I DUL aryo mukato-ni, dano adi ma wakwano lok i komgi ma kicerogi?— Dano abic. Lutino gubedo gin adi?— Gin adek. Me angwenne obedo awobi. Itamo ni man nyuto gin ango?—

Man nyuto ni Lubanga maro jo matino. Ento en bicero jo mapol bene. Jo ma gutimo jami mabeco aye mono Lubanga bicerogi keken?— Watwero tamo kumeno. Ento inongo ni dano mapol pe gupwonyo lok ada madok i kom Lubanga Jehovah gin ki Wode. Pi meno, gin gutimo jami maraco pien kipwonyogi jami maraco. Itamo ni Jehovah bicero jo macalo meno?—

Baibul wacci: “Dano gibicer woko, jo ma kitgi atir wa ki jo ma kitgi pe atir.” (Tic pa Lukwena 24:15) Pingo jo ma kitgi pe atir, nyo ma pe gutimo jami matir kibicerogi?— Pien ni pe gunongo kare me pwonyo lok i kom Jehovah ki dong gin ma en mito ni dano gutim.

 Itamo ni dano kibicerogi awene?— Tam kong i kare ma Lajaro oto ci Yecu ocikke bot laminne Marita ni: “Omeru bicer.” Marita ogamo ni: “Angeyo ni en bicer i cer me nino me agik[ki].” (Jon 11:23, 24) Ngo ma Marita onongo tye ka wacone i kare ma en owacci Lajaro bicer i “nino me agik[ki]”?—

Marita onongo owinyo cikke pa Yecu ni: ‘Jo ducu ma tye i lyel gibikatti woko.’ (Jon 5:28, 29) Pi meno, “nino me agik[ki]” aye kare ma kibicero iye jo ducu ma wi Lubanga po i komgi. Nino man me agikki-ni pe obedo nino acel keken. Ento bibedo mwaka alip acel kulu. Baibul waco ni, ‘Lubanga bingolo kop i kom dano ducu ma i lobo,’ i nino man kikome. Jo ma en bingolo kop i komgi-ni kwako bene jo ma kibicerogi.—Tic pa Lukwena 17:31; 2 Petero 3:8.

Tam kong kit ma nino man bibedo me yomcwiny kwede! I kare man me mwaka alip acel-li, dano milion mapol ata ma guto kibicerogi woko. Yecu olwongo kabedo ma kibicero iye jo-ni ni Paradic. Kong dong wanenu ka ma Paradic bibedo iye ki kit ma kwo bibedo kwede kunnu.

I kine ma romo cawa adek ma peya Yecu oto i kom yat, en oloko lok i kom Paradic bot laco mo ma giguro i kom yat cok kwede. Laco man gingolo to i wiye pi bal mapol ma en otimo. Ento i kare ma latim bal-li obedo ka neno Yecu kun winyo  ngo ma giloko i Kome, en ocako bedo ki niye i kom Yecu. Pi meno, latim bal-li owaco ni: “Po pira ka ibidonyo i kerri.” Yecu odok iye ni: ‘Ada, awacci tin ni, wabibedo kwedi i Paradic.’—Luka 23:42, 43.

Ngo ma Yecu onongo tye ka wacone i kare ma en loko lok man? Paradic mono tye kwene?— Tam kong. Mukwongo, Paradic mono ocakke ki kwene?— Wi myero opo ni Lubanga omiyo paradic bot laco mukwongo Adam gin ki dakone, wek gukwo iye i lobo kany. Onongo gilwongo poto meno ni Eden. Lee bene onongo gitye i poto meno, ento pe guwano ngat mo keken. Dok bene onongo tye yadi mapol ma nyiggi mit, kacel ki kulu mo madit adada. Kabedo man onongo mwonya mada me kwo!—Acakki 2:8-10.

