LISA * owaco ni, “Kica ma omege ki lumege ma Lukricitayo gunyuta aye ogudo cwinya adada.” En onongo tye ka lok i kom gin ma oweko ebedo ki miti me pwonyo ada. Laminwa Anne bene owinyo kit meno, dok owaco ni, “I acakkine, abedo ki miti me pwonyo ada pien Lucaden gin lukica tutwal, ento pe pi gin ma gipwonyo.” Lumege aryo magi ducu i kare-ni ginongo mit pa kwano Baibul ki lwodone, ento kica aye ogudo cwinygi adada.

Watwero nyuto kica ma cuko cwiny jo ma i ka ngetwa nining? Kong wanyamu yo aryo ma watwero timo kwede meno: i lokwa kacel ki ticwa. Ci i ngeye wabineno angagi ma myero wanyutigi cwiny me kica.

Dako makwiri ma kiloko i kome i Carolok cura 31 loko i yo me kica. (Car. 31:26) En weko cwiny me kica gudo dwan ki kit ma en loko kwede. Wege bene omyero gulok i yo me kica. Lunyodo mapol gingeyo ni lok ki gero twero kelo peko i kom lutinogi dok latin meno pe omaro winyo lokgi. Ka lunyodo giloko i yo me kica, ci bibedo yot ki lutinogi me winyo ki lubo lokgi.

Kadi ibedo lanyodo nyo pe, itwero pwonnye me lok i yo me kica nining? Wanongo gin ma myero watim mukwongo i acakki me Carolok 31:26 ma waco ni: “En loko lokke ducu ki ryeko.” Meno kwako yero nyig lokwa ki dwanwa ki ryeko. Pol kare ber ka wapennye kekenwa ni, ‘Tika gin ma acok waco-ni bitugo akemo, nyo bikelo kuc?’ (Car. 15:1) Ki lok ada, ber me tam ma peya iloko.

Carolok mukene waco ni: “Lok pa ngat ma pe ki tam winnye malit macalo pala lucwan ka ocobo dano.” (Car. 12:18) Ka watamo i kom kit ma lokwa ki dwanwa gudo kwede jo mukene, ci man twero tugo cwinywa me lok ki kica. Ka waloko i yo me kica, ci pe wabiwaco lok marac nyo ma cwero cwiny dano. (Ep. 4:31, 32) Wabikwanyo tam ki lok maraco woko kun waleyo kakare ki lok me mar. Jehovah owekiwa lanen maber me timo meno i kare ma oloko ki laticce Elia i kare ma lworo tye ka make. Lamalaika ma oloko me kaka Jehovah-ni oloko ki kica ki “dwan matidi.” (1 Luker 19:12) Ento, nyuto kica pe kitimo ki lok keken. Omyero bene watim jami i yo me kica. I yo ma nining?

Walubo lanen pa Jehovah ka waloko dok watimo jami ma nyuto cwiny me kica. (Ep. 4:32; 5:1, 2) Lisa, ma kiloko i kome con-ni, oloko kit man i kom kica ma Lucaden gunyutte. “I kare ma kiwacciwa atura ni wadak woko cutcut ki i otwa, luot mo aryo ma gin Lucaden gukwanyo cawa ki i dog ticgi ci gubino ka konyowa coko jamiwa. I kare meno onongo pud peya acako wa kwano Baibul!” Tic me kica meno otugo cwiny Lisa me pwonyo ada.

 Anne, ma kiloko i kome i acakki me pwony man bene obedo ki pwoc pi kica ma Lucaden gunyutte. En owaco ni: “Pi kit ma jo ma pe giworo Jehovah gutera kwede, onongo anongo ni tek adada me geno jo mukene.” En omedde ni: “I kare ma arwatte ni Lucaden, onongo pe agenogi. Abedo ka pennye kekena ni, ‘Pingo gitye ka nyuto miti i koma tutwal?’ Ento kica ma lapwonya me Baibul onyuta okonya me gene.” Man okelo adwogi maber ango? “Lacen acako keto cwinya i kom jami ma onongo atye ka pwonyo.”

