Watimo bal, wadeno can, dok wato pien luot mukwongo, Adam ki Kawa, pe gubedo luwiny bot Lubanga. a Ento wan pe watye labongo gen mo. Jehovah ocwalo Wode, Yecu Kricito i lobo me to piwa wek kilarwa ki i bal kacel ki to. Baibul pwonyowa ni pi tone, Yecu omiyo kwone macalo ginkok. Ginkok obedo wel ma kiculo me gonyo ngat moni. Wel ma Yecu oculo aye obedo kwone ma pe ki roc mo. (Kwan Matayo 20:28.) Kit macalo Yecu onongo pe ki roc mo dok kare ducu obedo lawiny bot Jehovah, en onongo twero kwo pi naka i kare ma tye i lobo. Ento, en oyero me to piwa wek wanong jami ducu ma Adam ki Kawa gurwenyo. Yecu bene onyuto kit ma en kacel ki Jehovah gimarowa kwede. Pwony man bikonyi me dongo pwocci pi to pa Yecu Kricito.

1. Watwero nongo adwogi maber ango ki i to pa Yecu i kare-ni?

Kit macalo wabedo lubalo, watimo jami mapol ma cwero cwiny Jehovah. Ento, ka wangut ada pi balwa dok wapenyo Jehovah i nying Yecu ni otimiwa kica kun watute matek pe me nwoyo bal acel-li, watwero bedo lurem Lubanga macok. (1 Jon 2:1) Baibul tito ni: “Kricito bene yam oneno can pi bal, kicel ma otyeko lok ducu; en ngat ma kite atir oto pi jo ma kitgi pe atir, wek omi ekelwa bot Lubanga.”​—1 Petero 3:18.

2. I kare me anyim, wabinongo adwogi mabeco ango ki i to pa Yecu?

Jehovah ocwalo Yecu me miyo kwone ma pe ki roc “wek dano ducu ma ye en [Yecu] owek to, ento obed ki kwo ma pe tum.” (Jon 3:16) Pi gin ma Yecu otimo, Jehovah cokcok-ki biyubo jami maraco ducu ma obino macalo adwogi me jemo pa Adam. Man te lokke ni ka wabedo ki niye i kom ginkok pa Yecu, wabibedo ki kare me nongo kwo ma pe tum i paradic i lobo kany!​—Icaya 65:21-23.

 NONG NGEC MATUT

3. To pa Yecu gonyowa ki i bal kacel ki to

1. Adam obedo laco ma onongo pe ki roc ento pe obedo lawiny bot Lubanga, dok pi meno, dano ducu gibalo dok gito

2. Yecu obedo laco ma onongo pe ki roc ma obedo lawiny bot Lubanga dok pi meno, dano ducu gitye ki kare me kwo pi naka labongo roc mo keken

4. To pa Yecu Kricito twero kelo adwogi maber bot dano ducu

 5. Ginkok obedo mic pa Jehovah boti

Lurem Jehovah gineno ginkok macalo mic ma kimiyo pigi ki acel acel. Me labolle, kwan Jo Galatia 2:20, ci wunyam lapeny man:

• Lakwena Paulo onyuto nining ni en eneno ginkok macalo mic ma Jehovah omiyo pire?

I kare ma Adam otimo bal, kingolo kop me to i wi en kacel ki likwayone ducu. Ento Jehovah ocwalo Wode me to piri wek ibed ki kare me nongo kwo ma pe tum.

Ka iwoto ki kwano tyeng ma lubo-ni, go kong kit ma Jehovah owinyo kwede i kare ma Wode tye ka deno can. Kwan Jon 19:1-7, 16-18, ci wunyam lapeny man:

• In iwinyo nining i kom gin ma Jehovah gin ki Yecu gutimo piri?

 WOT WIYE WIYE

Pien Yecu oto, Jehovah twero timo kica pi balwa, dok watye ki gen me nongo kwo ma pe tum.

Ngo ma ipwonyo?

• Pingo Yecu oto?

• I yo ma nining ma kwo pa Yecu ma pe ki roc obedo ginkok marom aroma?

• To pa Yecu twero kelo adwogi maber boti nining?