Jehovah oyero Jeremia me bedo lanebi bot jo me Juda. En owacce ni otit kwena botgi dok ocikgi ni omyero gujuk timo jami maraco. Jeremia owaco ni: ‘Ento Jehovah, an latin mamwa. Pe angeyo lok ki dano.’ Jehovah owacce ni: ‘Pe ibed ki lworo mo. Abititi gin ma myero iloki. Abikonyi.’

Jehovah owaco bot Jeremia ni ogur ludongo pa lwak, ci onek agulu i nyimgi, kun waco ni: ‘Man aye kit ma kibituro kwede Jerucalem.’ I kare ma Jeremia otimo gin ma Jehovah owacce, ludongo gukeco adada. Lalamdog ma nyinge Packur ogoyo Jeremia ci otweye i okol. Jeremia onongo pe twero nyikke wa matidi dyewor lung. Orwone, Packur ogonye woko. Jeremia owaco ni: ‘Pe dong atwero medde ki cirone. Abijuko tito lok woko.’ Ento en tika oilo cinge woko? Pe. I kare ma Jeremia dok otamo iye, en owaco ni: ‘Lok pa Jehovah obedo calo mac ma wang i cwinya. Pe atwero juko tito kwena.’ Jeremia omedde ki ciko dano.

Mwaki mapol okato, kabaka manyen ocako loyo Juda. Lulamdog ki lunebi me goba onongo gidag winyo kwena pa Jeremia. Gin guwaco bot rwodi me Juda ni: ‘Laco-ni omyero kinek woko.’ Jeremia owaco ni: ‘Teke wuneka woko, nongo wuneko dano ma pe ki bal. Lok ma aloko-ni pe mera ento pa Jehovah.’ I kare ma rwodi guwinyo lok man, gin guwaco ni: ‘Dano man pe myero gingol kop me to i wiye.’

Jeremia omedde ki tito kwena, mumiyo akemo omako rwodi. Guwaco bot kabaka ni myero kinek Jeremia woko. Kabaka owaco ni gitwero timo gin mo keken ma  gimito i kom Jeremia. Ci gumako Jeremia gubole woko i wang it matut ma opong ki coto, kun gigeno ni Jeremia bito iye. Jeremia ocako mwony woko i coto.

Laco mo ma tiyo i gang kal pa kabaka, ma nyinge Ebed-melek owaco bot kabaka ni: ‘Rwodi gubolo Jeremia woko i wang it! Ka waweke kunnu, en bito woko.’ Ci kabaka omiyo twero bot Ebed-melek me kwanyo co 30 wek gucit kwede ka ywayo Jeremia woko ki i wang it. Pe itamo ni omyero wabed calo Jeremia ma pe oweko gin mo keken me genge ki tito kwena?