Nen ni kica ki mar ma jo me kacokke gunyuto ki Lisa kacel ki Anne ogudo cwinygi adada, dok man okonyogi me bedo ki miti me pwonyo ada. Kica ma kacokke onyutigi okonyogi me cako geno Jehovah kacel ki jone.

Pi kit ma jo mogo gudongo kwede nyo tekwarogi, gitwero nongo ni yot me lok i yo me kica kun gibwunyo. Ber ni jo mogo tekwarogi ki kitgi tugo cwinygi me nyuto  kica. Ento ka tekwarowa ki kitwa keken aye tugo cwinywa me nyuto kica, ci twero bedo ni pe watye ka lubo lanen pa Jehovah.—Por ki Tic pa Lukwena 28:2.

Kica me ada obedo nyig ma nyak pi cwiny maleng pa Lubanga. (Gal. 5:22, 23) Man tyen lokke ni wamito cwiny maleng pa Lubanga wek okonywa me nyuto kica. Ka watimo meno, wabilubo lanen pa Jehovah ki Yecu. Medo i kom meno, calo Yecu wanyuto kica ma a ki i cwinywa. Pi meno, marwa pi Lubanga Jehovah ki pi luwotwa tugo cwinywa me nyuto kica. Man weko kica doko kit ma pire tek adada ma a ki i cwinywa dok ma Lubanga cwako.

Twero bedo yot me nyuto kica bot jo ma gunyutiwa kica nyo bot jo ma wangeyogi. (2 Cam. 2:6) Yo acel ma watwero timo kwede meno obedo ki pwoyogi. (Kol. 3:15) Ento ket kong ni wawinyo ni ngat moni pe opore me nyute cwiny me kica kono?

Tam kong i kom lok man: Jehovah owekiwa lanen maber loyo me nyuto kica ma pe wapore pire, dok Lokke pwonyowa tyen lok ma pire tek adada me nyuto kica. Lok man ni “kica ma pe wapore pire” kitiyo kwede i Ginacoya me leb Grik tyen mapol adada. Lubanga nyutiwa kica nining?

Jehovah onyuto kica bot dano ducu ma dong gukwo i lobo kun minigi jami ma mitte me bedo kwo. (Mat. 5:45) Ki lok ada, kadi wa i kare ma peya wangeyo Jehovah, En onyutiwa kicane. (Ep. 2:4, 5, 8) Me labolle, en omiyo gin ma pire tek loyo bote, Wode acel keken, pi dano ducu. Lakwena Paulo ocoyo ni Jehovah omiyo ginkok “kit macalo lonyo me kicane dwong kwede.” (Ep. 1:7) Medo i kom meno, kadi bed ni watimo bal dok waturo cwiny Jehovah, en pud medde ki tirowa kun pwonyowa. Tirane ki lokke tye calo “kot ma ngido.” (Nwo. 32:2) Pe twere ki wan me culo wang kica ducu ma en tye ka nyutiwa. Dok lok ada tye ni ka onongo Jehovah pe onyutiwa kica ma pe wapore pire, kono wape ki gen mo pi anyim.—Por ki 1 Petero 1:13.

Labongo akalakala mo, kica pa Jehovah pire tek adada botwa dok tugo cwinywa. Macalo adwogine, me ka nyuto kica bot jo manok keken, watute me lubo lanen pa Jehovah kun wanyuto kica bot dano ducu nino ki nino. (1 Tec. 5:15) Ka wanyuto kica kare ki kare, wabedo calo mac malyet me aoya i nino ma piny ngic. Wacuko cwiny jo me gangiwa, luworo luwotwa, lutic luwotwa, lutino kwan luwotwa, kacel ki jiraniwa.

Tam i kom jo me gangwu nyo kacokkewu ma gitwero nongo adwogi maber pi lok nyo tic me kica ma ibinyuto botgi. Twero bedo ni tye ngat mo i kacokkewu ma mito kony me tiyo tic ma gang nyo poto nyo tic mogo calo cito i cuk ka wil kare ki kare. Medo i kom meno, ket kong ni inongo ngat mo i ticci me pwony ma mito kony, tika ibimine kony ma en mito?

Ka wawoto ki lubo lanen pa Jehovah, walego ni kica aye odor lokwa ki ticwa.