo?

¹⁶ Yec ma Yecu owaco ni wating-ngi pat ki yec mukene ma watingo. Me labolle, otyeno i nge a ki i dog tic, jo mapol pe giwinyo olo keken ento bene pe gibedo ki yomcwiny. Ki tungcel, i nge tic pi Jehovah ki Kricito, wawinyo maber adada i cwinywa. Twero bedo ni waol adada otyeno i nge a ki i dog ticwa dok nongo omyero wadine adiya me cito i cokke otyeno meno. Ento pol kare wadwogo ki i cokke man ma nongo wawinyo agonya dok kerowa odwogo. Gin acel-lu bene timme ka watute me cito ka tito kwena ki kwan piwa kenwa. Mot ma wanongo bedo dit kato kero ma watiyo kwede!

17. Pingo omyero wabed ki neno mupore dok wagwokke?

¹⁷ Ento omyero wabed ki neno mupore. Ngat acel acel tye ki ka ma kerone gik iye. Dong omyero wagwokke ki kit ma watiyo kwede ki kerowa. Me labolle, watwero balo kerowa ki tic matek wek wabed ki jami me kom mapol. Nen kong gin ma Yecu owaco bot awobi mo ma lalonyo ma openye ni: “Atim ango wek alim kwo ma pe tum?” Awobi-ni onongo dong tye ka lubo Cik. En nen calo obedo dano maber pien Jiri pa Marako waco ni Yecu “cwinye omare.” Yecu omiyo ki awobi-ni lwongo mo mamwonya. Owacce ni, “Kong icit icat jamini ducu ma itye kwede. . . . Ka dong ibin icak lubo kora.” Awobi-ni onongo mito lubo kor Yecu, ento nen calo onongo pe twero weko ‘lwak lim madwong’ ma en tye kwede. (Mar. 10:17-22) Macalo adwogine, en okwero donyo i te yat nyo ayoko pa Yecu dok omedde ki bedo opii pa “Lim.” (Mat. 6:24) Ka onongo obed in, onongo ibiyero ngo?

18. Gin ango ma omyero watim kare ki kare, dok pingo?

¹⁸ Kare ki kare omyero watam i kom jami ma watye ka ketogi bedo mukwongo i kwowa. Pingo? Wek wanen ni watye ka tic ki kerowa i yo mupore. Nen kong gin ma awobi mo ma nyinge Mark owaco: “Pi mwaki mapol, onongo atamo ni atye ka kwo kwo ma rwomme lapiny. Onongo abedo lapainia, ento pol kare onongo abedo ka tamo pi cente ki kwo maber. Pe aniang pingo kwona onongo tye ka doko tek. Ci lacen aniang ni atye ka tute me cobo mitina mukwongo kun amiyo bot Jehovah kero ki cawa mudonge.” Mark oloko tamme ki yo me kwone ma oweko en obedo ki cawa me medo ticce pi Jehovah. Mark owaco ni, “Kare mogo pud aparo kit ma abinongo kwede ki cente, ento ki kony pa Jehovah kacel ki cwak pa Yecu, aloyo ariya ducu.”

19. Pingo pire tek adada me bedo ki neno mupore?

¹⁹ Wabimedde ki nongo yweyo i te ayoko pa Yecu ka watimo jami adek magi. Mukwongo, bed ki neno mupore. Watye ka timo tic pa Jehovah, pi meno omyero watim i yo ma Jehovah mito. Wan watye lutic, dok Jehovah aye Ladit tic. (Luka 17:10) Ka watemme me timo ticce i yowa, ci nongo watye ka jemo i kom ayoko. Kadi wa twon dyang ma kome tek twero nongo awano dok ol matek ka bedo ka ngak ki i yo ma lapur mito ni olubi kun jemo i kom ayoko. Ki tungcel, watwero timo jami madongo kun waloyo ariya mo keken ka walubo tira pa Jehovah. Wi myero opo ni pe tye ngat mo keken ma  twero gengo cobbe pa yub pa Jehovah!​—Rom. 8:31; 1 Jon 4:4.

20. Tyen lok ango ma omyero otug cwinywa me bedo i te ayoko pa Yecu?

²⁰ Me aryo, ti ticci ki tyen lok matir. Yubwa tye me kelo deyo bot Wonwa ma lamar, Jehovah. Jo mapol i kare pa Yecu ma onongo gitye ka lubo kore pi cobo mitigi keken pe gubedo ki yomcwiny dok ma pe orii gua woko ki i te ayoko pa Yecu. (Jon 6:25-27, 51, 60, 66; Pil. 3:18, 19) Ki tungcel, jo ma onongo gitiyo pi Yecu pien gimaro Lubanga ki dano luwotgi gumedde ki bedo i te ayoko i kare me kwogi ducu i lobo kany, kun onongo gitye ki gen me tic kacel ki Kricito i polo. Calo gin, wan bene wabibedo ki yomcwiny ka wamedde ki tingo ayoko pa Yecu ki cwiny matir.

21. Ma lubbe ki Matayo 6:31-33, gin ango ma myero wagen ni Jehovah bitimone?

²¹ Me adek, medde ki bedo ki gen ma atir. Wayero kwo ma mito jalle ken ki tic matek. Yecu ocikowa ni wabikato ki i aunauna. Ento watwero bedo ki gen ni Jehovah biminiwa kero me ciro peko mo keken. Ka wamedde ki cirone, ci tekowa bene medde. (Yak. 1:2-4) Watwero bene bedo ki gen ni Jehovah bimiyowa jami ma wamito, Yecu bimedde ki telowa, dok omege ki lumegiwa gibicuko cwinywa. (Kwan Matayo 6:31-33; Jon 10:14; 1 Tec. 5:11) Tika dok tye gin mo mukene ma wamito?

22. Watwero bedo ki pwoc pi gin ango?

²² Dako ma Yecu ocango-ni onongo yweyo i nino ma kicange iye kikome. Ento en onongo binongo yweyo ma rii naka keken ka en odoko lalub kor Kricito ma lagen. Ngo ma itamo ni dako-ni otimo? Ka en oyero me bino i te ayoko pa Yecu, ci tam kong mot ma en tye kwede i kare-ni​—me tic kacel ki Yecu i polo! Gin mo keken ma en ojalo me lubo kor Kricito konye pe ka kiporo ki mot ma en onongo-ni. Dong kadi bed genwa tye me kwo pi naka i polo nyo i lobo, watwero bedo ki pwoc madit ni wajolo lwongo pa Yecu ni: “Wubin bota!”