1. Pingo lutic pa Jehovah mogo giwinyo calo gitye kengi?

WAN ducu i kare mogo wawinyo calo watye kenwa. Pi jo mukene, tam ma kit man bedo pi kare manok keken ci rwenyo woko. Jo mogo giwinyo ni gitye kengi pi kare malac adada. Watwero winyo ni watye kenwa kadi bed watye i kin lwak dano mapol. Jo mogo ginongo ni tek adada me mako lirem ka gukobo i kacokke manyen. Jo mukene doki, gia ki i paco ma wat i kingi cok adada, dok ka gukobo i kabedo ka ma wadigi pe iye, giwinyo calo gitye kengi. Jo mogo doki, gibedo kickic pien nongo gitye ka paro danogi me amara ma oto. Dok Lukricitayo mogo, tutwalle jo ma pud gupwonyo ada nyen, gibedo kickic ka wadigi nyo luremgi macon ma pe giworo Jehovah gucako keto aunauna i komgi nyo gukwerogi woko.

2. Lapeny mene ma wabigamogi i pwony man?

² Jehovah ngeyo dok niang jami ducu madok i komwa. Ka watye ka winyo ni watye kenwa, en niang meno dok nongo tye atera me konyowa loyo tam meno. Jehovah konyowa nining? Ngo ma watwero timo me konnye kekenwa? Dok watwero konyo jo mogo ma i kacokkewa ma giwinyo calo gitye kengi nining? Kong dong wanyamu lagam pi lapeny magi.

3. Jehovah onyuto nining ni eparo pi Elia?

³ Jehovah tye ki miti matek adada i kom ber bedo pa jo ma wore ducu. En tye cok ki wan ducu ki acel acel, dok en neno ka cwinywa otur pi tam maraco ma watye kwede. (Jab. 145: 18, 19) Nen kong kit ma Jehovah ongeyo kwede jami ducu ma onongo tye ka timme i kwo pa lanebine Elia. Laco ma lagen man okwo i kare marac adada i tekwaro pa Luicrael. Jo ma onongo gitye ki twero i lobo Icrael onongo pe gimaro Jehovah dok gubedo ka uno jo ma wore, tutwalle onongo gimito neko Elia. (1 Luker 19:1, 2) Gin mukene ma nen calo oturo cwiny Elia obedo tam ni en kene aye edong macalo lanebi ma tye ka tic pi Jehovah. (1 Luker 19:10) Oyotoyot, Lubanga otimo gin mo me konyo Elia. Jehovah ocwalo lamalaika me cuko cwiny Lanebine ni en pe tye kene​—ni pud tye Luicrael mapol ma gitye ka tic pi Jehovah ki gen!​—1 Luker 19:5, 18.

4. I yo ma nining ma Marako 10:29, 30 nyuto ni Jehovah paro pi luticce ma wadigi nyo luremgi macon pe konyogi?

⁴ Jehovah ngeyo ni ka wayero me tic pire, ci jo mogo i kinwa omyero guyer me jalo jami mapol adada. Jami ma twero mitte ni wajal twero bedo kony ma onongo wanongo ki bot wadiwa ki luremwa ma pe giworo Jehovah. Twero bedo ni lakwena Petero onongo tye ki par i kare ma openyo Yecu ni: “Wan waweko jamiwa ducu ci walubi. Wabinongo iye gin ango?” (Mat. 19:27) Ki mar, Yecu ocuko cwiny lupwonnyene ni jo me kacokke gibidoko calo jo me pacogi. (Kwan Marako 10:29, 30.) Dok Jehovah, ma en aye lawi ot meno, ocikke ni ebikonyo jo ducu ma gimito tic pire. (Jab. 9:10) Nen kong jami mogo ma itwero timone wek inong kony pa Jehovah me lweny ki tam ni itye keni.

5. Pingo pire tek me lwodo kit ma Jehovah tye ka konyi kwede?

⁵ Ket cwinyi i kom kit ma Jehovah tye ka konyi kwede. (Jab. 55:22) Man bikonyi me niang ni ipe keni. Laminwa mo ma wiye nono ma nyinge Carol, * dok watte mo pe i ada owaco ni: “Ka alwodo kit ma Jehovah okonya kwede me kanyo pekki mapatpat, man weko awinyo ni pe atye kena. Man cuko cwinya ni Jehovah bibedo kweda kare ducu i anyim.”

