1-3. (a) Dano mapol gineno dog ticgi nining? (b) Baibul kono cuko cwiny dano me neno tic nining, dok lapeny ango ma wabinenogi i dul man?

BOT dano mapol i lobo-ni, tic obedo gin ma pe kelo yomcwiny. Jo mukene giyelle ayela me cito i dog ticgi nino ducu, pien ni gitiyo matek pi cawa malac i tic ma nongo pe yomo cwinygi. Jo ma gitye ki kodi cwiny ma kit man kiromo konyogi nining wek gucak bedo ki miti i kom ticgi?

² Baibul cuko cwinywa me neno tic i yo matir. Tito ni tic ki dok adwogi ma bino i ngeye obedo mot. Solomon ocoyo ni: “Dano acel acel myero ocam cam, dok omat mat-gu, dok onong yomcwiny ma a i kom ticce ducu ma en tiyo.” (Latitlok 3:13) Jehovah marowa dok kare ducu mito ni eminiwa gin maber, mito ni wanong yengo kacel ki yomcwiny i tic ma watiyo. Me bedo i marre, omyero wakwo i yo ma rwatte ki tamme kacel ki cikke ma kwako tic.—Kwan Latitlok 2:24; 5:18.

³ I dul man, wabineno lapeny angwen mapat pat: Wan waromo nongo yomcwiny ki i ticwa nining? Kodi tic ango ma pe opore pi Lakricitayo me ada? Waromo weko dog ticwa ki ticwa pi Lubanga woto maber nining? Tic ma dong pire tek loyo ango ma myero wan watim? Ento mukwongo, kong wanenu lanen pa jo aryo ma  gubedo lutic matek loyo i polo ki lobo—Lubanga Jehovah gin ki Yecu Kricito.

4, 5. Baibul nyutu nining ni Jehovah obedo latic matek?

⁴ Jehovah aye obedo Latic Madit Loyo Ducu. Acakki 1:1 tito ni: “I acakki piny Lubanga oketo polo ki lobo.” I kare ma Lubanga ocobo ticce me cweyo lobo, en oneno adwogi me ticce ci owacci “tye mabeco twatwal.” (Acakki 1:31) Ma te lokke ni, en onongo oyeng ki ticce ma en otimo i lobo. Labongo akalakala mo, Jehovah ma obedo “Lubanga ma layomcwiny” onongo yomcwiny pi jami mabeco ma en ocweyogi.—1 Temceo 1:11, NW.

⁵ Lubangawa ma obedo latic matek-ki peya ogiko ticce. I nge mwaki mapol ma dong Lubanga otyeko cweyo jami ma tye i lobo-ni, Yecu owacci: “Wora tye ka tic nio koni.” (Jon 5:17) Won obedo ka timo gin ango? Ki i kabedone i polo, en obedo ka medde ki ticce me tiro ki gwoko dano. En ocweyo cwec “ma giketo manyen,” ma gin aye Lukricitayo ma kiwirogi ki cwiny maleng ma gibiloc kacel ki Yecu i polo. (2 Jo Korint 5:17) En obedo ka tiyo tic me cobo yubbe pi dano—wek jo ma maro en gunong kwo ma pe tum i lobo manyen. (Jo Roma 6:23) Cwiny Jehovah myero obed ni yom mada pi adwogi maber ma tic man okelo. Dano milion mapol dong gujolo kwena me Ker-ri, kun Lubanga aye nyikogi bote dok gitye ka yubo kwogi me bedo matwal i marre.—Jon 6:44.

6, 7. Yecu tye ki rekod ango me tic matek?

