1. Ada ma ipwonyo weko iwinyo nining?

 JO PA Jehovah gimaro lok ada ma tye i Lok pa Lubanga. Niyewa jenge i kom lok meno. (Rom. 10:17) Watyeko mokone ni Jehovah oketo kacokke pa Lukricitayo me bedo “wir ki guti me te ot matek, me ada.” (1 Tem. 3:15) Dok wabedo luwiny bot ‘jo ma telowa’ ka gigonyo botwa lok ada ma tye i Baibul dok giminiwa tira ma konyowa me timo miti pa Lubanga.—Ibru 13:17.

2. Ma lubbe ki Yakobo 5:​19, gin ango ma twero timme i nge pwonyo ada?

² Ento, i nge moko ni man aye ada dok ni mitte ni walub tira ma a ki i dul pa Jehovah, ka pe wagwokke, pud kitwero bwolowa. (Kwan Yakobo 5:19.) Catan tye ki miti madwong adada me gengowa ki geno ada ma tye i Baibul kacel ki tira ma wanongo ki i dul pa Jehovah.—Ep. 4:14.

3. Pingo mitte ni wacung matek i ada? (Jo Epeco 6:​13, 14)

³ Kwan Jo Epeco 6:​13, 14. Macok cok-ki, Larac-ci bitic ki lok goba me bwolo rok ducu wek gukwer Jehovah. (Yabo 16:​13, 14) Wangeyo bene ni, Catan bimedde ki tic matek me bwolo jo pa Jehovah. (Yabo 12:9) Meno aye oweko pire tek adada ni wapwonnye me poko kin lok ada ki lok goba dok walub ada. (Rom. 6:17; 1 Pet. 1:22) Timo meno pire tek pien bikonyowa me bwot ki i twon can madit atika-ni!

4. Gin ango ma wabinyamo i pwony man?

 ⁴ I pwony man, wabinyamo kit aryo mapatpat ma omyero wadong wek okonywa me niang lok ada ma nonge i Baibul kacel ki jolo tira ma a ki bot dul pa Jehovah. I ngeye wabinyamo jami adek ma omyero watim wek wamedde ki cung matek i ada.

KIT MOGO MA OMYERO WADONG WEK WAPOK KIN ADA KI GOBA

5. I yo ma nining ma bedo ki lworo ma atir konyowa me poko kin lok ada ki lok goba?

⁵ Lworo Jehovah. Ka wadongo lworo ma atir pi Jehovah, ci wabimarre matek ma miyo pe watimo gin mo keken ma cwero cwinye. Wabedo bene ki miti madwong me niang apokapoka ma tye i kin lok ada ki lok goba, wek okonywa me timo jami ma yomo cwiny Jehovah. (Car. 2:​3-6; Ibru 5:14) Pe omyero waye ni lworo dano ogengwa ki maro Jehovah, pien pol kare gin ma yomo cwiny dano nongo pe yomo cwiny Jehovah.

6. Lworo dano oweko lurot piny apar gunyweno lok ada woko nining?

⁶ Ka wacako lworo dano makato Lubanga, ci wabicako ye gin ma pe yomo cwiny Jehovah. Nen kong gin ma otimme i kom lurot piny 12 ma kiorogi ka roto lobo ma Jehovah ocikke me miyo ki Luicrael. Lurot piny apar gubedo ki lworo madwong i kom jo Kanaan me ka geno Jehovah. Guwaco ki Luicrael luwotgi ni: “Wan pe waromo ette me cito i kom jo meno, pien gitego, gikatowa woko.” (Wel 13:​27-31) Ki i wang dano, jo Kanaan onongo ginen calo jo matego ma loyo Luicrael—meno onongo lok ada. Ento ka ngat mo otamo ni Luicrael pe gibitwero loyo lumonegi, ci en onongo pe tye ka tam i kom Jehovah. Lurot piny apar magi onongo omyero guket  cwinygi i kom gin ma Jehovah mito ni Luicrael gutim. Onongo myero bene gulwod lok i kom gin ma Jehovah otimo pigi i kare ma pud okato macok cok. Man onongo biweko giniang ni teko pa jo Kanaan konye pe ka kiporo ki teko pa Jehovah won twer ducu. Yocwa ki Kaleb onongo gipat ki lurot piny apar-ri pien onongo gimito yomo cwiny Jehovah. Yocwa ki Kaleb guwaco ki lwak ni: “Ka i Rwot [Jehovah] obedo yom i komwa, en biterowa i lobo-nu, ci miyo i cingwa.”—Wel 14:​6-9.