6. I yo ma nining ma 1 Petero 5:9, 10 twero cuko cwiny jo ma giwinyo ni gitye kengi?

 ⁶ Tam i kom kit ma Jehovah tye ka konyo kwede luye luwoti mukene ma gin bene gitye ki peko. (Kwan 1 Petero 5:9, 10.) Hiroshi, omego mo ma wiye nono dok pi mwaki mapol watte mo keken pe tye Lacaden owaco ni: “I kacokke atwero neno ni dano ducu gitye ki peko. Ngeyo ni wan ducu watye ka tute ki kerowa ducu me tic pi Jehovah cuko cwinywa wan jo ma watwa mo keken pe i ada.”

7. Lega konyi nining?

⁷ Bed ki yub maber me lega, kwano Baibul, ki cito i cokke kare ki kare. Man kwako tito ki Jehovah kit ma iwinyo kwede kikome. (1 Pet. 5:7) Laminwa mo ma nyinge Massiel owaco ni: “Gin ma okonya me lweny ki tam ni atye kena aye lega ki cwinya ducu bot Jehovah.” I kare ma laminwa man matidi-ni omoko tamme me tic pi Jehovah, en owinyo ni etye kickic pien jo me ganggi pe gitiyo pi Jehovah. En omedo ki waco ni: “Jehovah obedo Wora kikome, dok onongo alego bote nino ducu, tyen mapol i nino acel acel, kun atitte kit ma awinyo kwede.”

8. Kwano ki lwodo Lok pa Lubanga konyi nining?

⁸ Kwan Lok pa Lubanga nino ducu, dok ilwod bute ma nyuto mar pa Jehovah piri. Laminwa Bianca, ma tye ka ciro cac ma a ki bot jo me ganggi, otito ni: “Kwano ki lwodo lok me Baibul ki gin mutimme i kwo pa Lucaden me kare-ni ma gukanyo pekki macal ki mega konya adada.” Lukricitayo mogo gimako i wigi ginacoya ma cuko cwinygi, me labolle Jabuli 27:10 ki Icaya 41:10. Jo mogo giwinyo dwan ma kimako ki i kabedowa me Intanet, ka gitye ka yubbe pi cokke nyo ka gitye ka kwano Baibul. Giwaco ni man konyogi pe me winyo ni gitye kengi.

9. Bedo tye i cokke konyi nining?

⁹ Tute ki keroni ducu me bedo tye i cokke kare ki kare. Yub me cokke bicuko cwinyi adada, dok ibibedo ki kare me ngeyo omegini ki lumegini. (Ibru 10:24, 25) Laminwa Massiel, ma kiloko i kome con-ni owaco ni: “Kadi bed an onongo lalewic adada, amoko tamma me bedo tye i cokke ducu ki me miyo lagam. Man okonya me bedo cok ki omege ki lumege ma i kacokke.”

10. Pingo pire tek me mako lirem ki Lukricitayo ma lugen?

¹⁰ Mak lirem ki Lukricitayo ma lugen. Mak lirem ki jo ma i kacokke ma itwero lubo lanengi. Gitwero bedo jo ma mwakagi nyo kabedo ma gia ki iye pat ki megi. Baibul poyo wiwa ni “ryeko bedo bot jo muti.” (Yubu 12:12) Jo mutegi bene gitwero nongo  pwony ki bot jo matino ma gitye lugen. Daudi onongo tidi adada ka kiporo ki Yonacan, ento man pe ogengogi ki mako lirem macok. (1 Cam. 18:1) Daudi ki Yonacan gukonnye i kingi wek gumedde ki tic pi Jehovah kadi bed gukato ki i ariya mapol. (1 Cam. 23:16-18) Laminwa Irina ma watte mo keken pe tye Lacaden owaco ni: “Utmegiwa gitwero doko lunyodowa nyo omegiwa ki lumegiwa kikome. Jehovah twero tic kwedgi me bedo jo me gangwa ma wamito kikome.”

