Kinywala i boma me Quebec City, i distrik me Quebec ma tye i but lobo Canada ka ma kiloko iye leb French. Lunyodona, Louis ki Zélia, onongo gilukica dok gimara adada. Babana onongo pe loko mapol dok maro kwano bukke. An onongo amaro coc dok onongo atye ki gen ni nino mo acel abidoko laco lok angeya.

I kare ma onongo atye i kine ka mwaka 12, Rodolphe Soucy, ngat ma onongo gitiyo ki babana, gin ki lareme mo gulimo gangwa. Gin onongo gubedo Lucaden pa Jehovah. Onongo pe atye ki ngec mapol i kom Lucaden dok onongo ape ki miti i kom dinigi. Kadi bed kit meno, onongo amaro kit ma gigamo kwede lapeny kore ki kore kun gitiyo ki Baibul. Man bene ogudo cwiny lunyodona, pi meno wan ducu waye kwano Baibul.

I kare meno, onongo akwano i cukul pa Katoli. Kicel kicel onongo anywako gin ma atye ka pwonyone ki i Baibul ki lutino kwan luwota. Lacen, lupwonyewa, ma onongo gubedo padi guniang woko. Me ka tic ki ginacoya me moko ka loka-ni tye goba, ngat acel i kingi owaco i nyim lutino kwan luwota ni an adui! Kadi bed ni gin mutimme man okela par, lacen okelo adwogi maber adada pien okonya me niang ni pwony me dini ma kipwonyo i cukul pe rwatte ki gin ma Baibul waco. Man oweko aniang ni omyero ajuk kwan i cukul man woko. I kare ma lunyodona guye, akobo i cukul mukene.

Amedde ki kwano Baibul, ento pe abedo ka dongo oyotoyot i yo me cwiny pien onongo alworo tito kwena i ot ki ot. Dini me Katoli onongo gitye ki twero madwong adada dok onongo gidag ticwa me tito kwena. Maurice  Duplessis, ma onongo obedo laloc me Quebec, onongo tye ki wat macok adada ki dini me Katoli. Ki cwak ma mege, lwak dano mapol gubedo ka keto aunauna i kom Lucaden. Pi meno onongo mito tekcwiny madwong me tito kwena i kare meno.

Omego John Rae ma obedo i kilaci me abongwen i Cukul me Gilead aye ma okonya me lweny ki lworo. Omego John onongo tye ki ngec mapol, mwol, dok onongo lok kwede yot. En onongo pe mina tira mapol tutwal, ento apwonyo jami madwong ki i lanenne maber. John onongo pe ngeyo leb French maber, pi meno onongo pol kare awoto kwede i tic me pwony dok onongo akonye ki gonye leb man. Tic kacel ki John okonya me moko tamma me doko Lacaden pa Jehovah. I nge mwaka apar ma arwatte ki Lucaden, anongo batija i nino dwe 26 Mai, 1951.

Pol pa lutit kwena me kacokkewa matidi ma i Quebec City onongo gubedo painia. Lanengi maber otugo cwinya me cako tic macalo painia. I kare ca, onongo watito kwena i ot ki ot kun watiyo ki Baibul keken. Kit ma onongo pe watiyo ki bukke ka watye ka tito kwena-ni, onongo mitte ni wati ki Baibul i yo me diro. Pi meno, atute matek me pwonyo kit me tic ki tyeng ma i Baibul me cung pi ada. Kadi bed kit meno, dano mapol onongo pe giye kwano kadi wa Baibul ka pe tye ki alama me Dini pa Katoli.

I mwaka 1952, anyomo Simone Patry, lamego ma lagen ma onongo watye kwede i kacokke acel. Wakobo i boma me Montreal, dok i kine me mwaka acel wanywalo latin anyakawa, Lise. Kadi bed ni aweko tic macalo painia i kare ma acok nyomme, wan ki Simone watute me bedo ki kwo ma pe mito jami mapol wek wanywak i tic me kacokke ki kerowa ducu macalo jo me ot.

