1. Gin ango ma Jehovah otito ni bitimme i karewa-ni?

JEHOVAH otito wacon pi karewa-ni ni: “Jo apar ma gua ki i lwak rok ma lebgi patpat gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubanga tye kwedwu.’” (Jek. 8:23) “Lajudaya” ma kiloko i kome-ni cung pi jo ma Lubanga owirogi ki cwiny maleng. Kilwongogi bene ni “Luicrael pa Lubanga.” (Gal. 6:16, NW.) ‘Jo apar-ni’ cung pi jo ma gitye ki gen me kwo pi naka i lobo. Gingeyo ni Jehovah oyero gurup pa jo ma kiwirogi man dok giwinyo ni obedo mot me woro Lubanga kacel kwedgi.

2. I yo ma nining ma ‘jo apar-ri’ ‘giwoto’ kacel ki jo ma kiwirogi?

² Kadi bed pe twere me ngeyo nying jo ducu ma kiwirogi ma gitye i lobo i kare-ni, * jo ma gitye ki gen me kwo i lobo pud gitwero “wot” kacel ki jo ma kiwirogi. Man timme nining? Baibul waco ni “jo apar” “gibimako dog kanyi pa Lajudaya, kun giwacci, ‘Wek wanywak wot kwedi, pien wawinyo ni Lubanga tye kwedwu.’” Acakki me tyeng man loko i kom Lajudaya acel. Ento i agikkine waco ni “kwedwu.” Man tyen lokke ni Lajudaya man pe obedo dano acel keken ento cung pi lwak jo ducu ma kiwirogi. Jo ma pe kiwirogi gitiyo pi Jehovah kacel ki jo ma kiwirogi.  Ento, pe gineno jo ma kiwirogi calo lutelagi, pien gingeyo ni Yecu aye Latelagi.​—Mat. 23:10.

3. Lapeny mene ma kibigamogi i pwony man?

³ Kit macalo jo ma kiwirogi pud gitye ka kwo i kinwa i kare-ni, watwero bedo ki lapeny calo: (1) Jo ma kiwirogi omyero gunene kekengi nining? (2) Omyero water jo ma gimato vino dok gicamo mugati i Nipo nining? (3) Tika omyero wabed ki par ka wel jo magi medde ameda? Pwony man bigamo lapeny magi.

4. Cik ango ma tye i 1 Jo Korint 11:27-29 ma mitte ni jo ma kiwirogi gutam iye, dok pingo?

⁴ Jo ma kiwirogi omyero gutam matut i kom lok me ciko dano ma nonge i 1 Jo Korint 11:27-29. (Kwan.) Dano ma kiwiro twero camo mugati nyo mato vino i Nipo kun nongo “kite pe myero” nining? Man timme ka en ocamo dok omato kun nongo pe tye ka kwo ma lubbe ki rwom me kit ma atir pa Jehovah. (Ibru 6:4-6; 10:26-29) Ngat ma kiwiro ngeyo  ni omyero egwok gennene ka wek enong ‘mot, ma en aye lwongo ma Lubanga tye ka lwongogi kwede malo i Kricito Yecu.’​—Pil. 3:13-16.

5. Lukricitayo ma kiwirogi omyero gunene kekengi nining?

⁵ Cwiny maleng pa Jehovah konyo luticce me bedo jo mamwol ento pe luwakke. (Ep. 4:1-3; Kol. 3:10, 12) Pi meno, jo ma kiwirogi pe giwinyo calo giber giloyo jo mukene. Gingeyo ni Jehovah pe miyo bot jo ma kiwirogi cwiny maleng madwong loyo bot jo ma pe kiwirogi. Pe giwinyo calo giniang lok ada me Baibul i yo matut loyo jo mukene. Dok pe gitito ki jo mukene ni kiwirogi dok omyero gin bene gucak mato vino ki camo mugati i Nipo. Me ka meno, giye ki mwolo ni Jehovah keken aye ma lwongo dano me cito i polo.

6. Ma lubbe ki 1 Jo Korint 4:7, 8, jo ma kiwirogi omyero kitgi obed nining?

⁶ Kadi bed jo ma kiwirogi giwinyo calo obedo twon mot madit me cito i polo, ento pe gitamo ni jo mukene omyero otergi i yo ma kite dok pat. (Pil. 2:2, 3) Gin bene gingeyo ni i kare ma Jehovah owirogi, en pe oweko dano ducu gungeyo lok man. Pi meno Lakricitayo ma kiwiro pe myero obed ki ur ka jo mukene pe giye cutcut ni kiwire. En ngeyo ni Baibul tittiwa ni pe omyero waye oyotoyot lok pa ngat ma wacci Lubanga omine tic ma kite dok pat. (Yabo 2:2) Kit macalo en pe mito ywayo tam pa dano i kome, Lakricitayo ma kiwiro pe tito ki dano ma en orwatte kwede tyen mukwongo ni kiwire. Dok en pe myero owakke pire bot jo mukene.​—Kwan 1 Jo Korint 4:7, 8.

