1. Kit ma kicoyo kwede i Latitlok 7:20, lok ada mene ma Kabaka Solomon otito?

 KABAKA Solomon ocoyo ni: “Pe tye dano mo ma kite atir i lobo man, ma timo gin maber keken ma pe balo.” (Latit. 7:20) Meno lok ada! Wan ducu watye lubalo. (1 Jon 1:8) Pi meno, wamito ni Lubanga kacel ki jo mukene gutimiwa kica.

2. Iwinyo nining ka laremi mo macok otimmi kica?

² Wi tika po i kom kare mo ma icwero cwiny laremi mo macok? Labongo akalakala mo, onongo pe imito balo watwu, pi meno ikwayo kica ki cwinyi ducu. Iwinyo nining i kare ma laremi otimmi kica? Tika icako winyo maber? Tika meno bene oyomo cwinyi?

3. Gin ango ma wabinyamo i pwony man?

³ Wamito ni Jehovah obed Laremwa macok loyo, ento i kare mogo watwero waco nyo timo jami ma cwero cwinye. Pingo watwero moko ni Jehovah tye atera me timiwa kica? I yo ma nining ma timo kica pa Jehovah pat ki kit ma wan watimo kwede kica? Ki me agikki, angagi ma Jehovah timmigi kica?

4. Pingo watwero bedo ki gen ni Jehovah tye atera me timo kica?

⁴ Lok pa Lubanga cuko cwinywa ni Jehovah tye atera me timo kica. I kare ma Jehovah otito lok i kome bot  Moses i wi Got Cinai, En ocwalo lamalaikane me waco ni: ‘Jehovah, Jehovah, Lubanga ma lakica dok maro dano, kiniga pe make oyot, marre ma pe lokke dwong, en lagen mada. En gwoko mar ma pe lokke pi jo alip ki alip, kun weko rocgi, ki tim aranyigi ki balgi.’ (Nia 34:6, 7) Jehovah obedo Lubanga ma lamar dok tye atera me timo kica ki lubalo ma gungut.—Nek. 9:17; Jab. 86:15.

5. Ma lubbe ki Jabuli 103:13, 14, ngec ma Jehovah tye kwede i kom dano acel acel tugo cwinye me timo gin ango?

⁵ Macalo Lacwecwa, Jehovah ngeyo jami ducu madok i komwa. Tye me ur adada me tamo ni Jehovah ngeyo jami ducu madok i kom dano ducu ma gitye i lobo! (Jab. 139:15-17) Pi meno, en twero neno roc ducu ma walako ki bot lunywalwa. Medo i kom meno, en ngeyo jami mutimme i kwowa ma oweko wadoko kodi dano ma wabedo i kare-ni. Gin ango ma Jehovah timo pien en ngeyowa maber adada? Ngec man tugo cwinye me timiwa kica.—Jab. 78:39; kwan Jabuli 103:13, 14.

6. Jehovah onyuto nining ni etye atera me timiwa kica?

⁶ Jehovah onyuto ni etye atera me timo kica. En niang ni pi bal pa laco mukwongo, Adam, wan ducu wadoko lubalo dok wabito. (Rom. 5:12) Pe tye gin mo ma watwero timone me gonnye kekenwa nyo gonyo jo mukene ki i acena me bal ki to. (Jab. 49:7-9) Ento, Lubangawa ma lamar-ri onyuto cwiny me kica ci otimo gin mo me gonyowa. Gin ango ma en otimo? Kit macalo Jon 3:16 nyuto kwede, Jehovah ooro Wode acel keken me bino ka to piwa. (Mat. 20:28; Rom. 5:19) Yecu oto me kaka wan wek ogony ngat mo keken ma oketo niyene i kome. (Ibru 2:9) Nen calo ocwero cwiny Jehovah adada me neno ka Wode oto to malit dok me lewic! Ki lok ada, Jehovah onongo pe biye ni Wode oto ka onongo en pe mito timiwa kica.

