PWONY ME 46
Pingo Omyero Idyere dok Inong Batija?
Dyere obedo lega bot Jehovah kun icikke ni ibiworo En keken dok ibiketo mitine mukwongo i kwoni. (Jabuli 40:8) I nge meno, itwero nongo batija. Ka inongo batija, inyuto ki jo mukene ni dong ityeko dyere bot Jehovah. Tam ma wamoko me dyere bot Jehovah aye obedo tam ma pire tek loyo ma watwero moko i kwowa. Man obedo tam ma pire tek adada ma biloko kwoni matwal. Gin ango ma romo tugo cwinyi me moko tam man?
1. Gin ango ma tugo cwiny ngat moni me dyere bot Jehovah?
Mar aye tugo cwinywa me dyere bot Jehovah. (1 Jon 4:10, 19) Baibul cuko cwinywa ni: ‘Mar Jehovah Lubangani ki cwinyi ducu, ki kwoni ducu, ki tammi ducu ki tekki ducu.’ (Marako 12:30) Wanyuto ni wamaro Lubanga pe ki i lokwa keken ento wa ki ticwa bene. Kit macalo laco ki dako ma gimare adada ginyomme, kit meno bene marwa pi Jehovah tugo cwinywa me dyere ki nongo batija.
2. Mot ango ma Jehovah miyo bot Lucadenne ma gunongo batija?
I nge nongo batija, ibidoko ngat acel i kin jo me ot pa Jehovah ma cwinygi yom-mi. Meno biweko inongo marre i yo mapol, dok ibinyikke cok kwede makato i kare-ni. (Kwan Malaki 3:16-18.) Medo i kom bedo ki Jehovah macalo Woru, ibibedo ki omege ki lumege i twok lobo-ni ducu ma gimaro Jehovah dok gimari bene. (Kwan Marako 10:29, 30.) Ngene kene ni, tye jami mogo ma myero itimgi wek ibed mupore me nongo batija. Mitte ni ipwony lok i kom Jehovah, imarre, dok inyut niye i kom Wode. Me agikkine, myero idyer kwoni bot Jehovah. Ka itimo jami magi ci inongo batija, ibibedo ki kare me nongo kwo ma pe tum. Lok pa Lubanga waco ni: “Gin ma . . . koni larowu en aye batija.”—1 Petero 3:21.
NONG NGEC MATUT
Nen pingo pire tek ni idyere bot Jehovah dok inong batija.
3. Wan ducu omyero wayer anga ma wabitic pire
I kare pa Luicrael macon, jo mogo gutamo ni gitwero woro Jehovah kacel ki lubanga me goba ma kilwongo ni Baal. Ento Jehovah ocwalo lanebi Elia me tiro tam mugom meno. Kwan 1 Luker 18:21, ci wunyam lapeny man:
-
Tam ma pire tek ango ma onongo mitte ni Luicrael gumoki?
Calo Luicrael, wan bene omyero wayer anga ma wabitiyo pire. Kwan Luka 16:13, ci wunyam lapeny magi:
-
Pingo pe watwero woro Jehovah kun bene waworo ngat mo nyo gin mo mukene?
-
Watwero nyuto bot Jehovah nining ni wayero me woro En keken?
4. Lwod lok i kom mar pa Jehovah piri
Jehovah ominiwa mot mabeco mapol. Gin ango ma watwero miyo bote? Tuk VIDIO.
I yo mapatpat ango ma Jehovah onyuto marre boti? Kwan Jabuli 104:14, 15 ki 1 Jon 4:9, 10, ci wunyam lapeny magi:
-
I kin mot ducu ma Jehovah omini, mene ma itye ki pwoc pire loyo?
-
Mot magi giweko iwinyo nining i kom Jehovah?
Pol kare ka wanongo mic ma wamaro adada, nongo wamito nyuto pwoc bot ngat ma omiyo. Kwan Nwoyo Cik 16:17, ci wunyam lapeny man:
-
Ka itamo i kom jami ducu ma Jehovah otimo piri, meno tugo cwinyi me miyo bote gin ango?
5. Ka idyere bot Jehovah, ibinongo mot mapol
Pol pa dano gitamo ni yweka, dog tic ma culle bup, nyo cente biweko gibedo ki yomcwiny. Tika meno lok ada? Tuk VIDIO, ci wunyam lapeny ma lubo-ni.
-
Kadi bed latuko ma i vidio-ni onongo maro tuko odilo, pingo en oweko dog tic meno woko?
-
En omoko tamme me dyero kwone, pe pi odilo, ento bot Jehovah. Tika itamo ni en omoko tam ma tye atir? Pingo?
Ma peya lakwena Paulo odoko Lakricitayo, en onongo tye ki dog tic madit adada. En onongo okwano cik pa Lujudaya i te lapwony mo ma oywek adada. Ento en ojalo meno ducu me doko Lakricitayo. Tika en okoko ange? Kwan Jo Pilipi 3:8, ci wunyam lapeny magi:
-
Pingo lakwena Paulo owaco ni jami ma ecobo i kare ma peya edoko Lakricitayo onongo tye calo “yugi”?
-
Gin ango ma en onongo?
-
Gin ango ma itamo ni biweko kwoni bedo maber loyo, tic pi Jehovah nyo timo jami mukene ki kwoni?
I kare ma Paulo odoko Lakricitayo, en onongo mot mapol ma loyo jami ma en ojalo
JO MOGO GIWACO NI: “Angeyo ni man aye ada ento pud pe atye atera me nongo batija.”
-
Pingo itamo ni tye me ryeko me dyero kwoni bot Jehovah?
WOT WIYE WIYE
Mar tugo cwinywa me dyere bot Jehovah ki nongo batija.
Ngo ma ipwonyo?
-
Pingo Jehovah opore me nongo mar kacel ki woro ma oa ki i cwinywa?
-
Mot ango ma Jehovah miyo bot Lucadenne ma gunongo batija?
-
Tika imito dyero kwoni bot Jehovah?
TIM KWED
Nen pingo lawer mo muywek ki latuko mo guyero me dyero kwogi bot Jehovah.
Lapeny pa Jo Matino—Ngo ma Abitimo ki Kwona?—Tito Gin Mutimme Con (6:54)
Nen tyen lok mukene mumiyo myero idyer kwoni bot Jehovah.
“Pingo Omyero Idyere bot Jehovah?” (Wi Lubele, Januari 15, 2010)
I vidio me wer man, nen kong yomcwiny ma jo ma gudyere bot Jehovah gibedo kwede.
I pwony ma wiye tye ni “Pi Mwaki Mapol Abedo ka Pennye Kekena ni, ‘Pingo Watye Kany?’” nen kong gin ma oweko dako mo otamo i kom gin ma pire tek loyo i kwone.