7. Gin ango ma jo ma kiwirogi gigwokke ki timone, dok pingo?

⁷ Lukricitayo ma kiwirogi pe giwinyo calo omyero gibed ki jo ma kiwirogi keken, calo iwacci gitye lumemba me gurup mo ma kite dok pat. Pe giyenyo jo ma kiwirogi mukene, wek ginywak lok i kom kit ma kiwirogi kwede nyo giyub gurup me kwano Baibul. (Gal. 1:15-17) Kacokke pe bibedo ma onote ka jo ma kiwirogi gutimo jami magi. Nongo gitye ka lweny i kom teko pa cwiny maleng, kun cwiny man aye weko jo pa Lubanga gibedo ki kuc dok ma gunote.​—Rom. 16:17, 18.

8. Pingo omyero igwokke adada ka odok i kom kit ma itero kwede jo ma gicamo mugati dok gimato vino i Nipo? (Nen bene lok ma tye i tere piny.)

⁸ Omyero water omege ki lumege ma kiwirogi nining? Pe pore ki wan me keto cwinywa tutwal i kom dano mo keken, kadi bed en tye i kin omegi Kricito. (Mat. 23:8-12) Ka Baibul oloko i kom luelda, cuko cwinywa me ‘lubo niyegi,’ ento pe wacciwa ni waket dano mo odok latelawa. (Ibru 13:7) Tye lok ada gire ni Baibul waco ni jo mukene myero “giworgi twatwal.” Man tye pien ‘giloyo loc i yo maber’ dok ‘giyelle ka tito lok ki pwonyo dano,’ ento pe pien ni gitye jo ma kiwirogi. (1 Tem. 5:17) Ka wamiyo pwoc ki pak mukato kare woko bot jo ma kiwirogi, ci man twero weko lewic makogi. * Nyo bene ma rac loyo, watwero weko gidoko luwaka. (Rom. 12:3) Pe wamito ni watim gin mo ma twero weko omegi Kricto gipoto i bal madit kit man!​—Luka 17:2.

9. Watwero nyuto nining ni waworo jo ma Jehovah owirogi?

⁹ Watwero nyuto nining ni waworo jo ma Jehovah owirogi? Pe omyero wapenygi kit ma kiwirogi kwede. Man obedo lok ma gudo ngat acel acel, dok pe mitte ni omyero wange. (1 Tem. 5:13; 2 Tec. 3:11) Dok pe omyero watam ni cware, dakone, lunyodone, nyo jo mukene ma gange kiwirogi. Ngat moni pe lako gene me cito i polo ki bot lupacone. En nongo gen man ki bot Lubanga. (1 Tec. 2:12) Mitte bene ni wagwokke ki penyo lapeny ma twero cwero cwiny jo mukene. Me labolle, pe omyero wapeny dako pa omego ma kiwiro kit ma en winyo kwede ni ebibedo i lobo pi naka labongo cware. Watwero bedo ki gen matek ni i lobo manyen, Jehovah ‘bimiyo gin makwo ducu giyeng.’​—Jab. 145:16.

10. Wagwoko watwa ki Jehovah nining ka pe ‘wadworo dano’?

¹⁰ Ka pe watero jo ma kiwirogi calo pigi tek kato jo mukene, nongo watye ka gwokke kekenwa. I yo ma nining? Baibul wacciwa ni jo mogo ma kiwirogi pe gibimedde ki bedo lugen. (Mat. 25:10-12; 2 Pet. 2:20, 21) Ento ka wagwokke ki ‘dworo dano,’ ci pe wabilubo kor jo mukene, kadi wa jo ma kiwirogi nyo jo ma gingene matek nyo jo ma gutiyo pi Jehovah pi mwaki mapol. (Juda 16) Dong, ka guturo gennegi nyo ka gua woko ki i kacokke, pe wabirwenyo niyewa i kom Jehovah nyo wajuko tic pire.

11. Gin ango ma tye ka timme madok i kom wel dano ma gimato vino dok gicamo mugati i Nipo?

¹¹ Pi mwaki mapol, wel dano ma gicamo mugati dok gimato vino i Nipo obedo ka dok piny. Ento i mwaki mogo ma cokcok-ki welgi dok tye ka medde mwaka ki mwaka. Tika man myero owek wabed ki par? Pe. Kong dong wanenu lok mogo ma pigi tego ma omyero wiwa opo iye.

