1, 2. Ngo ma tugu cwinywa me maro Lubanga Jehovah?

IN TIKA imaro Lubanga? Ka dong ityeko dyero kwoni woko bot Jehovah, ci lagammi nongo tye atir ni ee labongo akalakala mo—dok man nongo tye kakare! Maro Jehovah obedo gin ma tye i remowa. Marwa pi Lubanga tye macalo adwogi me mar ma en tye kwede piwa. Baibul tito kit man ni: “Gin mumiyo wabedo ki mar, pien en [Jehovah] okwongo marowa.”—1 Jon 4:19.

² Jehovah aye okwongo kwanyo kare me nyutu marre piwa. En ominiwa lobo ma mwonya me bedo pacowa. En ominiwa jami me kom ma mitte pi kwowa. (Matayo 5:43-48) Ma pire tek loyo meno aye ni, en gwokowa i yo me cwiny. En ominiwa Lokke, Baibul. Medo i kom meno, en cuko cwinywa me lega bote kun wabedo ki gen ni en biwinyowa ci miniwa cwiny mere maleng me konyowa. (Jabuli 65:2; Luka 11:13) Ma dong pire tek loyo ducu, aye ni en ocwalo Wode me amara me bedo Ginkokwa wek ka twere kilarwa ki i bal ki to. Mar man ma Jehovah onyutiwa-ni pud dong dit ya!—Kwan Jon 3:16; Jo Roma 5:8.

3. (a) Ngo ma mitte ki tung botwa wek wabed i mar pa Lubanga? (b) Lapeny ma pire tek mene ma myero watam pire, dok lagamme nonge kwene?

 ³ Jehovah mito ni wanong adwogi maber ki i marre pi naka. Kono wabinongone nyo pe, dong cung i wiwa. Lok pa Lubanga cuko cwinywa ni: “Wugwokke kenwu i mar pa Lubanga . . . nio wa i kwo ma pe tum.” (Juda 21) Lok ni “wugwokke kenwu” nyutu ni tic mitte mada ki tung botwa ka wamito ni wabed i mar pa Lubanga. Omyero wanyut ni wajolo marre i yo ma nen. Lapeny ma pire tek ma omyero watam pire tye ni ‘An mono atwero nyutu marra pi Lubanga nining?’ Lagamme  nonge i lok pa lakwena Jon ni: “Maro Lubanga en aye gwoko cikke. Dok cikke pe nurowa.” (1 Jon 5:3) Omyero wangi tyen lok man ki diro, pien wamito ni wanyut ki Lubanga ni wamaro en tutwal.

4, 5. (a) Lok man ni “maro Lubanga” loko i kom ngo? (b) Tit kit ma mar pi Lubanga ocako dongo kwede i cwinyi.

⁴ “Maro Lubanga”—ngo ma lakwena Jon onongo tye ka tamone i kare ma en ocoyo lok man? Lok man pe loko i kom mar pa Lubanga piwa, ento i kom marwa pire. Wi po awene ma mar pi Jehovah ocako dongo kwede i cwinyi?

⁵ Wi myero opo i kom kare ma onongo pud icako pwonyo lok ada i kom Jehovah kacel ki yubbe acaka ci icako bedo ki niye. Itunu i niang ni kadi bed ni kinywalli macalo labal ma tye bor ki Lubanga, ento Jehovah otiyo ki Kricito me yabbi yo me nongo kwo ma roc mo pe iye ma Adam orwenyo-ni, ki dong me nongo kwo ma pe tum. (Matayo 20:28; Jo Roma 5:12, 18) Icako niang i kom twon mic ma Jehovah omiyo i cwalo Wode ma pire litte loyo me to piri. Lokke ogudo cwinyi, ci cwinyi ocako maro Lubanga pi mar madit ma en onyutu piri.—Kwan 1 Jon 4:9, 10.

