TIKA itye ki miti me nongo mot me tic mo i kacokke ma kombeddi pe itwero nongone? Twero bedo ni man obedo tic ma ngat mukene aye tye ka timone. Nyo man romo bedo mot me tic ma kubbe ki tito kwena, ma yam itimo. Ento, mwakani, two, can lim, nyo tic me gwoko jo me paconi dong gengi ki timo tic meno. Nyo romo bedo ni pi alokaloka ma timme i dulwa, kijukki ki timo tic ma onongo itimo pi kare malac. Labongo paro pi tyen lokke, iromo winyo calo dong pe itye ka timo jami ducu ma imito i tic pa Lubanga. Ka tye kit meno, ci niange ka i kare mukene ibedo ma cwinyi otur. Kadi bed kit meno, i yo ma nining ma itwero lweny ki tam maraco​—calo turcwiny, kec cwiny nyo nyeko—​wek pe odong i cwinyi? Itwero medde ki bedo ma cwinyi yom nining?

Watwero pwonyo kit me medde ki bedo ki yomcwiny ki i labol pa Jon Labatija. Jon obedo ki mot me tic mapol, ento en onongo pe obyeko ni kwone i tic pa Jehovah bilokke kit ma otimme kwede-ni. Jon nen calo pe otamo ni ebitero kare malac i buc makato kare ma etero i tito kwena. Kadi bed kit meno, Jon obedo ki yomcwiny, dok en omedde ki bedo ki neno ma atir pi kare me kwone ducu. Gin ango ma okonye? Dok watwero medde ki bedo ma cwinywa yom nining kadi bed kwowa olokke i yo ma turo cwinywa?

I kine ka dwe me angwen me mwaka 29 K.M., Jon ocako ticce me yubo dano pi bino pa Meciya, kun waco ni: “Wunguti, pien ker me polo dong onyiko cok.” (Mat. 3:2; Luka 1:12-17) Dano mapol gujolo lokke. Ki lok ada, lwak dano mapol gua ki i twok piny ducu me bino ka winyo kwenane, dok jo mapol gungut i kom balgi ci gunongo batija. Ki tekcwiny, Jon bene ociko lutela dini ma gitamo ni kitgi atir-ri i kom ngolo kop ma tye ka kurogi ka pe guloko kitgi. (Mat. 3:5-12) Jon otimo gin ma pire tek loyo i ticce me pwony i kare ma en obatija Yecu i kine ka dwe me apar me mwaka 29 K.M. Nicakke ki i kare meno, Jon obedo ka cuko cwiny jo mukene me lubo Yecu, Meciya ma kiciko pire-ni.​—Jon 1:32-37.

 Pi tic ma kite dok pat ma kimiyo bot Jon-ni, Yecu owaco ni: “Pe tye dano mo ki i kin jo ma mon onywalogi ma kato Jon Labatija ki dit.” (Mat. 11:11) Labongo akalakala mo Jon obedo ki yomcwiny pi mot ma en onongo. Calo Jon, jo mapol i kare-ni gunongo mot mapol ki bot Lubanga. Me labolle, tam kong i kom omego mo ma nyinge Terry. En kacel ki dakone, Sandra, gutiyo pi kare malac dong pi mwaki makato 50. Terry owaco ni: “Abedo ki mot me tic mapol. Atiyo macalo painia marii, Labetel, painia keken, laneno me adwol, laneno me distrik, ki dok i kare-ni atiyo macalo painia keken.” Cwinywa bedo yom adada ka kimiyowa mot me tic pi Jehovah, ento tute matek mitte me medde ki bedo ki yomcwiny ka kwowa olokke, kit ma wabineno kwede ki i labol pa Jon.

Gin ma pire tek ma okonyo Jon Labatija me bedo ki yomcwiny aye ni en pe orwenyo pwoc pi mot me ticce. Nen kong labol acel. I nge batija pa Yecu, lulub kor Jon welgi obedo ka dok kun lulub kor Yecu welgi obedo ka medde. Ki par, lupwonnye pa Jon gubino bote ci guwacce ni: “Nen, en tye ka batija dano, jo ducu gibino bote.” (Jon 3:26) Jon odok iye botgi ni: ‘Ngat ma cung i nget nyako aye lanyom; larem lanyom ma cung i ngete kun winye, cwinye bedo yom twatwal pi winyo dwan lanyom; pi meno an bene cwinya yom kakare.’ (Jon 3:29) Jon pe obedo ka pyem ki Yecu, dok Jon pe otamo ni ticce konye pe pien ni tic pa Yecu pire tek loyo mege. Me ka meno, Jon omedde ki bedo ki yomcwiny pien en onongo tero ticce me bedo “larem lanyom” calo gin ma pire tek.

Cwiny ma Jon onyuto-ni okonye me bedo ki yomcwiny kadi bed ticce onongo pe yot. Me labolle, Jon obedo Ajula pa Jehovah nicakke i kare ma kinywale, pi meno onongo pe twero mato kongo vino. (Luka 1:15) Yecu oloko i kom kwo pa Jon kun waco ni: “Jon yam obino ma pe camo cam, dok bene onongo pe mato gin mo.” Ki tungcel, Yecu ki lupwonnyene onongo pe gitye i te cik pa Ajula pa Jehovah dok gukwo calo jo mukene-ni. (Mat. 11:18, 19) Dok bene, kadi bed Jon pe otimo tango mo, en ongeyo ni lupwonnye pa Yecu, kadi wa mogo ma yam con kong gubedo lupwonnyene, kiminigi teko me timo tango. (Mat. 10:1; Jon 10:41) Me ka keto cwinye i kom apokapoka i kin lulub kore ki lulub kor Yecu, Jon oketo cwinye i kom ticce ma Jehovah omine.