I nge mwaki apar aye doki acako tamo matek me tic macalo painia. I mwaka 1962, i kare ma acito i Cukul me Ticwa me Ker ma kiyubo pi luelda i Betel me Canada, kicima me buto i rum acel ki omego ma nyinge Camille Ouellette. Mit kom pa Camille pi ticwa me pwony ogudo cwinya adada​—tutwalle pien en bene onongo tye ki dako ki lutino. I kare meno, omege ki lumege manok keken i Quebec aye onongo gitiyo calo painia kun bene nongo gitye ka gwoko lutino; ento meno aye onongo obedo yub pa Camille. Pi dwe acel ma wabedo kacel-li, en ocuko cwinya me tamo i kom kwona. I  nge dwe manok keken, aniang ni pud dok atwero tic macalo painia marii odoco. Jo mukene guwaco ni man pe obedo tam me ryeko, ento adok cen ka tic macalo painia ki gen ni Jehovah bigoyo laane i kom tutena me medo cawana i tic man.

I mwaka 1964, wan ki Simone kicimowa me cito ka tic macalo painia keken i Quebec City, i boma ka ma wadongo iye, ci watiyo iye pi mwaki mapol doki. I kare man, onongo dong tito kwena pe tek tutwal kadi bed onongo pud wakemme ki aunauna.

I Ceng Abicel i otyeno mo, kimaka i Sainte-Marie, taun matidi macok ki Quebec City. Abili mo otera i polic citecen ci kitweya i angica pien ni abedo ka tito kwena i ot ki ot labongo lancic. Lacen, kitera i nyim langolkop ma nyinge Baillargeon, laco ma onyo koyo i kom dano. En openya anga ma bibedo lapilidana i kot. I kare ma atitte nying Omego Glen How, * ma onongo obedo lapilida pa Lucaden ma kingeyo maber, en oloko ma kome myel ni: “Ojone! Pe myero obed en!” Omego Glen How onongo ngene adada me cung pi Lucaden i kare meno. Ma pe orii, kiwacca ni kot obayo koko man woko.

Adegadega i kom ticwa i Quebec oweko obedo tek me nongo kabedo ma watwero pango pi cokkewa. Kacokkewa matidi-ni opango garej mo macon ma onongo bedo ngic adada i kare ma piny make pee. Me wek wanong lyeto, omege gutiyo ki macin ma lyeto ot. Pol kare, onongo wagure warumo macin man ma nongo cokke peya ocakke kun watito jami mutimme ma cuko cwiny luwotwa.

Tye me yomcwiny adada me neno kit ma tic me pwony odongo kwede nicakke i kare meno. I kine ka mwaka 1960 ki wiye, onongo pud watye ki kacokke matinotino manok keken i Quebec City, i rijon me Côte-Nord, ki Gaspé Peninsula. I kare-ni, watye ki adwol makato aryo i kabedo magi, dok omege gicokke i Odi me Ker mabeco.

Wan ki Simone kilwongowa me cako tic me limo adwol i mwaka 1970. Ci i mwaka 1973, kicimowa pi tic me limo distrik. I mwaki magi, apwonyo jami mapol ki bot omege ma gitye ki ngec calo Laurier Saumur * ki David Splane, * ma bene gutiyo tic me limo adwol. I nge gure me adwol ducu, wan ki David onongo waleyo tam i kom kit me dongo dirowa me pwony. Wiya po i kare mo ma David owacca ni: “Léonce, amaro pwonyi me agikki-ni tutwal. Obedo mamit, ento ka onongo obed an kono amiyo pwony adek ki i kom pwonyi acel-li!” An onongo aduru lok mapol mukato kare woko i pwonya. Onongo mitte ni apwony kit me miyo pwony ma tye ki ngec ma mitte kikome labongo duru lok.

Luneno me distrik onongo gitye ki tic me cuko cwiny luneno me adwol. Kadi bed kit  meno, lutit kwena mapol i Quebec onongo gingeya maber. Pol kare onongo gimito tic kweda i tic me pwony ka alimo adwolgi. Kadi bed ni nywako i tic me pwony onongo mit, onongo pe atye ka nongo kare muromo me cuko cwiny laneno me adwol. I nino mo acel, laneno me adwol ma lamar opoyo wiya ni: “Ber gire ni imiyo kare ki omege ento wi pe owil ni ibino ka lima i cabit man. An bene amito ni kicuk cwinya!” Tira man okonya me bedo ki neno mupore dok me cobo ticca ducu.