6. Mar me ada kinyutu nining, dok mar pi Lubanga oterri i timo ngo?

⁶ Kit ma iwinyo kwede con ca, onongo pud obedo acakki me bedo ki mar i kom Jehovah. Mar pe obedo gin ma wawinyo ki i cwinywa keken ci otum; nyo ni wawaco awaca ki dogwa. Mar me ada pi Lubanga pe gik ki wacone ni, “An amaro Jehovah” keken. Calo niye, mar me ada nen i ticce. (Yakobo 2:26) Wanyutu mar tutwalle ka ce watimo jami ma nongo yomo cwiny ngat ma  wamaro-ni. Pi meno, i kare ma mar pi Jehovah orwako lwite i cwinyi, oterri i cako mito kwo i yo ma yomo cwiny Wonwa me polo. In mono ibedo Lacaden ma dong otyeko nongo batija woko? Ka tye kit meno, ci mar matut ca aye omiyo imoko tam ma pire tek tutwal-li i kwoni. Idyere bot Jehovah me tiyo mitine, ci inyutu dyereni-ni ki nongo batija. (Kwan Jo Roma 14:7, 8) Cobo cikke man bot Jehovah kwako gin ma lakwena Jon oloko lacen.

7. Cik pa Lubanga mogo obedo ngo, dok lubugi kwako timo ngo?

⁷ Jon otito ni maro Lubanga: “en aye gwoko cikke.” Cik pa Lubanga obedo ngo? Jehovah ominiwa cik mapol ma mako kom jami mogo atir kun tiyo ki Lokke, Baibul. Me laporre, en okwero tim calo mero, tim tarwang, woro cal apaya, kwo, ki goba. (1 Jo Korint 5:11; 6:18; 10:14; Jo Epeco 4:28; Jo Kolocai 3:9) Lubu cik pa Lubanga kwako kwo i yo ma lubbe ki rwom me kwo ma Baibul ocimo atir.

8, 9. Wan watwero ngeyo gin ma yomo cwiny Jehovah nining kadi bed i jami ma cik me Baibul pe loko iye atir atir? Mi lapor mo.

⁸ Tye kono ni, wek wayom cwiny Jehovah, omyero watim gin makato lubu cikke ma cimo gin ma en mito atir. Jehovah pe oduriwa lwak cik ma doro kit ma omyero wakwo kwede nino ducu. Pi meno, i kwowa me nino ducu, waromo rwatte ki jami mapol ma nongo cik me Baibul pe loko iye atir atir. Ka warwatte ki jami ma kit meno, wan wabingeyo nining gin ma biyomo cwiny Jehovah? Baibul tye ki lok mapol ma nyutu ka maleng kit ma Lubanga tamo kwede. Ka wawoto ki kwano Baibul, wapwonyo ngo ma Jehovah maro ki ngo ma en dag. (Kwan Jabuli 97:10; Carolok 6:16-19) Wacako niang  tam ki tic ma en maro. Ka wamedde ki pwonyo lok i kom kit pa Jehovah ki yone, ci waweko tamme medde ki doro tamwa ki ticwa. Dong, kadi wa i jami ma cik me Baibul pe loko iye atir atir, pol kare pud watwero niang “gin ma Rwot [Jehovah] mito.”—Jo Epeco 5:17.

⁹ Me laporre, pe tye cik mo i Baibul ma wacciwa atir atir ni omyero pe wanen video nyo yub me TV ma nyutu lweny nyo tim me tarwang maraco mukato kare. Kany bene dok pud wamito ni cik mo ocim botwa atir atir ni neno jami magi raco? Wangeyo kit ma Jehovah neno kwede jami magi. Lokke tittiwa ka maleng ni: ‘Jehovah dag ngat ma maro timo tim bwami.’ (Jabuli 11:5) Dok waco bene ni: “Lubanga bingolo kop i kom lutim tim me abor ki jo ma balo nyomgi.” (Jo Ibru 13:4) Ka watamo i kom lok me Baibul magi, ci waniang maber gin ma Jehovah mito. Pi meno pe waye galowangwa ki neno jami ma nyutu tim ma Lubanga dag. Wangeyo ni yomo cwiny Jehovah mada ka wakwero tim cilo ma lobo-ni temme me nyutune ni obedo galowang mamwa ma pe timo gin mo. *

10, 11. Ngo ma miyo wan wawinyo Jehovah, dok kodi winy ango ma wabedo kwede bote?