⁶ Yecu bene ngene tutwal pi tic matek. Ma peya obino i lobo macalo dano, en obedo “ladiro tic” pa Lubanga i cweyo jami ducu ‘ma tye i polo ki ma i wi lobo.’ (Carolok 8:22-31; Jo Kolocai 1:15-17) I kare ma Yecu tye  i lobo, en omedde ki bedo latic matek. I kare me tinone, en opwonyo tic me gedo ma oweko onongo kingeye ni “lapac.” (Marako 6:3) Man obedo tic ma onongo tek mada dok mito diro muromo—pien jami calo langol bao, ka cato bao kacel ki jami tic ma tiyo ki mac onongo pud pe. Tika iromo goyo cal Yecu ma tye ka cito ka gamo baone—nyo ma tye ka tongo yadi ki dok tingone me kelone i ka pacce? Tika iromo goyo calle ma en tye ka tic i kom ot—calo guru wi ot, guru doggola, ki yubo jami mukene calo mejagi-ni? Yecu onongo ngeyo labongo akalakala mo yomcwiny ma bino pi tic matek ki diro.

⁷ Yecu onongo ngene matek pi tic me pwony. En otiyo matek i tic man ma pire tek-ki pi mwaki adek ki nucu kulu. En onongo tiyo cakke odiko nio wa otyeno, pien onongo mito o bot dano mapol. (Luka 21:37, 38; Jon 3:2) En owoto “i kin gangi madongo ki matino kun tito dok nyuto lok me kwena maber i kom Ker pa Lubanga.” (Luka 8:1) Yecu owoto mairo mapol ki tyene i yo gudi ma apwa dwong iye pi tero kwena maber bot dano.

8, 9. Yecu onongo yomcwiny i ticce nining?

⁸ Yecu mono onongo yomcwiny i ticce me pwony? Ee! En ocoyo kodi me lok me ada me Ker-ri, kun oweko poto ma dong ocek woko me akaya i ngeye. Tiyo tic pa Lubanga omiyo kero bot Yecu ma oweko i cawa mukene en okwero wa camo cam woko pi cobo tic pa Wonne. (Jon 4:31-38) Tam kong yomcwiny ma en obedo kwede i kare ma en dong oo i agikki me ticce i lobo, ka omiyo ripot me ada bot Wonne ni: “Dong aketo deyo i komi i lobo, kun acobo tic ma ceng imiya me atiya.”—Jon 17:4.

⁹ Adada Jehovah ki Yecu pud dong gubedo lanen  maber loyo i kin jo ma gunongo yomcwiny i ticgi. Marwa pi Jehovah miyo wan bene ‘walubo kit pa Lubanga.’ (Jo Epeco 5:1) Marwa i kom Yecu weko ‘walubu kore macok.’ (1 Petero 2:21) Pi meno kong dong wanenu kit ma wan bene watwero nongo yomcwiny i ticwa.

10, 11. Ngo ma twero konyowa me dongo tam maber pi dog ticwa?

¹⁰ Tic me lobo-ni obedo but kwo pa Lukricitayo me ada. Wamito ni wanong yomcwiny kacel ki yengo i ticwa, ento man romo bedo tek adada ka ce watye i dog tic mo ma pe wamaro. Dong watwero nongo yomcwiny nining ka watye i dog tic ma kit man?

¹¹ Ki dongo tam maber. Pol kare pe waromo loko kit ma watye kwede, ento waromo loko tamwa aye. Lwodo lok i kom kit ma Lubanga neno kwede tic twero konyowa me dongo tam maber i kom tic. Me labolle, ka in ibedo lawi ot, tam kong kit ma ticci tye ka konyi kwede me gwoko jo me odi kadi bed ni ticce goro adada. Ki bot Lubanga, gwoko joni me amara pe obedo gin matidi. Lokke wacciwa ni ngat ma pe gwoko jo me ode nongo “odoko rac makato ngat ma pe oye Lubanga.” (1 Temceo 5:8) Ngeyo ni ticci-ni obedo yo me gwoko kwo—ma miyo icobo tic ma Lubanga omini—twero konyi me neno ni ticci-ni tye pi tyen lok, ma lutic luwoti nongo pe gingeyo meno.

