Yecu aye Latel wi kacokke pa Lukricitayo. (Jo Epeco 5:23) I kare-ni Yecu telo wi lulub kore ki i polo kun tiyo ki “lagwok ot ma lagen dok maryek.” (Kwan Matayo 24:45.) Kit macalo Yecu Kricito aye ocimo “lagwok ot” meno, en bibedo olo ki twero mogo me moko tam, ento bimedde ki bedo lawiny bot Kricito dok bitic pi omegi Kricito. Anga ma obedo lagwok ot man? Dok en gwokowa nining?

1. Anga ma “lagwok ot ma lagen dok maryek”?

Jehovah kare ducu obedo ka tic ki ngat mo nyo gurup pa co mogo manok me miyo tira bot jone. (Malaki 2:7; Jo Ibru 1:1) I nge to pa Yecu, lukwena kacel ki ludongo mogo ma i Jerucalem gubedo ka telo wi jo pa Lubanga. (Tic pa Lukwena 15:2) Ma lubbe ki kit ma otimme kwede i kare meno, i kare-ni bene gurup pa luelda mogo manok—ma kilwongogi ni Lukiko Madit pa Lucaden pa Jehovah—aye miyo cam me cwiny dok doro wi tic me tito kwena. Gin aye “lagwok ot ma lagen dok maryek” ma Yecu ocimo. (Matayo 24:45a) Lumemba me Lukiko Madit ducu gubedo Lukricitayo ma kiwirogi, dok gitye ki gen me loc kacel ki Yecu i polo i nge togi.

2. Cam me cwiny ango ma lagwok ot ma lagen miyo?

Yecu owaco ni lagwok ot ma lagen ‘bipoko cam bot Lukricitayo luwote i kare ma mitte.’ (Matayo 24:45b) Kit macalo dek ma wacamo konyowa me bedo ki kero dok ma komwa yot, cam me cwiny—ma en aye Lok pa Lubanga—miniwa teko ma mitte me bedo lugen bot Jehovah ki dok me timo tic ma Yecu ominiwa me atima. (1 Temceo 4:6) Wanongo cam me cwiny meno ki i cokkewa, gure me adwol, gure madito, ki dong jami akwana ki vidio ma jenge i Baibul ma konyowa me niang gin ma Lubanga mito dok jingo watwa kwede.

 NONG NGEC MATUT

3. Jo pa Jehovah myero guyubbe maber macalo gurup

I te tela pa Yecu, Lukiko Madit doro tic pa Lucaden pa Jehovah ducu. Yub ma kit meno bene onongo tye i kare pa Lukricitayo macon. Tuk VIDIO.

Kwan 1 Jo Korint 14:33, 40, ci wunyam lapeny man:

• Tyeng magi nyuto nining ni Jehovah mito ni Lucadenne gutim jami kore ki kore macalo gurup?

4. Lagwok ot ma lagen doro wi tic me tito kwena

Tito kwena aye tic ma pire tek loyo ma Lukricitayo me kare macon onongo gitimo. Kwan Tic pa Lukwena 8:14, 25, ci wunyam lapeny magi:

• Anga ma onongo doro wi tic me pwony i kare pa Lukricitayo macon?

• Petero ki Jon gudok nining i tira ma gunongo ki bot lukwena mukene-ni?

Tito kwena aye tic ma pire tek loyo ma Lukiko Madit doro. Tuk VIDIO.

 Yecu onyuto kit ma tic me pwony pire tek kwede. Kwan Marako 13:10, ci wunyam lapeny magi:

• Pingo tic me pwony pire tek bot Lukiko Madit?

• Pingo wamito “lagwok ot ma lagen dok maryek” wek odor tic man ma kwako wi lobo ducu-ni?

5. Lagwok ot ma lagen miyo tira

Lukiko Madit miyo tira bot Lukricitayo ma i twok lobo ducu. En moko tam pi tira ma myero emi nining? Nen kong kit ma Lukiko Madit i kare pa Lukricitayo macon onongo moko kwede tam. Kwan Tic pa Lukwena 15:1, 2, ci wunyam lapeny magi:

• Gin ango ma okelo laro lok ki pyem i kin Lukricitayo macon?

• Paulo, Barnaba, ki dong jo mukene guyenyo kony ki bot anga?

Kwan Tic pa Lukwena 15:12-18, 23-29, ci wunyam lapeny man:

• Gin ango ma lumemba me Lukiko Madit me kare macon gutimo me nongo tira pa Lubanga ma peya gumoko tam?—Nen tyeng me 12, 15, ki 28.

Kwan Tic pa Lukwena 15:30, 31 ki 16:4, 5, ci wunyam lapeny magi:

• Lukricitayo gudok nining i tira ma gunongo ki bot Lukiko Madit?

• Jehovah ogoyo laane i komgi nining pi bedo luwiny?

Kwan 2 Temceo 3:16 ki Yakobo 1:5, ci wunyam lapeny man:

• Lukiko Madit yenyo tira ki kwene ka tye ka moko tam mo i kare-ni?

 WOT WIYE WIYE

Lukiko Madit aye “lagwok ot ma lagen dok maryek” ma Kricito ocimo. Dok miyo tira ki cam me cwiny bot Lukricitayo i wi lobo ducu.

Ngo ma ipwonyo?

• Anga ma ocimo “lagwok ot ma lagen dok maryek”?

• Lukiko Madit gwokowa nining?

• Tika iye ni Lukiko Madit aye “lagwok ot ma lagen dok maryek”?