12. Pingo omyero pe wabed ki par i kom wel jo ma gicamo mugati dok gimato vino i Nipo?

¹² “Rwot ngeyo jo ma gin jone kikome.” (2 Tem. 2:19) Jehovah pe tye calo omege ma gikwano wel jo ma gimato dok gicamo i Nipo, kun pe gingeyo  anga kikome ma kiwiro. Pi meno, wel man kwako wa jo ma gitamo ni kiwirogi kun pe. Me labolle, jo mogo con onongo gicamo dok gimato ento lacen gujuko woko. Jo mukene twero bedo ni gitye ki two wic nyo cwinygi otur ma weko gitamo ni gibiloc kacel ki Kricito i polo. Ki lok ada pe wangeyo wel jo ma kiwirogi kikome ma gudong i lobo i kare-ni.

13. Tika Baibul tito wel jo ma kiwirogi ma gibibedo tye i lobo i kare ma twon can madit atika bicakke?

¹³ Jo mapol ma kiwirogi gibibedo tye i twok lobo-ni i kare ma Yecu bidwogo cen ka gamogi me terogi i polo. (Mat. 24:31) Baibul pe waco ni i kare me agikki wel jo ma kiwirogi bibedo manok i lobo. (Yabo 12:17) Pe bene tito wel jo ma kiwirogi ma gibibedo tye i lobo i kare ma twon can madit atika-ni bicakke.

14. Kit ma kinyuto kwede i Jo Roma 9:11, 16, gin ango ma omyero waniang iye madok i kom yero jo ma kiwirogi?

¹⁴ Jehovah aye ma moko kare me yero jo ma kiwirogi. (Rom. 8:28-30) Jehovah ocako yero jo ma kiwirogi i nge cer pa Yecu. Nen calo i cencwari me acel Lukricitayo me ada ducu onongo kiwirogi woko. I cencwari ma lubo, pol pa jo ma giwaco ni gin Lukricitayo onongo pe gitye lulub kor Kricito me ada. Kadi bed kit meno, i kare magi ducu Jehovah owiro jo manok ma gubedo Lukricitayo me ada. Gin onongo gitye calo kal ma Yecu owaco ni bidongo i kin doo. (Mat. 13:24-30) I kare me agikki, Jehovah pud  tye ka medde ki yero dano ma gibibedo but jo 144,000. * Pi meno, ka Lubanga omoko tamme me yero jo mogo i kare man ma agikki dong cok o-ni, pe omyero wabed ki akalakala mo i kom ryekone. (Kwan Jo Roma 9:11, 16.) * Pe myero wabed calo lutic ma Yecu otito i laporre. Gubedo ka nguru i kom ladit ticgi pi kit ma en otero kwede jo ma gucako tic lacen i cawa me agikki.​—Mat. 20:8-15.

15. Tika jo ma kiwirogi ducu gitye i kin “lagwok ot ma lagen dok maryek” ma kitito pire i Matayo 24:45-47? Tit kong.

¹⁵ Pe jo ducu ma gitye ki gen me kwo i polo gitye i kin “lagwok ot ma lagen dok maryek.” (Kwan Matayo 24:45-47.) Kit macalo Jehovah ki Yecu gutimo kwede i cencwari me acel, i kare-ni bene gitye ka tic ki omege manok me miyo cam nyo pwonyo jo mapol. Lukricitayo manok keken ma kiwirogi i cencwari me acel aye kitiyo kwedgi me coyo Ginacoya me leb Grik. I kare-ni, Lukricitayo manok keken aye gitye ki mot me ‘poko cam i kare ma mitte.’

16. Gin ango ma wapwonyo ki i pwony man?

¹⁶ Ngo ma wapwonyo ki i pwony man? Jehovah oyero me miyo kwo ma pe tum i lobo bot pol pa jone ki kwo i polo bot jo manok ma gibiloc kacel ki Yecu. Jehovah miyo mot bot luticce ducu—​“Lajudaya” kacel ki “jo apar”​—dok en mito ni gin ducu gulub cik acel dok gugwok gennegi. Gin ducu omyero gubed mwol. Gin ducu omyero guti pire kacel dok ma gunotte. Dok gin ducu omyero guti matek me gwoko kuc i kacokke. Ka wawoto ki nyikke cok ki agikki, wamedde wunu ki tic pi Jehovah kacel kun walubo Kricito macalo “lwak acel.”​—Jon 10:16.