Man obedo gin acel ki i kin jami mapol ata ma jo ma gidag Yecu gutimo me yenyo bal i kome kacel ki lupwonnyene. Cik ma Kimiyo bot Moses onongo tye ki tira mapol adada ma mako lonye ma bedo kare ki kare ma lubbe ki kom ma cwer, dobo, ki dong kit me tero lyel ki lee muto. Onongo bene miyo cik ma lubbe ki kit ma ngat moni twero lonye kwede. Man onongo kitwero timone ki miyo gityer, lwok, ki dong kiro remo.—Levi, cura 11-15; Wel, cura 19.

Lupwonye pa Lujudaya onongo gicomo cik mapol adada i kom cik magi. Buk mo acel waco ni onongo “kingiyo maber adada gin ma twero weko kom ngat moni doko keni, kit ma kome twero doko keni ki dong kit ma kom ngat mukene twero doko keni pi ngat meno, jami mogo ma onongo kitamo ni twero doko keni ki dok mogo ma pe twero doko keni, ki me agikkine, kwer ma myero kitim me lonyo ngat nyo gin moni.”

Lumone pa Yecu gupenye ni: “Pingo lupwonnyeni pe gilubo kit kwer pa ludongo? Pingo gicamo ki cinggi ma pe gulogo ma lubo kwer?” (Mar. 7:5) Lutela dini magi ma gidag Yecu-ni onongo pe gitye ka wacci cam ki cing ma pe kilwoko pe ber pi yot kom. Macalo kwer, lupwonye magi onongo gimito ni kiony pii i cinggi ma pud peya gicamo. Lok ma i buk ma waloko i ye malo-ni medde ni: onongo bene “giloko i kom gin ma myero kiti kwede me oonyo pii, pii mene ma myero kiti kwede, anga ma myero oony, ki dong myero kiony pii meno lakwene.”

Yecu odok i kom cik magi ma dano aye gucomo-ni i yo macek adada. En owaco bot lutela dini pa Lujudaya me cencwari me acel-li ni: “Wun lugoba, Icaya con oloko i komwu kakare, macalo en ocoyo ni Lubanga owacci, ‘Rok man kara giwora ki doggi nono, ento cwinygi pe i koma wacel; giwora nono, pwony ma gipwonyo obedo pwony ma mako kit pa dano.’ Wuweko cik pa Lubanga, kun wuketo cwinywu ka lubo kit pa dano.”—Mar. 7:6-8.