7. I yo ma nining ma watwero dongo kwede tekcwinywa me lworo Jehovah? (Nen bene cal.)

⁷ Me dongo tekcwiny me lworo Jehovah, mitte ni watam i kom gin ma biyomo cwinye kare ducu ka wamito moko tam. (Jab. 16:8) Ka iwoto ki kwano jami mutimme i Baibul, pennye kekeni ni, ‘Ka gin ma kit meno onongo otimme i koma, tam ango ma onongo abimokone?’ Me labolle, go kong ni itye ka winyo ka lurot piny apar-ri gitito ni Luicrael pe gibitwero loyo jo Kanaan kulu. Tika onongo ibiye lokgi kun iweko lworo maki, nyo ibiweko marri pi Jehovah kacel ki mitini me yomo cwinye loyo lworo meno? Pol pa Luicrael pe guye ni Yocwa ki Kaleb onongo gitye ka loko lok ada. Macalo adwogine, Jehovah pe oye ni Luicrael magi gudony i Lobo ma Kiciko Pire.—Wel 14:​10, 22, 23.

8. Kit mene ma omyero watute me dongone, dok pingo?

⁸ Mwolo. Jehovah pwonyo jo mamwol keken ki ada. (Mat. 11:25) Wajolo lok ada magi ki mwolo. (Tic 8:​30, 31) Kadi bed kit meno, pud mitte ni wagwokke pe me dongo cwiny me awaka. Ka wadongo cwiny me awaka, weko wacako tamo ni apokapoka mo pe i kin tamwa ki cik ma igi lac me Baibul nyo tira ma a ki i dul pa Jehovah.

9. I yo ma nining ma watwero medde ki bedo jo mamwol?

⁹ Wek wamedde ki bedo jo mamwol, mitte ni wiwa opo ni wan wabedo dano mamwa dok Jehovah dit katowa i yo ducu. (Jab. 8:​3, 4) Watwero bene lega bot Jehovah ni okonywa me medde ki bedo jo mamwol ma pwonyogi yot. Jehovah bikonyowa me keto mitine mukwongo me ka megwa, dok wapwonyo mitine ki i Baibul kacel ki bot dulle. I kwanni me Baibul, yeny jami ma moko ni Jehovah maro mwolo dok dag cwiny me awaka, nyatte, ki dong ette. Dok igwokke adada wek imedde ki bedo ngat mamwol, tutwalle ka kimini mot me tic ma weko ibedo ki twero mo olo nyo weko ingene bot jo mapol.

WATWERO MOKO MATEK I ADA NINING?

10. Angagi ma Jehovah otiyo kwedgi me miyo tira bot jone?

¹⁰ Medde ki geno tira ma dul pa Jehovah miyo. I kare pa Luicrael, Jehovah otiyo ki Moses ki dok lacen Yocwa me miyo tirane bot Jone. (Yoc. 1:​16, 17) Luicrael gubedo ki kwo maber adada i kare ma gubedo luwiny bot co magi. Mwaki miya mapol lacen, i kare ma pud kicako kacokke pa Lukricitayo nyen, lukwena 12 aye gubedo ka miyo tira. (Tic 8:​14, 15) Lacen, kimedo luelda mogo ma i Jerucalem i kom lukwena magi. I kare ma kacokke gulubo tira ma gunongo ki bot co magi ma lugen-ni, “lwak muye Kricito i kabedo acel acel gumoko matek i niye, gubedo ka medde mapol nino ducu.” (Tic 16:​4, 5) I karewa-ni, Jehovah  bene goyo laane ka walubo tira ma a ki bot dulle. Ento Jehovah biwinyo nining ka wakwero woko ni en aye pe ocimo co magi me telowa? Me gamo lapeny man, kong dong wanyamu gin mutimme i kare ma Luicrael gitye ka cito i Lobo ma Kiciko Pire.

11. Gin ango ma otimme i kom Luicrael i kare ma gujemo i kom ngat ma Jehovah ocimo me telogi? (Nen bene cal.)

¹¹ I kare ma Luicrael gitye ka wot me cito i Lobo ma Kiciko Pire, co mogo ma gingene adada gujemo i kom Moses pi tic ma Jehovah onongo omine. Gin guwaco ni: “Jo magi ducu gin lwak maleng, gin ducu ki acel acel Rwot [Jehovah] bene tye i kingi.” (Wel 16:​1-3) Kadi bed onongo tye lok ada ni i wang Lubanga “jo magi ducu” gubedo jo maleng, ento Jehovah onongo ocimo Moses keken me telo Jone. (Wel 16:28) I kare ma lujemo magi gubedo ka lok marac i kom Moses, onongo gitye ka cayo Jehovah kikome. Gin pe guketo cwinygi i kom gin ma Jehovah mito; ento i kom gin ma gimito—ma en aye yweka ki twero me loyo jo mukene. Lubanga oneko lutela pa lujemo magi kacel ki dano alip mapol ma onongo gicwakogi. (Wel 16:​30-35, 41, 49) I karewa-ni, wangeyo ni Jehovah pe cwako jo ma gikwero lubo tira ma a ki bot dulle.