7. Mi kong labol mogo me Baibul i kom jo ma Jehovah otimigi kica.

⁷ Baibul tye ki labol pa jo mapol adada ma Jehovah otimigi kica. (Ep. 4:32) Anga ma itamo i kome? Gwok nyo itamo  i kom Kabaka Manace. Laco meno ma kite rac-ci otimo bal madongo mapol i kom Jehovah. En aye otelo wi dano i woro lubange me goba. En oneko lutinone kikome, kun wangogi ki mac me gityer bot lubange me goba. En bene ocibo cal jok i ot maleng me woro Jehovah. Baibul oloko kit man i kome: “Obedo ka tiyo gin ma nen marac i wang Rwot [Jehovah], kun omiyo kiniga mako Rwot.” (2 Tekwaro 33:2-7) Ento, i kare ma Manace ongut ki cwinye ducu, Jehovah otimme kica. Lubanga bene odwoke cen i wi kom kerre macalo kabaka. (2 Tekwaro 33:12, 13) Gwok nyo itamo bene i kom Kabaka Daudi, ma otimo bal madongo i kom Jehovah, ma i kine tye iye abor kacel ki nek. Kadi bed kit meno, i kare ma Daudi oye ni etimo bal dok ongut ki cwinye ducu, Jehovah bene otime kica. (2 Cam. 12:9, 10, 13, 14) Ada, watwero bedo ki gen ni Jehovah tye atera me timo kica. Dok kit ma wabineno kwede, kit ma Jehovah timo kwede kica pat adada ki kit ma dano gitimo kwede kica.

8. Tic pa Jehovah macalo Langolkop gudo kit ma en timo kica nining?

⁸ Jehovah obedo “Langolkop me lobo ducu.” (Acak. 18:25) Langolkop maber myero obed ki ngec matut i kom cik. Jehovah obedo Langolkopwa, dok en niang cik maber pien en aye bene obedo Lami Cik. (Ic. 33:22) Pe tye ngat mo ma ngeyo poko gin maber ki gin marac ma loyo Jehovah. Gin ango mukene ma langolkop maber myero onge? Mitte ni en onge jami ducu mutimme madok i kom lok moni ma peya en ongolo kop. Pi meno, Jehovah aye obedo Langolkop maber loyo ducu pien en ngeyo jami ducu mutimme.

9. Ngec mene ma nongo Jehovah tye kwede ma peya en omoko tamme me timo kica?

⁹ Jehovah pe tye calo lungolkop ma dano pien en kare ducu ngeyo jami ducu mutimme madok i kom lok mo keken ma obino i nyime. (Acak. 18:20, 21; Jab. 90:8) En pe jenge i kom gin ma dano oneno nyo owinyo. En niang maber adada ni jami ma ngat moni timo bino macalo adwogi me kite ma olako ki bot lunyodone, kwan ma en onongo, ka ma en kwo iye, ki bene yotkome ki kit ma wiye tye kwede. Jehovah bene neno cwiny dano. En niang maber adada miti pa ngat acel acel ki gin ma tugo cwinye me timo jami. Pe tye gin mo keken ma kitwero kanone ki bot Jehovah. (Ibru 4:13) Pi meno, ka Jehovah otimo kica ki ngat moni, nongo tye pien en ngeyo jami ducu mutimme.

10. Pingo watwero waco ni Jehovah kare ducu ngolo kop atir? (Nwoyo Cik 32:4)

¹⁰ Jehovah kare ducu ngolo kop atir. En pe poko kin dano. Timo kica pa Jehovah pe jenge i kom kit ma ngat moni nen kwede, lonyone, ywekane, nyo dirone. (1 Cam. 16:7; Yak. 2:1-4) Pe tye ngat mo ma twero diyo Jehovah me timo gin mo nyo ma twero wille. (2 Tekwaro 19:7) Akemo nyo mar ma en tye kwede pe gudo tam ma en moko i yo mo keken. (Nia 34:7) Labongo akalakala mo keken, Jehovah aye obedo Langolkop maber loyo pien en niang jami ducu madok i komwa ki gin ma tye ka timme i kwowa.—Kwan Nwoyo Cik 32:4.