¹⁰ Tyen lok ma pire tek ango mumiyo walubu cik pa Lubanga? Pingo wamito ni wakwo kwowa me nino ducu ma lubbe ki tam ma wangeyo ni obedo tam pa Lubanga? Wan pe wakwanyo yo man pien ni wamito bwot ki i nongo pwod nyo gwokke ki i kom adwogi marac ma bino i kom jo ma gikwero lubu gin ma Lubanga mito. (Jo Galatia 6:7) Ma ka meno, wan waneno winyo Jehovah calo yo maber me nyutu marwa pi en. Kit macalo latin tye ki cwiny me nongo cwak pa wonne, wan bene  wamito ni wanong cwak pa Jehovah. (Jabuli 5:12) En obedo Wonwa, dok wamarre bene. Pe tye gin mo ma keliwa yomcwiny nyo yengo ma loyo ngeyo ni wan watye ka kwo i yo ma miyo “[Jehovah] bedo ki yomcwiny” i komwa.—Carolok 12:2.

¹¹ Pi meno, bedo ki winywa-ni, pe bedo koko koko; nyo ni watimo i wi dic. * Wan pe wayero, kun wabedo ki winy i cik moni ka nongo waneno ni pe diyowa nyo ni lubune yot. Pe tye kit meno, wan ‘walubo kun a ki i cwinywa.’ (Jo Roma 6:17) Wan wawinyo kit ma laco Jabuli ocoyo kwede ni: “Anongo yomcwiny i lubo cikki ducu, pien amarogi mada.” (Jabuli 119:47) Ada, wan wamaro winyo Jehovah. Wanongo ni man pore—dok mitte ni omyero wabed luwiny ki cwinywa ducu kadi bed diyowa nyo pe. (Nwoyo Cik 12:32) Wamito ni Jehovah olok i komwa kit ma Lokke oloko kwede i kom Nua. Baibul oloko i kom dano ma lagen Nua, ma onyutu mar i kom Lubanga ki bedo lawiny pi mwaki mapol-li, ni: “Nua otimo kumeno; ocobo ducu macalo Lubanga ocike.”—Acakki 6:22.

12. Wek winywa okel yomcwiny madit bot Jehovah, omyero winye obed nining?

¹² Jehovah kono winyo nining pi bedo ki winy ma a ki i cwinywa-ni? Lokke waco ni wan waweko ‘cwinye bedo yom.’ (Carolok 27:11) Bedo ki winywa mono ada kelo yomcwiny bot Won Twer Ducu ma Loyo polo ki lobo-ni? Ee, kelo—dok pi tyen lok maber! Jehovah ocweyowa me bedo agonya me moko tamwa. Man nyuto ni wan kara watye agonya me yero gin ma iwa mito; watwero  yero me winyo Lubanga, nyo pe. (Nwoyo Cik 30:15, 16, 19, 20) Ka wayero me winyo Jehovah labongo dic mo dok ka gin ma oterowa i moko tam meno obedo pi mar ma opong i cwinywa pi Lubanga, ci wakelo twon yomcwiny madit bot Wonwa ma i polo. (Carolok 11:20) Nongo bene watye ka yero yo maber loyo me kwo.

13, 14. Pingo kitwero wacone ni cik pa Lubanga “pe nurowa,” dok man kiromo porone nining?

¹³ Lakwena Jon owacciwa lok mo ma jingo cwinywa mada i kom cik pa Jehovah: “Cikke pe nurowa.” Nyig lok me leb Grik ma kigonyo ni “nurowa” i 1 Jon 5:3 tyene i atir atir obedo “pek.” * Bible mukene gonyo ni: “Cikke pe pek ma diyowa.” (New English Translation) Cik pa Jehovah pe obedo cik ma diyowa. Kadiwa dano ma gitye ki roc bene giromo lubu cikke.

