1. Pingo omyero wawiny lok ma Yecu omiyo me ciko dano?

I KARE ma Yecu obedo ka tito jami ma bitimme i kare me agikki, en owaco ni: “Wugwokke kenwu, cwinywu owek doko nwang pi . . . lok me kwo man ma miyo wubedo ki tam mapol.” (Luka 21:34) Omyero wawiny lok me cikke meno. Pingo? Pien i kare ma watye iye-ni, omyero walweny ki pekki ma jo mukene bene gilwenyo kwede.

2. Peko ango ma omege ki lumege mogo gikato ki iye?

² I kare mukene, omyero walweny ki pekki mapol lawangacel ma turo cwinywa. Tam kong i kom labol magi. Lacaden mo ma nyinge John, * ma tye ki two malit ma neko ler kom, cwinye otur adada i kare ma dakone okwere woko ma dong guri i nyomgi pi mwaka 19 kulu. I nge meno, anyirane aryo-ni gujuko tic pi Jehovah woko. Luot mo ma nyinggi Bob ki Linda dok gukato ki i pekki mapat. Gin aryo-ni gurwenyo ticgi, ci onongo pe gitwero culo lon me otgi, ma man oweko beng ogamo otgi woko. Medo i kom pekki magi, kinongo ni Linda tye ki two adunu/itao ma twero neke woko, dok ocako twoyo bene two ma kelo arem i wang mwot.

3. Ma lubbe ki Jo Pilipi 4:6, 7, gin ango ma watwero bedo ki gen iye?

³ Wangeyo labongo akalakala mo ni Lacwecwa ki Wonwa ma lamar Jehovah, niang kit ma par gudowa kwede. Dok en mito konyowa me lweny ki ariya ma wakato ki iye.  (Kwan Jo Pilipi 4:6, 7.) Lok pa Lubanga tye ki labol mapol ma nyuto pekki ma luticce gukato ki iye. Tito bene kit ma Jehovah okonyogi kwede me lweny ki pekki magi ma kelo par-ri. Kong dong wanenu labol mogo manok.

4. Ariya ango ma Elia okato ki iye, dok en onongo winyo nining i kom Jehovah?

⁴ Elia otiyo pi Jehovah i kare ma kwo onongo tek adada dok okato ki i ariya matego. Kabaka Akab, ma onongo tye i kin luker maraco ma guloyo Icrael, onyomo Jejebel, dako ma kite rac ma woro jok Baal. Gin aryo-ni gupongo lobo Icrael ki tim me woro Baal dok guneko lunebi pa Jehovah mapol. Elia obwot ki i cinggi. En bene obwot ki i kec laparanat ma opoto i lobo Icrael pien en ojenge i kom Jehovah. (1 Luker 17:2-4, 14-16) Medo i kom meno, Elia bene ojenge i kom Jehovah i kare ma en opyem ki luwor Baal kacel ki lunebine. En ocuko cwiny jo Icrael me tic pi Jehovah. (1 Luker 18:21-24, 36-38) Elia onongo tye ki lanyut mapol ma moko ni Jehovah obedo ka konye ki i pekki magi ducu.

5-6. Ma lubbe ki 1 Luker 19:1-4, Elia owinyo nining, dok Jehovah onyuto nining ni emaro Elia?

⁵ Kwan 1 Luker 19:1-4. Lworo omako Elia i kare ma Daker Jejebel ocikke me nekke woko. Pi meno, en ongweco woko wa i Beer-ceba. Cwinye otur matek  mumiyo en ‘openyo ni myero eto woko.’ Gin ango ma oweko en owinyo kit meno? Elia onongo obedo dano ma tye ki roc, “dano ma kite cal kwedwa.” (Yak. 5:17) Twero bedo ni en owinyo ni dong eol ma pe etwero kanyone. Elia nen calo otamo ni yellene me konyo dano me woro Jehovah opoto nono, pe tye gin mo i lobo Icrael ma olokke maber, dok en kene aye pud etye ka tic pi Jehovah. (1 Luker 18:3, 4, 13; 19:10, 14) Watwero bedo ki ur pingo lanebi ma lagen-ni owinyo kit meno. Ento Jehovah oniang kit ma Elia onongo winyo kwede.