12. Pingo watwero medde ki geno dul pa Jehovah?

¹² Watwero medde ki geno dul pa Jehovah. Ka onen ka maleng ni omyero watim alokaloka i kom niangowa madok i kom pwony mo me Baibul nyo i kom kit ma waworo kwede Jehovah, ci jo ma gitelowa pe gigalle ki keto alokaloka magi i tic. (Car. 4:18) Gitimo meno pien gimito yomo cwiny Jehovah. Gitute bene matek me moko tam ma jenge i kom Lok pa Lubanga, kacel ki rwom me kit ma  atir ma Jehovah oketo pi Jone ducu ni gulubi.

13. “Lok me ada” obedo ngo, dok kare ducu ngo ma omyero watim?

¹³ “Lanenni me aluba myero obed lok me ada.” (2 Tem. 1:13) “Lok me ada” obedo pwony ma Lukricitayo gilubo ma nonge i Baibul. (Jon 17:17) Niyewa jenge i kom pwony magi. Dul pa Jehovah pwonyowa ni kare ducu omyero niyewa ojenge i kom rwom me kit ma atir ma en oketo. Ka wamedde ki timo meno, Jehovah bigoyo laane i komwa.

14. Lukricitayo mogo gubarre woko ki i lubo “lok me ada” nining?

¹⁴ Gin ango ma twero timme ka niyewa pe jenge i kom “lok me ada”? Nen kong labol man. I cencwari me acel, Lukricitayo mogo gubedo ka nyayo lok goba ni nino pa Jehovah dong oo woko. Twero bedo ni waraga mo onongo tye ma dano gubedo ka tamo ni lakwena Paulo aye ocoyo. Labongo kong ngiyone i yo matut, Lukricitayo mogo ma i Tecalonika guye lok goba man dok gubedo ka nyayone. Ento onongo pe kibibwologi ka onongo wigi opo i kom jami ma Paulo opwonyogi kwede i kare en tye i Tecalonika. (2 Tec. 2:​1-5) Man oweko Paulo omiyo tira ki utmegine pe me ye lok ducu ma guwinyo labongo mokone ka tye ada. Dok wek pe kibwolgi i anyim, Paulo odolo te waragane me aryo bot jo Tecalonika ki waco ni: “An Paulo acoyo botwu mot man ki cinga. Man aye lanen ma tye i waragana ducu; man aye kit ma acoyo kwede.”—2 Tec. 3:17.

15. Watwero gwokke nining ki i lok goba ma twero nen calo obedo lok ada? Mi labol. (Nen bene cal.)

¹⁵ Pwony ango ma watwero nongo ki i waraga ma Paulo ocoyo bot jo Tecalonika? Ka wawinyo lok mo ma pe rwatte ki gin ma wapwonyo ki i Baibul nyo ka wawinyo lok mo me ur adada, ci omyero wati ki ryeko me niang lok meno. I kare me loc me Soviet Union, lumonewa gumiyo ki utmege waraga mo ma giwaco ni oa ki i gang kalwa madit. Waraga  man onongo tye ka waco ki utmege me cako dul mukene ma cung pire kene. Waraga man onongo bedo calo tye ka waco lok ada. Ento pe kibwolo utmege ma lugen. Guniang ni lok ma tye i waraga man pe rwatte ki gin ma kipwonyogi kwede. I kare-ni, lumonewa gitiyo ki jami calo Intanet me nyweno wiwa ki miti me poko kinwa woko. Me ka weko ‘tamwa gwange oyotoyot,’ watwero gwokke kun watamo matut ka lok ma wawinyo nyo wakwano-ni rwatte ki lok ada ma wapwonyo.—2 Tec. 2:2; 1 Jon 4:1.

16. Ma lubbe ki Jo Roma 16:​17, 18, gin ango ma omyero watim ka ngat mo ongak woko ki i ada?

¹⁶ Medde ki ribbe ki jo ma lugen bot Jehovah. Lubanga mito ni ribbe obed tye i kinwa macalo utmege ka wawore. Wabimedde ki bedo ma waribbe kace wamoko matek i ada. Ngat mo keken ma nyayo lok ma pe rwatte ki ada ma tye i Baibul kelo apokapoka i kacokke, pi meno Lubanga ociko ni “pe wuribbe ki jo macalo meno.” Ka pe, ci wan kikomwa wabicako ye lok ma pe tye ada dok bene waturo genewa bot Jehovah woko.—Kwan Jo Roma 16:​17, 18.

17. Adwogi maber ango ma wanongo ka watwero poko kin lok ada ki lok goba kun wamedde ki cung i ada?

¹⁷ Ka watwero poko kin lok ada ki lok goba kun wamedde ki cung i ada, ci wabimedde ki bedo cok ki Jehovah kun wamedde ki jingo niyewa. (Ep. 4:​15, 16) Catan pe bibwolowa ki lok gobane, dok wabimedde ki bedo i te gwok pa Jehovah i kare me twon can madit atika. Medde ki cung matek pi gin ma tye atir, ‘ci Lubanga won kuc bibedo kwedi.’—Pil. 4:​8, 9.