12. I yo ango ma tic matek ki bedo ngat ma gene i dog ticwa kelo mot?

¹² Ki tic matek kun ibedo ngat ma gene. Tiyo tic ki mit kom ki dok pwonyo kit ma myero wati kwede ticwa maber twero kelo mot mapol. Ludito tic gimaro lutic ma gitiyo matek dok ki diro. (Carolok 12:24; 22:29) Macalo  Lukricitayo me ada, omyero wabed bene jo ma gene i dog ticwa—pe omyero wakwal cente, jami tic, nyo wabal cawa ma kimiyowa me tic. (Jo Epeco 4:28) Kit ma waneno kwede i dul mukato-ni, bedo ngat ma gene kelo mot. Latic ma kite gene pole kimaro genone bene. Kadi bed ludito ticwa gingeyo lanenwa maber macalo lutic matek nyo pe, pud waromo nongo yengo ma bino pien “wangeyo ada ni cwinywa gire leng” kun bene wangeyo nongo ni wayomo cwiny Lubangawa ma wamaro-ni.—Jo Ibru 13:18; Jo Kolocai 3:22-24.

13. Lanen maber ma wanyutu i gang tic twero kelo adwogi ango?

 ¹³ Ki ngeyo ni kitwa twero kelo deyo i kom Lubanga. Ka wagwoko kitwa maber macalo Lukricitayo i dog tic, jo mukene giromo nenone. Adwogine bedo ningo? Weko ‘wamiyo pwony pa Lubanga Lalarwa nen ma mwonya.’ (Tito 2:9, 10) Ada, ber kitwa weko jo mukene gineno ni worowa kara ber, ma twero cako ywayogi iye. Tam kong kit ma ibiwinyo kwede ka latic lawoti mo ocako jolo lok me ada pi lanenni maber i gang tic! Ma dong pire tek loyo aye ni: Ngo ma pud dong kelo yomcwiny loyo ngeyone ni ber kiti-ni kelo deyo i kom Jehovah dok yomo cwinye?—Kwan Carolok 27:11; 1 Petero 2:12.

14-16. Ka watye ka moko tamwa me cako dog tic moni, lapeny aryo ma pigi tego mene ma myero kong wapenye kwede?

¹⁴ Ka odok i lok kom tic, Baibul pe ocimo kit tic mene ma omyero wati, ki mene ma omyero pe wati. Man kono pe te lokke ni dong waye dog tic mo keken kadi ticce obedo nining. Ginacoya twero konyowa me yero tic maber, dok matir ma nongo yomo cwiny Lubanga kun wakwero tic mogo ma pe yomo cwinye. (Carolok 2:6) Ka watye ka moko tamwa pi dog tic moni, omyero kong wapenye ki lapeny aryo ma pigi tego.

¹⁵ Timo tic man mono miyo atimo gin ma cik me Baibul okwero? Lok pa Lubanga okwero atir ka maleng tim me kwalo kwo, goba, ki yubo cal jogi. (Nia 20:4; Tic pa Lukwena 15:29; Jo Epeco 4:28; Niyabo 21:8) Omyero wakwer dog tic mo keken ma miyo watimo jami ma kit magi. Marwa pi Jehovah pe biye ni wadony i tic mo ma weko watimo tim mogo ma turo cik pa Lubanga.—Kwan 1 Jon 5:3.

¹⁶ Dog tic eni mono bimiyo an bene acwako nyo adoko  lamed kor tim maraco? Nen kong labol acel. Tic calo ngat ma kipenyo ka dano obino i opic pe obedo tic marac. Ento mono ket-ti Lakricitayo moni gimiye tic ma kit man i kilinik me onyo ic? Ticce-ni gire nongo pe kwako miyo kony me onyo ic atir atir. Ento, wirene i tic kunu nino ducu mono nongo pe tye ka konyo kor kilinik ma ticce obedo me onyo ic—tim ma Lok pa Lubanga pe cwako? (Nia 21:22-24) Macalo jo ma gimaro Jehovah,  pe wamito ni wadony i tim mogo ma Ginacoya kwero.