I mwaka 1976, gin mo me cwercwiny adada otimme atura. Two omako dakona me amara, Simone, ci en oto woko. En obedo dako maber adada pien onongo tye ki cwiny me jalle ken dok onongo maro Jehovah matek. Bedo i tic me pwony okonya me kanyo arem ma tone okelo, dok apwoyo Jehovah pi kony ma en omina i kare meno ma kwo obedo tek-ki. Lacen, anyomo Carolyn Elliott, lamego mo ma kome mit ma loko leb Muno, ma onongo okobo i Quebec me tic ka ma can lutit kwena tye iye. Carolyn obedo ngat ma lok kwede yot dok nyuto miti me ada i kom jo mukene, tutwalle jo ma lulewic nyo ma gitye kengi. En okonya adada i kare ma en oribbe kweda i tic me limo adwol.

I Januari mwaka 1978, kipenya me pwonyo Cukul mukwongo pi Painia ma obedo i Quebec. Abedo ki lworo adada, pien an kikoma onongo peya abedo i cukul man dok onongo peya aneno wa buk ma kitiyo kwede. Ki pwoc madit, kilaci mukwongo ma apwonyo-ni onongo opong ki painia ma gitye ki ngec. Kadi bed ni an aye ma onongo atye lapwony, an bene anongo ngec mapol ki bot lutino kwan!

Lacen, i mwaka 1978, wabedo ki Gure ma Kwako Lobe Mapol ma wi lokke obedo ni “Victorious Faith” i bar tuko me Montreal Olympic Stadium. Man aye obedo gure madit loyo ma wabedo kwede i Quebec, dok dano ma welgi kato 80,000 gubedo tye. Kicima me tic ki Dipatmen me Miyo Lok Angeya. Aloko ki lumi lok angeya mapol dok abedo ki yomcwiny  madwong adada me neno ni gucoyo jami mabeco i komwa. Guloko kwedwa i telebijon ki i redio pi cawa makato 20, dok gucoyo pwony miya mapol i komwa i gajeti. Man omiyo caden magwar!

Alokaloka madit pira otimme i mwaka 1996. I nge tic i Quebec ka ma kiloko iye leb French nicakke i kare ma anongo batija, kicima me cito ka tic i distrik ma kiloko iye leb Muno i Toronto. Awinyo ni pe apore dok abedo ki lworo adada me miyo pwony ki leb Munona magoro-ni. Onongo mitte ni aleg matek dok ajenge i kom Jehovah.

Abedo ki lworo madwong adada ma peya acako tic i distrik man, ento kombeddi atwero waco ni mwaki aryo ma atiyo kwede i Toronto-ni obedo mit adada. Carolyn okonya me bedo ki tekcwiny me loko leb Muno, dok omege bene gukonya dok gucuko cwinya. Wamako lurem manyen mapol oyotoyot.

Medo i kom yubbe pi gure me adwol ma onongo bedo i tum cabit, pol kare onongo akwanyo cawa acel i Ceng Abic otyeno me cito ka tito kwena i ot ki ot. Jo mogo onongo gitwero tamo ni, ‘Pingo icito i tic me pwony otyeno meno kun nongo ibibedo ki tic mapol adada i tum cabit i gure me adwol?’ Kadi bed kit meno, onongo anongo cuko cwiny madwong ki i lok ki dano i ticwa me pwony. Kadiwa kombeddi, nywako i ticwa me pwony kela yomcwiny.

I mwaka 1998, wan ki Carolyn kicimowa me cito ka tic macalo painia keken i Montreal. Pi mwaki mapol, abedo ki mot mapatpat ma i kine tye iye yubo ticwa me tito kwena i dye lwak ki tic kacel ki odi me poko lok angeya wek gumi lok ma atir i kom Lucaden pa Jehovah. I kare-ni, wan ki Carolyn wanongo yomcwiny ki i tito kwena bot jo ma gukobo nyen i Canada dok gitye ki miti me pwonyo lok me Baibul.

Ka atamo i kom ticca pi Jehovah nicakke ma anongo batija mwaki 68 angec, awinyo ni en ogoyo laane i koma adada. Pwonnye me maro tic me pwony ki konyo jo mapol me ngeyo lok ada okella yomcwiny. I nge pito lutinogi, nyara Lise kacel ki cware gucako tic macalo painia marii. Neno mit kome i tic me pwony yomo cwinya adada. Atye ki pwoc madit pi Lukricitayo luwota ma guweka lanen maber dok gumina tam me ryeko ma okonya me dongo watta ki Jehovah kun bene atiyo pire i yo mapatpat. Aniang ni bedo lagen i tic moni twere keken ka wajenge i kom cwiny maleng pa Jehovah. (Jab. 51:11) Pud amedde ki pwoyo Jehovah pi ye ni abed ki mot me pako nyinge!​—Jab. 54:6.