¹⁴ Waromo porone kit man. Ket ni laremi mo olwongi ni ibin ikonye wek edak i ot manyen. Ket-ti inongo yec tye mapol ma omyero kitergi. Mukene giyot ma ngat acel twero tingogi kene labongo ayela, ento mukene gipek ma myero dano aryo aye guting. Laremi ni oyero yec ma en mito ni itinggi. In itamo ni en twero wacci iting yec ma nongo gipek kato keroni woko-ni? Pe. En nongo pe mito ni iwanne ki temo tingogi keni. I yo acel-lu, Lubangawa ma lamar dok lakica-ni, pe ketiwa cik matek ma cobone loyowa woko. (Nwoyo Cik 30:11-14) En pe ye ni omyero wating twon yec ma pek  kumeno. Jehovah niang gorowa, pien “en ngeyo kit gin ma ecweyowa kwede; en po ni wan apwa mamwa.”—Jabuli 103:14.

15. Pingo watwero bedo labongo akalakala mo ni cik pa Jehovah tye pi ber bedowa?

¹⁵ Cik pa Jehovah pe nurowa matwal; cikke gitye pi ber bedowa. (Kwan Icaya 48:17.) Omiyo Moses owaco bot Jo Icrael me karegi ca ni: “[Jehovah] yam ocikowa ni walub cik magi ducu, dok ni walwor Rwot Lubangawa wek wabed maber nakanaka, wek en ogwokwa wabed makwo, macalo koni watye-ni.” (Nwoyo Cik 6:24) Wan bene watwero bedo labongo akalakala mo ni Jehovah ominiwa cikke kun ngeyo ni tye pi ber bedowa—yubbe tye pi bedowa pi nakanaka. Tam kong, cakke nining ni en dok twero miyowa cik pi wanowa? Jehovah obedo Lubanga ma tye ki ryeko matut. (Jo Roma 11:33) Pi meno, en ngeyo ngo ma ber piwa. Jehovah bene tye lanen maber me mar. (1 Jon 4:8) Mar, obedo kite ma pire tek mada, ma doro jami ducu ma en waco nyo timo. Mar aye obedo guti me cik ducu ma en omiyo bot dano.

16. Kadi bed watye i lyeto ma a ki i lobo man marac-ci kacel ki goro ma terowa i bal, pingo pud watwero bedo ki winy?

¹⁶ Man pe tere ni winyo Lubanga obedo gin mayot mada. Omyero walweny ki lyeto ma a ki i lobo man marac ma ‘tye i te loc pa Larac-ci.’ (1 Jon 5:19) Omyero walweny bene ki komwa ma goro, ma terowa i turo cik pa Lubanga. (Jo Roma 7:21-25) Ento marwa pi Lubanga twero miyo waloyo lweny magi. Jehovah goyo laane i kom jo ma gimito nyutu margi i kome ki bedo luwiny. En miyo cwiny mere maleng “bot jo ma giwinye.” (Tic pa Lukwena 5:32) Cwiny man nyako nyig mabeco i kwowa—pigi tego ma twero konyowa me lubu yo me bedo ki winy.—Jo Galatia 5:22, 23.

17, 18. (a) Ngo ma wabingiyone i buk man, dok ka watye ka ngiyone, ngo ma omyero waket obed i wiwa? (b) Ngo ma kibinyamone i dul ma lubu man?

 ¹⁷ I buk man, wabingiyo cik ki rwom me kwo ma Jehovah mito kacel ki jami mukene mapol ma dok i kom mitine. Ka watye ka ngiyogi, omyero wiwa opo i kom jami mapol ma pigi tego. Omyero wiwa opo ni Jehovah pe diyowa me lubu cikke; en mito winy ma a ki i cwinywa. Wiwa myero pe owil ni Jehovah tye ka mito ni wakwo i yo ma bikeliwa mot madit i kare-ni kun terowa i kwo ma pe tum i kare me anyim. Dong omyero wanen bedo ki winy ma a ki i cwinywa-ni calo yo maber me nyutu ki Jehovah mar madit ma watye kwede i kome.

¹⁸ Me konyowa ngeyo gin maber ki marac, Jehovah ki twon mar madit ocweyowa ki cwiny ma ngoliwa kop. Ento, wek otelwa maber, cwinywa ma ngoliwa kop-pi omyero kong onong pwony muromo kit ma dul ma lubu man binyamone kwede.