⁶ Jehovah pe oda i wi Elia pi tito tamme. Me ka meno, en okonyo Elia me nongo kero. (1 Luker 19:5-7) Lacen, Jehovah otiro tam pa Elia i yo me kica kun nyute teko ma En tye kwede. Jehovah bene otite ni en pud etye ki dano ma romo 7,000 kulu i Icrael ma gukwero woro Baal. (1 Luker 19:11-18) I yo magi, Jehovah okonyo Elia me niang ni emare adada.

7. Cuko cwiny ango ma wanongo ki i kit ma Jehovah okonyo kwede Elia?

⁷ Tika itye ka kato ki i peko mo ma keli par madwong? Tye me cuko cwiny adada me ngeyo ni Jehovah oniang kit ma Elia onongo winyo kwede! Man weko wabedo labongo akalakala mo ni en bene niang kit ma wawinyo kwede ka watye ka kato ki i peko. En ngeyo gorowa, dok bene ngeyo gin ma watye ka tamone. (Jab. 103:14; 139:3, 4) Ka walubo lanen pa Elia kun wajenge i kom Jehovah, en bikonyowa me kato ki i pekki ma keliwa par.​—Jab. 55:22.

8. Jehovah bikonyi nining me lweny ki par?

⁸ Par twero weko itamo ni kwoni pe bilokke pi berre, ci man weko cwinyi tur woko. Ka meno otimme, wi myero opo ni Jehovah bikonyi me lweny ki par. En bikonyi nining? En joli me nywako tam ma i cwinyi kwede. Dok en biwinyo kokoni pi kony. (Jab. 5:3; 1 Pet. 5:7) Pi meno, leg bot Jehovah i kom pekoni kare ki kare. En pe bilok kwedi atir atir kit ma oloko kwede ki Elia, ento bilok kwedi kun tiyo ki Lokke, Baibul kacel ki dulle. Lok ma ikwano i Baibul twero kweyo cwinyi dok mini gen. Medo i kom meno, omege ki lumege gitwero cuko cwinyi.​—Rom. 15:4; Ibru 10:24, 25.

9. Larem ma genne twero konyowa nining?

⁹ Jehovah owaco bot Elia ni opok ticce mogo bot Elica. I yo man, Jehovah omiyo ki Elia larem maber ma onongo twero konye me cirone ka cwinye otur. I yo acel-lu, ka watito kit ma wawinyo kwede bot laremwa mo macok, ci en twero konyowa me kanyo pekowa. (2 Luker 2:2; Car. 17:17) Ka iwinyo calo ipe ki ngat mo ma itwero tito pekoni bote, ci leg bot Jehovah wek okonyi me nongo Lakricitayo mo muteggi ma twero cuko cwinyi.

10. I yo ma nining ma gin mutimme i kom Elia-ni miniwa gen, dok cikke ma kicoyo i Icaya 40:28, 29 twero konyowa nining?

¹⁰ Jehovah okonyo Elia me lweny ki par dok en omedde ki ticce ki gen pi mwaki mapol. Gin mutimme i kom Elia-ni miyowa gen. I kine mukene wakato ki kwo matek ma weko wawinyo ni waol adada dok cwinywa otur. Ento, ka wajenge i kom Jehovah, en biminiwa kero ma wamito me medde ki tic pire.​—Kwan Icaya 40:28, 29.

11-13. Par ogudo lutic pa Lubanga adek me kare macon nining?

¹¹ Jo mukene ma kiloko i komgi i Baibul bene gukato ki i par mapol. Me labolle, Anna ociro lewic me bedo lalur kacel ki tim anywar pa nyeke ma onongo cwero cwinye matek. (1 Cam. 1:2, 6) Par madwong ma Anna obedo kwede oweko kiniga omake matek ma obedo ka koko dok mitine me cam orwenyo woko.​—1 Cam. 1:7, 10.

¹² Kabaka Daudi obedo ki par mapol i kine mukene. Cwinye obedo ka pide matek pi bal ma en otimo. (Jab. 40:12) Wode ma en maro, Abcalom, ojemo i kome, dok jemo man okelo wa to pa Abcalom. (2 Cam. 15:13, 14; 18:33) Dok larem Daudi macok adada olokke woko i kome. (2 Cam. 16:23–17:2; Jab. 55:12-14) Pol pa jabuli ma Daudi ocoyo nyuto tur cwinye kacel ki genne matek i kom Jehovah.​—Jab. 38:5-10; 94:17-19.