17. (a) Kit jami mene ma omyero kong wangi matut i lok madok i kom dog tic? (Nen bok ma tye i pot  karatac 177.) (b) Cwiny ma ngoliwa kop-pi twero konyowa me moko tam ma yomo cwiny Lubanga nining?

¹⁷ Kop ma mako dog tic romo cobbe maber ka ce wangiyo lagam me lapeny aryo ma pigi tego ma tye i paragraf 15 ki 16 ki diro. Medo i kom meno, tye jami mukene ma omyero kong bene wangi matut ka watye ka moko tam ma dok i kom dog tic moni. * Pe myero watam ni lagwok ot ma lagen biminiwa cik ducu ma kwako kwai tic ducu. Ka kany aye dong ka ma ngiyo gin moni ki diro mitte iye ki tung botwa. Kit ma waneno kwede i Dul me 2, omyero wapwony cwiny ma ngoliwa kop-pi  ki bedo ka kwano kit ma myero waket kwede Lok pa Lubanga i tic i kwowa me nino ducu. Ka kerowa “me poko gin maber ki gin marac dong ojing pi ketone i tic,” ci cwiny ma ngoliwa kop-pi bikonyowa me moko tam ma yomo cwiny Lubanga kun weko wabedo i mar pa Lubanga.—Jo Ibru 5:14.

18. Pingo cung matek i yo me cwiny pe yot?

¹⁸ Gwoko kwowa me cwiny pe obedo gin mayot i kare man me “agikki” ma ‘pinye tye marac-ci.’ (2 Temceo 3:1) Nongo tic ki gwokone pe obedo gin mayot. Macalo Lukricitayo me ada, wangeyo ni pire tek me tic matek pi pito jo me odiwa. Ento ka pe wagwokke, ci lyeto ma wanongo ki i dog tic nyo tam me lobo-ni pi jami me kom twero balo ticwa me cwiny woko. (1 Temceo 6:9, 10) Kong dong wanenu kit ma watwero cung kwede matek, kun waketo ‘jami ma pigi tego makato’ bedo mukwongo.—Jo Pilipi 1:10.

19. Pingo pore me keto genwa ducu i kom Jehovah, dok gen ma kit meno konyowa me gwokke ki i kom ngo?

¹⁹ Ket genni ducu i kom Jehovah. (Kwan Carolok 3:5, 6.) En mono pe opore me nongo genwa? Opore, pien en paro piwa. (1 Petero 5:7) En ngeyo mitiwa maber makato wa wan kikomwa, dok cinge bene pe cek. (Jabuli 37:25) Pi meno, omyero wawiny Lokke ma poyo wiwa ni: “Pe wubed jo ma maro lim; jami ma wutye kwede myero oromwu, pien Lubanga yam oloko ni pe abiboli, pe abibwoti ata.” (Jo Ibru 13:5) Jo mapol ma gitiyo ticwa-ni pi kare malac gitwero miyo caden i kom kero pa Lubanga me miyo jami ma mitte pi kwo. Ka wageno ki cwinywa ducu ni Jehovah bigwokowa, ci pe wabedo ki par ma obwoyo komwa woko i lok me pito jo me  odiwa. (Matayo 6:25-32) Pe wabiweko dog ticwa miyo cwinywa bedo nok i ticwa pi Lubanga, calo tito lok me kwena maber-ri ki dok bedo i cokke.—Matayo 24:14; Jo Ibru 10:24, 25.

