Lanyut tye ma moko ni Yecu odoko Lalamdog Madit i nge nongo batija i mwaka 29 K.M. Wangeyo man nining? I kare ma Yecu onongo batija, en onyuto ni etye atera me dyero kwone macalo lanyut i wi keno tyer ma cung pi gin ma Lubanga “mito.” (Gal. 1:4; Ibru 10:5-10) Kit macalo keno tye obedo gin ma pire tek adada i ot pa Lubanga-ni, ot pa Lubanga i yo me cwiny nen calo ocako tic nicakke i kare ma Yecu onongo batija. Ot pa Jehovah i yo me cwiny cung pi jami ducu ma weko twere botwa me wore i yo ma atir kun nongo jenge i kom ginkok pa Yecu.​—Mat. 3:16, 17; Ibru 5:4-6.

Onongo mitte ni lalamdog madit obed tye i ot pa Lubanga. Me cobo meno, Jehovah owiro Yecu me bedo lalamdog madit ‘ki cwiny maleng kacel ki teko.’ (Tic 10:37, 38; Mar. 1:9-11) Kadi bed kit meno, watwero moko nining ni kicimo Yecu macalo Lalamdog Madit ma peya en oto dok kicere? Labol pa Aron kacel ki lulamdog mukene ma gutiyo i nge en bikonyowa me gamo lapeny man.

Cik ma Jehovah omiyo bot Moses waco ni, lalamdog madit keken aye myero odony i Kabedo Maleng Makato Ducu i kema me woro, ki lacen i ot pa Lubanga. Onongo kipoko kin Kabedo Maleng Makato Ducu ki Kabedo Maleng kun kitiyo ki bongo. Lalamdog madit onongo kato i nge bongo i Nino me Kwanyo Bal keken. (Ibru 9:1-3, 6, 7) Kit macalo Aron ki likwayone onongo kiwirogi macalo lulamdog ma peya gudonyo “i nge bongo kicika” me kema me rwatte, Yecu bene myero obed ni kiwire macalo Lalamdog Madit me ot pa Jehovah ma peya en oto ci i ngeye odonyo ‘i nge bongo kicika; ma en aye kome’ me cito i polo. (Ibru 10:20) Pi tyen lok man, lakwena Paulo oloko i kom bino pa Yecu macalo “ajwaka [lalamdog] madit” ci i ngeye en owaco ni Yecu okato ki i kema “maber makato maca, pien pe gitiyo ki cing,” ci odonyo i “polo kikome.”​—Ibru 9:11, 24.

I kare ma Yecu odok i polo, en omiyo kome ma pe ki roc-ci pi kokowa, dok man oweko twere ki gicikke manyen-ni me cako cobbe. Jami mene ma gutimme wek gicikke man ocak cobbe?

Mukwongo, Yecu ocito i nyim Jehovah; ci omiyo kwone macalo gityer bot Jehovah; ka dong, Jehovah ojolo wel me remo pa Yecu ma oony. Jami magi ducu kong gutimme ka dong gicikke manyen man ocako tic.

Baibul pe tittiwa awene kikome ma Jehovah ojolo kwede gityer ma Yecu omiyo. Kit meno, pe watwero tito awene kikome ma gicikke manyen-ni kimoko iye ki dok kare ma ocako tic iye. Ento, wangeyo ni Yecu odok i polo nino apar ma peya nino me Pentekote oromo. (Tic 1:3) I kine me nino apar man, en omiyo wel me remone macalo ginkok bot Jehovah ci ojolo. (Ibru 9:12) I nino me Pentekote, dano guneno ki wanggi gin ma moko ni gicikke manyen onongo dong ocako tic. (Tic 2:1-4, 32, 33) Labongo akalakala mo, gicikke manyen man onongo dong kimoko dok ocako cobbe.

Me dolone, gicikke manyen-ni kimoko dok ocako cobbe i kare ma Jehovah ojolo wel me remo pa Yecu ma oony. I nge meno, gicikke man ocako tic kun Yecu tiyo macalo Lalamdog Madit, dok macalo Ngat ma ribo kin Lubanga ki dano.​—Ibru 7:25; 8:1-3, 6; 9:13-15.