Go kong ni: Ka teke Julia oneno calle i kiyo, gin ma en neno keken aye cweyo. En loko kekene ni “omyero adwok kilona” —kadi bed lunyodone ki lureme giwacce ni “ojony calo tal.”

Cokcok-ki, Julia dong ocako tamo pi jami mogo ma en romo timone wek erweny “kilo aryo keken.” Gin ma myero en otim aye rii kec pi nino mogo . . .

Ka iwinyo calo Julia, ngo ma onongo ibitimo?

Paro pi kit ma inen kwede pe rac. Adada, Baibul loko i kom kit ma mon ki co mogo onongo gimwonya kwede, calo Cara, Lakeri, Abigail, Yucepu, ki dong Daudi. Baibul waco ni nyako ma nyinge Abicagi “onongo mwonya mada.”—1 Luker 1:4.

Ento, bulu mapol dok gitye ki par mukato kare woko pi kit ma ginen kwede. Man twero kelo pekki mapol. Tam kong:

• I kwed mo ma kitimo i lobo Amerika, pacen 58 pa anyira guwacci gucwe adada, kun i ada pacen 17 keken aye onongo gucwe.

• I kwed mukene ma kitimo i Amerika, kinongo ni pacen 45 pa mon ma gujony onongo kara gitamo ni gipek tutwal!

• I tutegi me doko tidi, bulu mogo gunongo two anorexia, ma obedo two ma romo neko ngat moni pien ni en kwero camo cam pi lworo ni ebicwe woko.

 Ka itye ka twoyo two anorexia nyo two mukene ma bino pi mito bedo tidi, nong kony. Cak ki tito pekoni bot lanyodoni nyo laremi mo madit ma igeno. Baibul wacci: “Larem me ada bedo ki mar kare ducu, dok bene bedo macalo omeru i kare me can.”—Carolok 17:17, NW.

Adada, cwiny ngat moni aye weko dano meno bedo mwonya nyo pe. Tam kong i kom Abcalom, wod pa Kabaka Daudi. Baibul wacci:

“Pe tye ngatti mo ma giboro mwonyane makato Abcalom ki i lobo Icrael ducu; kome mwonya cakke ki i tyene nio wa i cwiny dye wiye, kome ducu nen mwonya matek.”—2 Camuel 14:25.

Ento, cwiny awobi man onongo opong ki awaka ki woro, dok obedo laroro! Pi meno, Baibul pe loko maber i kom Abcalom; ma ka meno, nyuto ni oturo gennene labongo lewic mo dok oneko nek bene.

Pi tyen lok maber, Baibul miyowa tam man:

“Wuruk kit pa dano manyen.”—Jo Epeco 4:24.

“Rukwu pe obed ruk ma nen ki woko . . . , ento rukwu myero obed kit me cwiny ma pe nen.”—1 Petero 3:3, 4.

Kadi bed miti me bedo mwonya pe rac, ento gin ma pire tek loyo kit ma inen kwede aye kiti. I agikkine, bedo ki kit mabeco aye bimiyo inen mwonya bot jo mukene loyo bedo ki kom matek nyo kom ma olunge maber! Anyaka ma nyinge Phylicia owacci, “Bedo mwonya twero ywayo tam pa dano i komi oyotoyot, ento cwinyi ki kiti mabeco aye wi dano bipo iye loyo.”

Tika cwinyi pol kare cwer pi kit ma inen kwede?

Ngo ma onongo ibiloko i komi ka onongo itwero? (Gwel jami ducu ma imito lokone.)

• BOR-RI

• PEK-KI

• YER WI

• UMI

• WANGI

• KALANI

Ka igamo lapeny mukwongo ni ee dok igwelo jami adek nyo makato ma imito lokone, tam kong: Romo bedo ni jo mukene pe gineni marac tutwal kit ma inene kwede. Yot adada me keto cwinyi mukato kare woko i kom kit ma inen kwede.—1 Camuel 16:7.