¹³ Lacen, laco jabuli mo nyeko ocako make i kom kwo pa jo maraco ma gurume. En nen calo obedo lakwar Lalevi Acap, dok onongo tiyo i “ot maleng pa Lubanga.” Laco jabuli man cwinye otur ma oweko en obedo labongo yomcwiny dok pe oyeng ki kwone. En ocako bedo ki akalakala ka ce mot mo tye i tic pi Jehovah.​—Jab. 73:2-5, 7, 12-14, 16, 17, 21.

14-15. Ngo ma wapwonyo ki i labol adek me Baibul i kom yenyo kony ki bot Jehovah?

¹⁴ Lutic pa Lubanga adek ma kiloko i komgi-ni gujenge i kom Jehovah pi kony. Gin gutito pargi bote i lega.  Guloko agonya kwede i kom tyen lok mumiyo onongo gitye ki par mapol. Dok gumedde ki cito i kabedo me woro Jehovah.​—1 Cam. 1:9, 10; Jab. 55:22; 73:17; 122:1.

¹⁵ Ki kica, Jehovah ogamo legagi ducu. Anna onongo kwe cwiny. (1 Cam. 1:18) Daudi ocoyo ni: “Dano ma kite atir limo can madwong; ento Rwot [Jehovah] larre ki i canne ducu.” (Jab. 34:19) Dok laco Jabuli ma lakwar Acap-pi lacen owinyo calo Jehovah ‘obedo ka mako cinge ma lacuc,’ kun tele i yo me mar. En owero ni: “Ki tung bota, bedo cok ki Lubanga aye ber; in Rwot Lubanga aye dong idoko ka larrena.” (Jab. 73:23, 24, 28) Gin ango ma wapwonyo ki i labol magi? Wapwonyo ni, i kine mukene, wakato ki i pekki madongo ma keliwa par. Ento waromo loyone ka walwodo lok i kom kit ma Jehovah okonyo kwede jo mukene, wajenge i kome i lega, dok watimo gin ma en mito.​—Jab. 143:1, 4-8.

16-17. (a) Pingo pe omyero wakone kenwa ki bot Jehovah ki jone? (b) Watwero nongo kero odoco nining?

¹⁶ Labol adek magi miyowa pwony mukene ma pire tek​—pe omyero wakone  kenwa ki bot Jehovah kacel ki jone. (Car. 18:1) Nancy, ma owok ki i cwercwiny madit i kare ma cware okwere, owaco ni: “Tye nino mapol ma onongo pe amito neno nyo lok ki ngat mo keken. Ento, ka amedde ki bedo kena kena, cwinya bene onongo cwer medde ameda.” Jami olokke i kare ma Nancy ocako yenyo yo me konyo jo mukene ma gitye i peko. En owaco ni: “Aciko ita ka jo mukene gitye ka titta peko ma gitye ka lweny kwede. Aniang ni ka kica omaka i komgi, ci pe abedo ka paro pekona.”

¹⁷ Watwero nongo kero ki cito i cokke. Ka watye i cokke, wamiyo Jehovah kare me ‘kweyo cwinywa ki konyowa.’ (Jab. 86:17) Ki kunnu, en jingowa kun tiyo ki cwiny mere maleng, Lokke, ki dong jone. Cokke miyowa kare me ‘cuko cwinywa kekenwa.’ (Rom. 1:11, 12) Laminwa mo ma nyinge Sophia owaco ni: “Jehovah ki utmegiwa gukonya me medde ki ciro peko. Gin ma dong okonya loyo obedo cokke pa Lukricitayo. Anongo bene ni ka acito i ticwa me pwony kacel ki jo me kacokke, ci anongo kero me lweny ki par kacel ki pekona.”

18. Ka cwinywa otur, ngo ma Jehovah bimiyowa?

¹⁸ Ka cwinywa otur, wiwa myero opo ni Jehovah pe ocikke me kwanyo par i lobo manyen keken ento kadi kombeddi en konyowa me lweny ki par. En miyowa “miti ki teko” me lweny ki tur cwiny kacel ki tam ni konywa pe.​—Pil. 2:13.

19. Jo Roma 8:37-39 cuko cwinywa nining?

¹⁹ Kwan Jo Roma 8:37-39. Lakwena Paulo ocuko cwinywa ni pe tye gin mo keken ma twero pokowa woko ki i kom mar pa Lubanga. Watwero konyo omegiwa ki lumegiwa ma gitye ka lweny ki par nining? Pwony ma lubo man binyamo kit ma waromo lubo kwede lanen pa Jehovah ki nyuto kica dok ki konyo omegiwa ki lumegiwa ma gitye ki par.