11. Gin ango ma omyero itim wek idong lirem macok ki jo mukene?

¹¹ Mako lirem manyen pe twero bedo yot, tutwalle ka ibedo dano ma lalewic. Laminwa Ratna, ma lalewic ento otute me pwonyo ada kadi bed okato ki i aunauna otito ni, “Onongo mitte ni aye ni amito kony ki cwak pa omege ki lumege me kacokke.” Twero bedo tek adada me nywako kit ma iwinyo kwede ki ngat mukene, ento ka itimo man, ci ngat meno twero doko laremi macok. Luremi gimito konyi ki cuko cwinyi, ento omyero iwek gunge kit ma gitwero timo kwede meno.

12. Ticwa me pwony twero konyi nining wek imak lirem mabeco?

¹² Yo mukene ma watwero mako lirem ki Lukricitayo mukene aye ki tic kwedgi i ticwa me pwony. Carol, ma kiloko i kome con-ni owaco ni: “Amako lirem mabeco mapol adada ki i nywako ki lumege i tic me pwony kacel ki tic mukene ma kubbe ki worowa. Jehovah otiyo ki lurema ma lugen magi me konya i mwaki magi ducu.” Ber adada ka wamako lirem ki Lukricitayo ma lugen. Jehovah tiyo ki lurem ma kit man me konyowa lweny ki tam maraco calo tam ni watye kenwa.​—Car. 17:17.

13. Tic ango ma tye i wi jo ducu me kacokke?

¹³ Dano ducu gitye ki tic me dongo mar ki kuc i kacokke wek ngat mo pe obed kickic. (Jon 13:35) Gin ma watimo ki ma wawaco twero cuko cwiny jo mukene adada! Nen kong gin ma laminwa mo owaco: “I kare ma apwonyo ada, jo me kacokke gudoko calo jo me ganga kikome. Kono onongo pe pi konygi, onongo pe abidoko Lacaden pa Jehovah.” Ngo ma itwero timo me konyo jo ma watgi mo pe i ada wek guwiny ni omege ki lumege me kacokke marogi?

14. Ngo ma iromo timo me mako lirem ki jo manyen?

¹⁴ Tute me mako lirem ki jo manyen i kacokke. Ka waneno lutino kwan manyen ma gucako bino i cokke, omege ki lumege ma gukobo nyen i kacokkewa nyo jo ma gunongo batija nyen, wamito ni wajolgi ki yomcwiny. (Rom. 15:7) Ento pe wamito ni wagik ki motogi amota keken, wamito ni wadong lirem macok kwedgi. Pi meno, nyut cwiny me kica dok inyut ni iparo pigi matek. Labongo penyogi lapeny ma weko lewic makogi, tute me niang peko ma gitye ka kato ki iye. Mogo ginongo ni tek adada me tito kit ma giwinyo kwede, pi meno, gwokke pe idigi me lok. Me ka meno, penygi lapeny manok dok inyut ryeko ki diyo cwinyi kun iwinyo lokgi. Me labolle, itwero penyogi kit ma gucako ngeyo kwede ada.

15. Lukricitayo ma gutegi i yo me cwiny gitwero konyo jo mukene me kacokke nining?

¹⁵ Jo ducu me kacokke gibidongo i yo me cwiny ka Lukricitayo mutegi, tutwalle luelda ginyuto miti i komgi. Laminwa Melissa, ma odongo i cing mine ma tye Lacaden owaco ni: “Atye ki pwoc madit adada pi omege me  kacokke ma gubedo calo wegina i kare me dongona, ma gukwanyo kare me bedo kacel kweda dok gunyuto mar pira. Kare ducu ma onongo amito lok, onongo angeyo ngat ma atwero lok kwede kikome.” Omego matidi ma nyinge Mauricio, ma owinyo calo etye kene i kare ma lapwonye me Baibul oa woko ki i ada, otito ni: “Luelda gunyuto ni giparo pira adada dok man okonya matek. Onongo giloko kweda kare ki kare. Gutiyo kacel kweda i tic me pwony, gunywako kweda lonyo me cwiny ma gunongo i kwano Baibul pigi kengi, dok onongo watuko kacel.” Melissa ki Mauricio i kare-ni dong gitye ka tic i Betel.