Ka wan bene watero tic ma watye kwede kombeddi calo gin ma pire tek, ci watwero gwoko yomcwinywa. Terry, ma waloko i kome malo-ni, owaco ni, “Aketo cwinya i kom mot me tic mo keken ma kimina.” Ka en otamo i kom ticce pi kare malac, en waco ni, “Pe akoko ange ento wiya po i kom jami mabeco keken.”

Watwero medo yomcwinywa i tic pi Jehovah ka watamo i kom gin ma miyo tic moni pire bedo tek. Ticwa pire tek pien weko wanongo mot me bedo “lutic kacel ki Lubanga.” (1 Kor. 3:9) Gin mo maleng dok ma wele tek bedo mwonya keken ka wagwoko maber. I yo acel-lu, wabibedo ki yomcwiny keken ka wabedo ka tam i kom deyo ma watye kwede me tic pi Jehovah. Pe wabibedo ka poro tutewa ki pa jo mukene. Pe wabitamo ni tic ma Jehovah ominiwa konye pe pien ni jo mukene gitye ki mot me tic mapat.​—Gal. 6:4.

Jon nen calo ongeyo ni ticce pe birii pi kare malac, ento pe ongeyo ni bigik atura. (Jon 3:30) I mwaka 30 K.M., dwe abicel i nge batija Yecu, Kabaka Kerode otweyo Jon i buc. Kadi bed kit meno, Jon pud omedde ki timo gin ma en twero me miyo caden. (Mar. 6: 17-20) Ngo ma okonye me bedo ki yomcwiny i kare ma onongo tye ka kato ki i alokaloka magi? En oketo cwinye i kom jami me cwiny.

I kare ma Jon tye i buc, en owinyo ni tic me pwony pa Yecu tye ka dongo matek. (Mat. 11:2; Luka 7:18) Jon onongo ngeyo ada ni Yecu aye Meciya ento nen calo obedo ka tamo kit ma Yecu bicobo kwede jami ducu  ma Ginacoya waco ni Meciya bitimone. Kit ma Meciya onongo myero odok kabaka-ni, tika onongo loc pa Yecu cok cakke? Tika man onongo biweko kigonyo Jon ki i buc? Jon obedo ki miti matek me niang i kom tic pa Yecu mumiyo en ooro lupwonnyene aryo me penyo Yecu ni: “In aye ngat ma myero obin-ni, nyo dok wakur ngat mukene?” (Luka 7:19) Yecu owaccigi ni gutit ki Jon ni: “Lutowang guneno piny, lungolo guwoto, ludobo gilonyogi, ludingit guwinyo lok, ki jo muto gicerogi woko, ki lucan bene gitito botgi lok me kwena maber.” (Luka 7:20-22) I kare ma gudok cen, Jon nen calo ociko ite me winyo ka gitito kit ma Yecu otimo kwede tango mapol.

Labongo akalakala mo, winyo ripot man ojingo cwiny Jon. Oweko en omoko ni Yecu tye ka cobo lok pa lunebi i kom Meciya. Kadi bed tic pa Yecu pe okwako gonyo Jon ki i buc, Jon oniang ni ticce me pwony pire tek. Kadi bed en onongo tye ka kato ki i kwo matek, en onongo tye ki tyen lok me bedo ki yomcwiny.

Calo Jon, ka waketo cwinywa i kom tic pi Jehovah, wabibedo ki kero me ciro can ducu ki yomcwiny kun wadiyo cwinywa. (Kol. 1:9-11) Watwero timo man ka wakwano Baibul dok walwodo lok ma iye, dok man bipoyo wiwa ni ticwa pi Lubanga pe tye me nono. (1 Kor. 15:58) Sandra owaco ni: “Kwano cura acel me Baibul nino ki nino okonya me nyikke cok ki Jehovah. Konya bene me keto cwinya i kome ento pe i koma.” Watwero bene keto cwinywa i kom ripot me ticwa me Ker, ma romo konyowa pe me tam i kom pekowa keken ento me keto cwinywa i kom jami ma Jehovah tye ka cobone. Sandra owaco ni, “Purogram me JW Broadcasting^® ma katti dwe ki dwe miyo wawinyo ni watye cok ki dul pa Jehovah, dok konyowa bene me bedo ki yomcwiny i ticwa.”

Pi kare manok ma Jon Labatija obedo ka tic-ci, en otito kwena ki “cwiny ki tek pa Elia” dok calo Elia, en “yam obedo dano ma kite cal kwedwa.” (Luka 1:17; Yak. 5:17) Ka walubo lanene me bedo ki pwoc kun waketo cwinywa i ticwa pi Jehovah, ci wan bene watwero bedo ma cwinywa yom i ticwa, kadi bed alokaloka otimme i kwowa.