I kare ma Daudi oneko Goliac, Kabaka Caulo okete me loyo wi monnye. Daudi oloyo lweny mapol, ci nyinge oywek adada. Ka Daudi odwogo ki i lweny, mon onongo gimol ma gimyelo kun giwero ni: ‘Caulo oneko dano alip, ento Daudi oneko dano alip apar!’ Pi man, nyeko omako Caulo i kom Daudi ci ocako yenyo yo me neke woko.

Daudi onongo goyo opuk mamit adada. Nino mo acel ma Daudi tye ka goyo opuk pi Caulo, kabaka obayo tong i kome. Ento Daudi owene ci tong ocobo kor ot. I nge meno, Caulo otemme tyen mapol me neko Daudi woko. Lacen, Daudi ongweco okanne woko i tim.

Caulo ocoko dano 3,000 ci ocito kwedgi ka yenyo Daudi. En odonyo i boro ma Daudi ki jone gitye ka kanne iye. Jo pa  Daudi gukwilo lok bote ni: ‘Man aye kare maber piri me neko Caulo.’ Daudi okwalle mot mot bot Caulo ci ongolo dog bongone woko. Caulo pe ongeyo gin mutimme. Lacen, cwiny Daudi opoto pien oniang ni pe enyuto woro pi kabaka ma Jehovah owiro. En pe oye ni jone guwan Caulo. Daudi bene olwongo Caulo, kun waco ni ebedo ki kare me neko Caulo ento pe eneke. Caulo tika oloko tamme i kom Daudi?

Pe. Caulo omedde ki dwaro Daudi. I dyewor mo acel, Daudi kacel ki okeyone Abicai gulibbe laling gudonyo i gony pa Caulo. Kadi wa Abneri, ma gwoko Caulo, onongo bene onino woko. Abicai owaco ni: ‘Man aye karewa maber adada! Wek aneke woko kombeddi.’ Daudi ogamo ni: ‘Jehovah aye bipwodo Caulo. Wakwany tonge ki opoko piine wacit woko.’

Daudi oito wi got macok ki gony pa Caulo. Ci odange ni: ‘Abneri, pingo pe igwoko kabaka-ni? Tong pa Caulo ki opoko piine tye kwene?’ Caulo oniang dwan Daudi ci owaco ni: ‘Ibedo ki kare me neka woko, ento pe ineka. Angeyo ni ibidoko kabaka manyen me Icrael.’ Caulo odok cen i gang kalle. Ento pe dano ducu me ot pa Caulo onongo gidag Daudi.