11. Gin ango mapat adada ki i kit ma Jehovah timo kwede kica?

¹¹ Luco Ginacoya me leb Ibru guniang  ni timo kica pa Jehovah dok pat. I kare mogo, gutiyo ki nyig lok me leb Ibru ma buk mo acel waco ni “kitiyo kwede keken me tito kit ma Lubanga timo kwede kica bot lubalo. Nyig lok meno pe kitiyo kwede me nyuto kit ma dano timo kwede kica bot dano luwotgi.” Jehovah keken aye tye ki twero me timo kica ki labalo ma ongut. Adwogine bedo nining ka Jehovah otimiwa kica?

12-13. (a) Mot ango ma ngat moni nongo ka Jehovah otimme kica? (b) Adwogi maber me timo kica pa Jehovah rii pi kare marom mene?

¹² Ka waye lok ada man ni Jehovah otimiwa kica, ci wanongo “nino me yweyo,” ma man kwako bedo ki wic ma opye mot ki cwiny ma pe pidowa. Kodi kica ma kit meno pe a ki bot dano ento “a ki bot Rwot [Jehovah].” (Tic 3:19) Ka Jehovah otimiwa kica, en ye ni wabed lureme odoco, dok bedo calo onongo pe watimo bal meno.

¹³ Ka Jehovah otimiwa kica pi bal moni, en pe dok bikok i komwa nyo miniwa pwod pi bal meno matwal. (Ic. 43:25; Jer. 31:34) Jehovah keto balwa ka mabor “kit macalo tung wokceng tye bor kwede ki tung potoceng-ngi.” * (Jab. 103:12) Ka watamo i kom kit ma timo kica pa Jehovah dit kwede, cwinywa pong ki pwoc kacel ki woro madit adada. (Jab. 130:4) Ento angagi ma Jehovah timigi kica?

14. Jami ango ma dong wapwonyo ma lubbe ki tam pa Jehovah me timo kica?

¹⁴ Wapwonyo ni, Jehovah pe moko tamme ka ce omyero etim kica nyo pe ma lubbe ki dit pa bal ma ngat moni otimo. Wapwonyo bene ni Jehovah tiyo ki ngec ma en tye kwede macalo Lacwecwa, Lami Cikwa, ki Langolkopwa ka tye ka moko ka ce omyero etim kica ki ngat moni. Ento jami ango ma Jehovah tamo iye ka tye ka moko ka myero etim kica nyo pe?

15. Ma lubbe ki Luka 12:47, 48, gin ango ma Jehovah tamo iye ka tye ka moko tamme me timo kica?

¹⁵ Gin acel ma Jehovah tamo iye aye ka ce latim bal-li onongo ngeyo ni gin  ma ebitimo-ni rac. Yecu onyuto man ka maleng, kit ma kicoyo kwede i Luka 12:47, 48. (Kwan.) Ka ngat mo ogoyo pulan me timo gin marac, kun ngeyo maber ni meno gin ma Jehovah dagi, nongo en otimo bal madit adada. Jehovah twero moko tamme pe me timo ki ngat meno kica. (Mar. 3:29; Jon 9:41) Ento, omyero waye ni i kare mogo, nongo wangeyo ni gin ma watimo obedo gin marac. Tika gen mo tye ni kibitimiwa kica? Ada, gen tye! Pien tye dok gin mukene ma Jehovah tamo iye ka tye ka moko tamme me timo kica nyo pe.

