ARIYA: Ngico nyo lyeto piny ki lumone me lok me ada pe gumedde ki balone. Ento, jo mogo ma gukobo ki gugonyo Baibul gutemme me loko kwena ma i iye. Kitungcel bene, gutute me loko lok ma i Baibul me rwatte ki pwonygi ma ka loko pwonygi me rwatte ki lok ada ma tye i Baibul. Nen kong labol magi:

• Kabedo me woro: I kine ka cencwari me angwen ki aryo K.M.P., jo ma gucoyo Baibul me Samaritan Pentateuch guketo i agikki me Nia 20:17 lok ni “i Aargaareezem. Kenyo kibigero iye keno tyer.” Jo magi onongo gimito loko Ginacoya wek ocwak tamgi me gero ot pa Lubanga i “Aargaareezem,” nyo i wi Got Gerizim.

• Niye i kom Triniti: I nge mwaki ma pe kato 300 ma kityeko coyo kwede Baibul, ngat mo ma tye ki niye i kom Triniti omedo i 1 Jon 5:7 lok ni “i polo, Won, Lok, Cwiny Maleng: dok gin adek-ki ducu gitye acel.” Lokki pe i ginacoya macon. Bruce Metzger ma okwano Baibul i yo matut owaco ni: “Nicakke i cencwari me abicel, lok meno onongo tye tyen mapol adada i ginacoya me leb Latin macon ki ma kicoyo lacen ma kilwongo ni Vulgate.”

• Nying maleng: Ma lubbe ki tekwaro pa Lujudaya, lugony Baibul gumoko tamgi me kwanyo nying Lubanga woko ki i Ginacoya. Guleyo kakare ki nying me dog tic calo “Lubanga” nyo “Rwot,” nying dog tic magi ma tye i Baibul pe kilwongo ki Lacwec keken ento bene kilwongo ki co mogo, jami mogo ma gitiyo kwede i woro me goba, ki bene i kom Larac.​—Jon 10:34, 35; 1 Jo Korint 8:5, 6; 2 Jo Korint 4:4. *

KIT MA BAIBUL OBWOT KWEDE: Me acel, kadi bed ni lugony Baibul mogo pe guketo cwinygi i kom ticgi nyo bene gucoyo lok goba, jo mukene onongo gitye ki ngec matut adada ki dok guketo cwinygi i  ticgi. I kine cencwari me abicel me o i apar K.M., lukwan mogo ma onongo gitye ki ngec i kom coc me leb Ibru gukobo Ginacoya meno i leb Ibru. Gubedo ka neno Ginacoya ducu kore ki kore me niang ka lok ducu kikobo maber. Ka ma onongo gitamo ni bal mo tye iye, gucoyo lok mo macek i tenge. Jo ma gugonyo Baibul i leb Ibru pe guye me loko nyo medo gin mo keken.” Moshe Goshen-Gottstein, ngat ma onongo tye ki ngec matut i kom Ginacoya me leb Ibru ocoyo ni: “Temo nyweno lok mo keken onongo twero bedo bal madit adada.”

Me aryo, ginacoya macon ma gitye i kare-ni konyo lukwed lok me Baibul adada me neno ka bal mo tye i Baibul. Me labolle, pi cencwari mapol lupwonye dini gubedo ka pwonyo dano ni Ginacoya me leb Latin aye ma tye atir loyo ducu. Ento inongo ni i 1 Jon 5:7, gumedo lok mogo ma waloko iye i acakki me pwony man. Bal meno bene okato wa i Baibul me leb muno me King James Version! Ento i kare ma kinongo ginacoya macon, ngo ma onen ka maleng? Bruce Metzger ocoyo ni: “Nyig lok ma i 1 Jon 5:7 onongo pe i ginacoya magi (Syriac, Coptic, Armenian, Ethiopic, Arabic, Slavonic), ento onongo tye i leb Latin keken.” Macalo adwogine, kigoyo Baibul me King James Version odoco ma onongo dong kikwanyo coc meno ki iye woko.

Tika ginacoya macon nyuto ni pe kiloko kwena ma i Baibul? I kare ma kinongo ginacoya i Dead Sea i mwaka 1947, lukwan matut onongo dong gitwero poro Ginacoya me leb Ibru ki kwena ma tye i Baibul ma kicoyo mwaki alip mapol angec. Ngat mo ma onongo tye i kin jo ma gubedo ka ngiyo ginacoya ma kinongo ki i Dead Sea owaco ni ginacoya acel keken “omoko caden ni meno coc me Baibul ma Lujudaya gubedo ka kobone ma dong orii mwaki miya mapol onongo tye kakare labongo roc mo keken.”

Ka gwoko buk mo ma kilwongo ni Chester Beatty ma tye i Dublin, Ireland, tye ki Ginacoya me leb Grik mapol ma onongo kicoyo i kolo, i kine onongo tye ginacoya ma cakke ki i cencwari me aryo K.M.​—i nge mwaki 100 keken ma onongo dong kityeko coyo Baibul woko. Dikconari ma kilwongo ni The Anchor Bible waco ni: “Kadi bed ni coc man ma kicoyo i kolo-ni onongo tye ki ngec ma pire tek adada, ento gunyuto bene ni kikobo coc ma i Baibul macon kore ki kore.”

ADWOGINE: Ma ka nyweno lok ma i Baibul, coc macon okonyo oweko pe kiloko kwena ma i Baibul.” Sir Frederic Kenyon ocoyo lok i kom Ginacoya me leb Grik ni: “Pe tye coc mo macon ma tye ki ngec matir dok ma niange calo coc magi, ki dok pe tye ngat mo maryek ma twero kwerone ni lok man oa ki bot ngat ma niang adada.” Ma lubbe ki Ginacoya me Ibru, William Henry Green owaco ni: “Pe tye coc mo keken ma watwero wacone ni kikobo kakare makato man.”