PWONY ME 26
Pingo Jami Maraco Timme Dok Dano Deno Can?
Ka gin marac otimme, pol kare dano gipennye ni: “Pingo gin man otimme?” Watye ki yomcwiny madit adada ni Baibul miniwa lagam pi lapeny meno!
1. Catan okelo tim marac i lobo nining?
Catan Larac-ci ojemo i kom Lubanga. Catan onongo mito loyo dano, pi meno en obito dano aryo mukwongo Adam ki Kawa, me ribbe kwede i jemo i kom Lubanga. Catan otimo man ki waco lok goba bot Kawa. (Acakki 3:1-5) En oweko Kawa otamo ni Jehovah otwone gin mo maber adada. Catan oweko onen calo dano gibibedo ki yomcwiny ka pe gubedo luwiny bot Lubanga. Catan owaco lok goba mukwongo i kare ma owaco ki Kawa ni en pe bito. Pi meno, Baibul lwongo Catan ni “lagoba, doki won goba.”—Jon 8:44.
2. Gin ango ma Adam ki Kawa guyero me timone?
Jehovah omiyo jami mabeco mapol bot Adam ki Kawa. En owaccigi ni gitwero camo nyig yadi ducu ma i poto me Eden mapat ki nyig yat mo acel keken. (Acakki 2:15-17) Ento gin gumoko tamgi me camo nyig yat meno. Kawa “opwono nyige, ocamo.” Lacen, Adam bene ocamo nyig yat man. (Acakki 3:6) Gin aryo ducu gukwero bedo luwiny bot Lubanga. Kit macalo Adam ki Kawa onongo kicweyogi labongo roc mo, gin onongo pe gitye ki miti mo keken me timo jami maraco. Dong, i kare ma gukwero bedo luwiny bot Lubanga, gin guyero me timo man akaka. Pi meno, gutimo bal dok gukwero bedo i te loc pa Lubanga. Tam ma gumoko-ni okelo peko mapol adada botgi.—Acakki 3:16-19.
3. Tam ma Adam ki Kawa gumoko ogudowa nining?
I kare ma Adam ki Kawa gutimo bal, gin gudoko jo ma tye ki roc, dok gukobo bal kacel ki adwogine bot lutinogi ki likwayogi ducu. Baibul loko kit man i kom Adam: “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.”—Jo Roma 5:12.
Wadeno can pi tyen lok mapatpat. I kare mogo, wadeno can pi tam marac ma nongo wan kikomwa aye wamoko. I kare mukene, wadeno can pi tam marac ma jo mukene aye gumoko. Dok i kare mogo wadeno can pi peko ma poto atura.—Kwan Latitlok 9:11.
NONG NGEC MATUT
Nen kong pingo Lubanga aye pe tye i nge tim maraco ki deno can ma waneno i lobo i kare-ni, ki kit ma en winyo kwede ka wadeno can.
4. Anga ma omiyo wadeno can?
Pol pa dano giye ni Lubanga aye ma tye ka doro lobo-ni. Tika meno lok ada? Tuk VIDIO.
Kwan Yakobo 1:13 ki 1 Jon 5:19, ci wunyam lapeny man:
-
Tika Lubanga aye ma tye i nge deno can ki tim maraco ma i lobo i kare-ni?
5. Gin ango mutimme nicakke i kare ma Catan ocako loc?
Kwan Acakki 3:1-6, ci wunyam lapeny magi:
-
Goba ango ma Catan owaco?—Nen tyeng me 4 ki 5.
-
I yo ma nining ma Catan owaco lapiny lapiny ni Jehovah tye ka twono dano gin mo maber?
-
Ma lubbe ki Catan, tika mitte ni dano gubed i te loc pa Jehovah wek gubed ki yomcwiny?
Kwan Latitlok 8:9, ci wunyam lapeny man:
-
I kare man ma Jehovah aye pe tye ka Loyo lobo-ni, gin ango ma otimme?
-
Adam ki Kawa onongo pe gitye ki roc dok onongo gikwo i Paradic. Ento guwinyo lok pa Catan dok gujemo i kom Jehovah
-
I nge jemo meno, lobo opong ki bal, deno can, kacel ki to
-
Jehovah bijwayo bal, deno can, kacel ki to. Dano dok gibibedo labongo roc mo dok gibikwo i Paradic
6. Jehovah paro piwa ka watye ka deno can
Lubanga tika paro piwa ka watye ka deno can? Nen kong gin ma Kabaka Daudi ki lakwena Petero gucoyo. Kwan Jabuli 31:7 ki 1 Petero 5:7, ci wunyam lapeny man:
-
Iwinyo nining me ngeyo ni Jehovah neno ka watye ka deno can dok paro piwa?
7. Lubanga bijwayo pekki pa dano ducu
Kwan Icaya 65:17 ki Niyabo 21:3, 4, ci wunyam lapeny man:
-
Jehovah ocikke ni ebijwayo pekki ducu ma dano gitye ka kato ki iye kacel ki adwogi maraco ma pekki magi okelo. Pingo cikkene meno kweyo cwinyi?
Tika onongo ingeyo?
I kare ma Catan owaco goba mukwongo, en obalo nying Jehovah. Meno tyen lokke ni, en oweko dano gutamo jami maraco i kom Jehovah i kare ma en owaco ni Jehovah pe obedo Laloc maber dok ma lamar. I kare ma Jehovah bikwanyo pekki pa dano ducu i anyim, en biyubo nyinge odoco. Nyo me ketone i yo mukene, en binyuto ni yo me locce aye ber loyo ducu. Lok madok i kom lonyo nying Jehovah obedo lok ma pire tek loyo i polo ki i lobo.—Matayo 6:9, 10.
JO MOGO GIWACO IN: “Deno can obedo but yub pa Lubanga piwa.”
-
In kono iwaco ningo?
WOT WIYE WIYE
Catan Larac-ci ki dano aryo mukwongo aye guweko tim maraco ocakke i lobo. Jehovah paro piwa adada ka watye ka deno can, dok macok cok-ki en bijwayo tim maraco ki deno can woko.
Ngo ma ipwonyo?
-
Goba ango ma Catan Larac-ci owaco ki Kawa?
-
I yo ma nining ma jemo pa Adam ki Kawa ogudo wan ducu?
-
Wangeyo nining ni Jehovah paro piwa ka watye ka deno can?
TIM KWED
Nen kong kit ma Baibul tito kwede gin ma bal obedo.
Med ngecci i kom pyem ma Catan Larac-ci okelo i poto me Eden.
“Pingo Lubanga Oye ni Dano Guden Can?” (Wi Lubele, Januari 1, 2014)
Nen kong lagam ma Baibul miyo ma kweyo cwiny dano pi lapeny mo matek adada.
“Pingo Pati me Nazi Oneko Lujudaya? Pingo Lubanga pe Ojuko Tim Man?” (Pwony ma tye i jw.org)
Nen kong gin ma laco mo opwonyo i kom deno can ma onongo en neno i kabedo ma orume.