Pi meno, ka wakwano ni latim bal-li bibedo tye i Paradic, omyero wago i wiwa cal lobo man ma kiloko odoko kabedo mamwonya me kwo. Yecu mono bibedo i Paradic i lobo kany kacel ki latim bal man macon-ni?— Pe. Mono ingeyo pingo en pe bibedo i lobo kany?—

Tye kumeno pien Yecu bibedo i polo macalo Kabaka kun loyo lobo me Paradic-ci. Pi meno, bedo pa Yecu ki laco man te lokke ni Yecu bicere dok bineno ni jami ma mitte pire ocobbe. Ento, pingo mono Yecu biye ni ngat ma obedo latim bal meno okwo i  Paradic?— Kong wanen ka watwero nongo lagamme.

Ma peya latim bal-li oloko ki Yecu, en mono onongo ngeyo yub mapol pa Lubanga?— Pe, en onongo pe ngeyo. En otimo jami maraco pien onongo pe ngeyo lok ada madok i kom Lubanga. I Paradic, kibipwonye ki yub mapol pa Lubanga. I ngeye, en bibedo ki kare me nyutone ni ada emaro Lubanga ki timo Mitine.

Jo ducu ma kibicerogi mono gibikwo i Paradic i lobo kany?— Pe, pe gin ducu. Ingeyo mono pingo tye kumeno?— Tye kumeno pien jo mukene kibicerogi me kwo kacel ki Yecu i polo. Gin gibiloc kacel kwede kun giloyo lobo me Paradic. Kong wanenu kit ma wangeyo kwede man.

I dyewor ma peya Yecu oto, en owaco bot lukwenane ni: ‘I ot pa Abana i polo, tye kabedo mapol, dok Abicito ka yubo ki wun kabedo.’ Ci Yecu ocikke botgi ni: “Abidwogo ka omowu bota, wek ka ma an abedo iye, wun bene wubed iye.”—Jon 14:2, 3.

 Yecu ocito kwene i nge cerne?— En odok cen i polo me bedo ki Wonne. (Jon 17:4, 5) Pi meno, Yecu ocikke bot lukwenane ki lulub kore mukene ni ebicerogi wek gubed kacel kwede i polo. Ngo ma gin gibitimone kunnu kacel ki Yecu?— Baibul waco ni lupwonnyene ma gibibedo i “cer mukwongo” gibikwo i polo kun giloyo lobo macalo ‘luloc kacel kwede pi mwaka alip acel.’—Niyabo 5:10; 20:6; 2 Temceo 2:12.

Dano adi ma gibibedo i “cer mukwongo” kun gibiloc kacel ki Yecu?— Yecu owaco bot lupwonnyene ni: ‘Pe wulwor, wun romi manok, pien Wonwu oye atika me miyo botwu ker.’ (Luka 12:32) En “romi manok,” ma kibicerogi me bedo kacel ki Yecu i Kerre me polo-ni, welgi dong kimoko woko. Baibul nyuto ni “jo alip miya acel ki pyerangwen wiye angwen” kibicerogi ki i lobo.—Niyabo 14:1, 3.

Dano adi ma gibikwo i Paradic i lobo kany?— Baibul pe waco welle. Ento Lubanga onongo owaco bot Adam ki Kawa i kare ma gitye i poto me Eden-ni ni myero gunywal lutino dok gupong lobo. I ada, gin gukwero timo meno. Ento Lubanga bineno ni yubbe me pongo lobo ki jo mabeco ocobbe.—Acakki 1:28; Icaya 45:18; 55:11.

Tam kong kit ma bedo i Paradic bibedo mwonya kwede! Lobo-ni ducu bidoko calo poto me ature ki yadi maleng. Bipong ki winyi, lee, ki dong yadi kacel ki ature mabeco mapat pat. Ngat mo pe bibedo ki arem pien kome lit, nyo ngat mo pe bito. Jo ducu bibedo lurem. Ka wamito kwo pi naka i Paradic, man aye dong kare me yubbe pire.