IN MONO ingeyo awobe nyo anyira mogo ma gimaro wakke dok giyenyo kolo?— In tika imaro bedo i kingi? Nyo kece imaro bedo ki ngat mo ma lakica dok mito kuc?— Lapwony Madit owacci: “Gitye ki yomcwiny jo ma kelo kuc, pien gin aye gibilwongogi ni ‘litino pa Lubanga.’”—Matayo 5:9, NW.

Ento i kine mogo jo mukene gitimo jami ma wango iwa. Meno pe lok ada?— Dong waromo tamone ni myero wacul wange bene. I nino mo acel gin ma kit man otimme i kom lupwonnye pa Yecu ma onongo gitye ka wot kacel ki Yecu me cito i Jerucalem. Wek kong atitti lok meno.

I kare ma onongo dong guwoto mabor bor, Yecu ooro lupwonnyene mogo gukwongo yo, gin gudonyo i paci pa Lucamaria wek ginong ka yweyo. Ento, kit ma dini pa Lucamaria onongo pat-ti, jo ma kunnu gukwero jologi woko. Dok bene  onongo gin pe gimaro ngat mo keken ma woto ka woro Lubanga i Jerucalem.

Ka onongo gin ma kit meno otimme i komi, onongo ibitimo ngo? Akemo mono onongo obimaki? Onongo ibibedo ki miti me culo wange bene?— Meno aye gin ma lupwonnye pa Yecu Yakobo gin ki Jon onongo gimito timone. Guwaco bot Yecu ni: “Imito walwong mac oa ki i polo, otyekgi woko?” Meno aye omiyo Yecu olwongogi ni Lutino pa Mor Kot! Ento Yecu owaco botgi ni pe opore me tero jo mukene i yo ma kit meno.—Luka 9:51-56, Baibol pa Katoli; Marako 3:17.

Obedo gire lok ada ni i cawa mukene dano giromo terowa i yo marac. Oromo bedo ni lutino mukene nongo pe gimito ni watuk kwedgi. Guromo bene wacci: “Pe wamito in i kinwa kany.” Ka gin ma kit meno otimme, romo cwero cwinywa, pe kumeno? Waromo tamo ni myero wacul wange bene. Ento omyero mono wacul wange?—

Pingo pe ikwany Baibulli? Wek wayab Carolok cura 24, tyeng 29. Kwanne kit man ni: “Pe myero iwac ni, ‘Abitimo gin ma en otimo i koma-ni bene i kome; abiculo wang gin ma dano meno otimo.’”

In itamo ni tyeng man te lokke ngo?— Tye ka wacci myero pe watemme me culo wang gin marac. Omyero pe water dano mo i yo marac pien ni en oterowa marac. Ento ka ngat mo oyenyo kolo i komi tektek kun mito lweny kono? En romo yenyo yo me miyo akemo omaki kun lwongi ki nying me anywar. En romo nywari kun waco ni ebwuro in woko. Tam kong ka en olwongi ni in lalworo. Ngo ma myero itim? Myero mono iye lweny kwede?—

Kong dok wanen gin ma Baibul waco. Yab Matayo cura 5, tyeng 39. Yecu owaco ni: “Pe icul kwor i kom dano mo ma otimo gin marac i komi. Ka ce ngat mo odongo [obapo] lemi tung lacuc,  lok bote lemi tung lacam wek odong [obap] bene.” In itamo ni ngo ma Yecu onongo tye ka wacone? En tika onongo tye ka wacci ka dano mo odongo lemi tung cel, ci in myero iwek en odong lemi tung cel bene?—

Pe, Yecu onongo pe tye ka waco kumeno. Dongo nyo bapo lem dano pat ki dongo dano ki cing ma olunge. Meno cok rom ki coro dano. Ngat mo romo dongo lemwa pi yenyo lweny. En nongo mito ni iwa owang. Dong ka iwa owang ci wacoro dano-nu, ngo ma timme?— Romo o wa i lweny.

Ento Yecu pe omito ni lulub kore gudony i lweny. Pi meno en owacci ka ngat mo odongo lemwa, omyero pe wadong lemme bene. Myero pe wawek iwa owang ma miyo watugo lweny. Ka walwenyo, wanyutu ni wan bene warom aroma ki ngat ma ocako lweny-nyi.

 Ka kicako yeli, ngo maber ma iromo timone?— Gin maber loyo aye me a woko. Ngat meno romo medde ki coro in wang mapol pol. Ento mogo bene dong gik kenyo. Ka ia woko, pe te lokke ni in igoro. Te lokke ni icung matek pi gin matir.

Ento ka iye lweny ci igoye kono? Ngo ma bitimme?— Ngat ma in igoyo ca romo dwogo ki lureme mukene. Gin romo goyi ki odoo madit nyo cubi ki pala. Dong, iromo niang pingo Yecu pe omito ni wadony i lweny?—

Ngo ma myero watim ka waneno jo mukene gitye ka lweny? Myero mono wacwak ngat acel i kingi?— Baibul tito botwa gin matir. Yab Carolok cura 26, tyeng 17. Waco ni: “Ngat ma donyo i lok daa ma pe okemo en rom ki ngat ma mako gwok ma tye ka kato akata ki ite.”

Ngo ma bitimme ka imako gwok ki ite? Biwano gwok meno, dok miyo doko ger i komi, pe kumeno? Ka gwok-ki medde ki yelle wek iwek ite, nongo myero imedde ki mako ite matek man miyo doko ger medde ameda. Ka iweke, en romo kayo in marac. Ento tika itwero cung kenyo kun imako ite nakanaka?—

Meno aye kodi peko ma wabibedo iye ka wadonyo i lweny pa jo mukene. Oromo bedo ni pe wangeyo ngat ma ocako lweny meno nyo pingo gitye ka lweny. Twero bedo ni kitye ka goyo ngat acel pien ni gwok okwalo gin mo ki bot lawote ca. Ka  wakonyo en, nongo watye ka konyo lakwo. Meno pe obedo gin maber, pe kumeno?

Dong ngo ma myero itim ka ineno dano ma gitye ka lweny?— Ka tye ka timme ki i cukul, iromo ngwec bot lapwony wek ititte. Ka tye ka mapat ki i cukul, ci iromo lwongo lanyodoni nyo abili. Kadi ka jo mukene gimito lweny, wan omyero wabed jo ma kelo kuc.

Lupwonnye me ada pa Yecu gitimo jami ducu ma twere wek pe gidony i lweny. I yo ma kit man wanyutu ni wacung matek pi gin matir. Baibul waco ni lapwonnye pa Yecu “myero obed ngat ma pe da atata, myero obed ngat ma lakica bot dano ducu.”—2 Temceo 2:24.