16-17. Watwero konyo jo mukene iyo ma nen nining?

¹⁶ Mi kony i yo ma nen. (Gal. 6:10) Omego Leo ma tiyo macalo lamiconari i lobo mo mabor adada ki jo ganggi owaco ni: “Pol kare gin ma wamito obedo gin mayot ma nyuto cwiny me kica ma kitimo i cawa ma wamito kikome. Wiya po nino mo ma anongo akciden ki mutokana. I cawa ma ao gang onongo dong aol adada. Ento luot mo gulwonga ganggi ka camo cam mo matidi. Wiya pe po i kom dek ma wacamo, ento wiya po ni guwinyo lokka ki cwiny me kica adada. I agikkine onongo cwinya okwe dok atye ka winyo maber!”

¹⁷ Wan ducu wamaro cito i yub ma ribowa kacel ki luye luwotwa kun nongo wanyamo gin ma wawinyo, me labolle gure me adwol ki gure madito. Ento, laminwa Carol, ma kiloko i kome con-ni owaco ni, “Ka atye i gure me adwol nyo gure madito, awinyo ni atye kena.” Pingo? En omedde ni, “Kadi bed omege ki lumege miya nyo alip mapol guruma, pol kare nongo gitye kacel ki jo ganggi. Ka anenogi kit meno, abedo kickic adada.” Jo mukene giwinyo ni tek adada me bedo tye i gure madito nyo gure me adwol pi tyen mukwongo i nge to pa luotgi. Tika ingeyo ngat mo ma tye ka lweny ki ariya magi? Pingo pe ilwonge me cito kacel ki jo gangi i yub ma kit man ma obibedo tye i anyim?

18. Watwero keto i tic nining 2 Jo Korint 6:11-13 ka watye ka lwongo dano i gangiwa?

¹⁸ Kwany kare me bedo kacel kwedgi. Tute me lwongo omege mapatpat me bino ka namo kwedwu, tutwalle jo ma giwinyo ni gitye  kengi. Wamito ni ‘wayab cwinywa malac,’ tutwalle bot jo ma kit meno. (Kwan 2 Jo Korint 6:11-13.) Melissa ma kiloko i kome con-ni owaco ni: “Onongo yomo cwinywa adada ka luremwa me kacokke gulwongowa ka namo nyo me cito ka limo piny kwedgi.” Tika tye ngat mo i kacokkewu ma itwero lwonge i gangi?

19. Awene ma twero bedo me kony adada pi Lukricitayo mogo ka wakwanyo kare me bedo kacel kwedgi?

¹⁹ Tye kare mogo ma Lukricitayo luwotwa cwinygi bibedo yom adada ka wakwanyo kare me bedo kacel kwedgi. Jo mogo ginongo ni tek adada me bedo ki wadigi ma pe luye i kare me kwer mogo ma Baibul pe cwako. Jo mukene gibedo ki cwercwiny matek i nino mogo, me labolle, i nino dwe ma ngat ma gimaro oto iye. Ka wakwanyo kare me bedo ki omege ki lumege ma gitye ka kato ki i pekki calo magi, ci wanyuto ni ‘waparo pigi adada.’​—Pil. 2:20.

20. Lok pa Yecu ma kicoyo i Matayo 12:48-50 twero konyowa nining ka wawiny ni watye kenwa?

²⁰ Tye tyen lok mapol ma twero weko Lakricitayo moni winyo ni etye kene i kare mogo. Ento wiwa myero pe owil ni Jehovah ngeyo kit ma giwinyo kwede kikome. En miniwa gin ma wamito kun pol kare tiyo ki Lukricitayo luwotwa. (Kwan Matayo 12:48-50.) Wan bene wanyuto pwocwa bot Jehovah pi yubbe man me mar-ri ka watute ki kerowa ducu me konyo omegiwa ki lumegiwa. Kadi bed i kare mogo wawinyo ni watye kenwa, man pe tye ada pien Jehovah tye kwedwa kare ducu!