16. Tyen lokke ngo me ngut i kom bal, dok pingo myero wangut i kom balwa ka wamito ni Jehovah otimiwa kica?

¹⁶ Gin mukene ma Jehovah tamo iye aye ka ce labalo-ni ongut ki cwinye ducu. Tyen lokke ngo me ngut i kom bal? Ngut tyen lokke ni nongo “iloko tammi, kiti, nyo yubbi.” Ngat ma ongut-ti bene koko ange dok bedo ki cwercwiny madit pi jami maraco ma en otimo nyo pien pe otimo gin matir ma onongo myero otim. Cwinye cwer pi bal ma en otimo dok pien en oweko watte ki Jehovah odoko goro, ma man oweko en otimo jami maraco magi. Wi opo ni Kabaka Manace ki Daudi ducu gutimo bal madongo; ento Jehovah otimigi kica pien gungut i kom balgi. (1 Luker 14:8) Ada, Jehovah timiwa kica keken ka en oneno ni wakuno balwa. Ento koko ange keken pi bal ma watimo pe romo. Myero wabed atera me timo gin mo. * Man kelowa i gin mukene ma Jehovah tamo iye.

17. Lokke obedo ngo, dok pingo pire tek ka wamito gwokke ki i nwoyo bal ma watimo con? (Icaya 55:7)

¹⁷ Gin mukene ma Jehovah tamo iye aye ka ce labalo-ni olokke. Ngat moni lokke ka en oweko yo marac ma en tye ka lubo-ni dok ocako kwo kit ma Jehovah mito ni wakwo kwede. (Kwan Icaya 55:7.) Ngat meno myero olok tamme dok owek tam pa Jehovah aye odor kwone. (Rom. 12:2; Ep. 4:23) En myero obed atera me weko tam ki tim maraco  ma lubbe ki kwone macon. (Kol. 3:7-10) Ngene kene ni, niyewa i kom ginkok pa Kricito aye oweko Jehovah timiwa kica dok lonyowa ki i bal. Jehovah bitimiwa kica kun jenge i kom ginkok meno ka en oneno ni watye ka tute ki cwinywa ducu me loko kwowa.—1 Jon 1:7.

18. Jami mene ma wanyamo madok i kom timo kica pa Jehovah?

¹⁸ Kong dong wawot wiye wiye i pwony mogo ma pigi tego ma wanyamo. Jehovah aye obedo Latim Kica maber loyo i polo ki lobo. Pingo wawaco kit meno? Mukwongo, en kare ducu tye atera me timo kica. Me aryo, en ngeyowa maber adada. En ngeyo jami ducu madok i komwa, dok en aye obedo ngat maber loyo me moko ka ada wangut i kom balwa. Ki me adek, ka Jehovah otimiwa kica, en timiwa kica i yo ducu, dok ki tung bote, bedo calo onongo pe watimo bal meno wacel. Man weko wabedo ma cwinywa pe pidowa kun bene wanongo cwakke.

19. Kadi bed watye ki roc dok pud wamedde ki timo bal, pingo watwero bedo ki yomcwiny?

¹⁹ Ngene kene ni, ka pud watye ki roc, wabimedde ki timo bal. Ento watwero nongo kwe cwiny ki i lok man ma nonge i buk me Insight on the Scriptures, Volume 2, pot 771: “Jehovah obedo lakica dok ngeyo ni luticce gitye ki goro. Pi meno, pe mitte ni cwinygi obed ka cwer i kare ducu pien ni gitye ki roc dok gitimo bal. (Jab 103:8-14; 130:3) Ka gitye ka tute ki tekogi ducu me lubo yo pa Lubanga, gitwero bedo ki yomcwiny. (Pil 4:4-6; 1Jon 3:19-22).” Tam meno pud dong cuko cwinywa ya!

20. Ngo ma wabinyamo i pwony ma lubo man?

²⁰ Watye ki pwoc madit ni Jehovah tye atera me timiwa kica ka ada wangut pi bal ma watimo. Ento, watwero lubo lanen pa Jehovah me timo kica nining? I yo ma nining ma timo kicawa rom ki pa Jehovah, dok i yo ma nining ma pat? Pingo pire tek ni waniang apokapoka man? Pwony ma lubo man bigamo lapeny magi.