20. Bedo ki wang ma pe mito jami mapol te lokke ngo, dok iromo medde ki kwo ma kit meno nining?

²⁰ Bed ki wang ma pe mito jami mapol. (Kwan Matayo  6:22, 23.) Bedo ki wang ma pe mito jami mapol te lokke ni bedo ki kwo ma pe mito jami mapol. Lakricitayo ma wange pe mito jami mapol keto tamme i gin acel keken—timo miti pa Lubanga. Ka waketo wangwa i kom gin acel keken, ci pe wabitute me yenyo tic ma mucarane dit kacel ki kwo ma lamal. Pe bene wabijingo komwa me bedo ka yenyo jami me kom mogo ma nongo pud okati nyen i cuk, ma nongo lucwal kwena me cato wil gimito ni wato pire atoya ka wamito nongo yomcwiny. Wan watwero bedo ki wang ma pe mito jami mapol nining? Kwer donyo i den mogo ma konye peke. Pe idur jami mapol i kwoni ma twero balo cawani ki tammi-gu. Lub tam ma kimiyo i Baibul ma waco ni myero wawek “cam ki ginaruka” keken oromwa. (1 Temceo 6:8) Temme ki tekki ducu pe me duru jami mapol i kwoni.

21. Pingo myero waket jami ma pigi tek me atima obed tye, dok gin ango ma omyero obed mukwongo i kwowa?

²¹ Ket yub me cwiny, dok imok iye. Kit ma watye ki kare manok tutwal i kwowa-ni, omyero waket jami ma pigi tego me atima obed tye. Labongo meno, jami mogo ma pigi pe tego guromo camo cawawa ma myero wati kwede me timo jami ma pigi tego woko. Gin ango ma myero waket obed mukwongo i kwowa? Dano mapol i lobo-ni giketo kerogi i kwan me rwom mamalo pi nongo tic mapek i lobo-ni. Ento, Yecu okwayo lulub kore ni ‘gukwong keto cwinygi i kom Ker-re.’ (Matayo 6:33) Ada gire, macalo Lukricitayo me ada, waketo pi Ker pa Lubanga bedo gin mukwongo i kwowa. Yo me kwowa—jami ma wayerogi, yub ma waketo, ki jami ma watimogi—myero onyut ni lok me Kerri ki dong timo miti pa Lubanga obedo gin ma pire tek loyo i kwowa makato yenyo jami me kom ki tic.

22, 23. (a) Tic ma pire tek loyo pi Lukricitayo me ada obedo ango, dok wanyutu ni tic man pire tek botwa nining? (Nen bok ma tye i pot  karatac 180.) (b) In imoko tammi ningo ma lubbe ki lok kom dog tic?

²² Kit ma wangeyo ni dong wadonyo matut mada i kare me agikki-ni, omyero waket cwinywa i kom tic ma pire tek bot Lukricitayo me ada, tic me pwony ki loko dano wek gudok lupwonnye. (Matayo 24:14; 28:19, 20) Wamito ni waket cwinywa i timo tic me laro kwo pa dano calo Yecu ma obedo Lanenwa-ni. Watwero nyutune ni tic man pire tek botwa nining? Pol pa jo pa Lubanga gidyere ki cwinygi ducu i tiyo tic me pwony-nyi calo lutit kwena me kacokke. Jo mukene guketo yub wek giti calo painia nyo lumiconari. Pien gingeyo ber pa keto yub me cwiny, lunyodo mukene gucuko cwiny lutinogi me donyo i tic man pi kare malac. Tika lutit kwena ma komgi mit i tito kwena me Ker-ri ginongo yomcwiny ma a ki i tic me pwony? Ada, ginongo! Tic pi Jehovah ki cwinywa ducu obedo yo maber me nongo kwo me yomcwiny, yengo, ki mot mukene mapol ata.—Kwan Carolok 10:22.

²³ Jo mapol i kinwa gitero cawa mapol i dog tic wek ginong jami me kom pi jo me odigi. Wi myero opo ni Jehovah mito ni wanong yomcwiny i tic ma watiyo. Ka waloko tamwa ki yo me kwowa ma rwatte ki kit me nenone kacel ki cikke, ci wabinongo yomcwiny i ticwa. Pi meno, wamoku tamwa pe me weko dog ticwa obal tic me tito pi kwena maber me Ker pa Lubanga, ma obedo tic ma pire tek pud dong loyo-ni. Ka waketo tic man bedo mukwongo i kwowa, nongo wanyuto marwa pi Jehovah dok man biweko wabedo i mar pa Lubanga.