Latin Yat ma Lyel Mac
Ododo 30
Latin Yat ma Lyel Mac
MOSES onongo owoto wa i wi got Koreb ka yenyo lum pi romine. En oneno latin yat mo ka tye ka lyel mac, ento onongo pe tye ka wang!
Moses otamo ni: ‘Gin man dok pat ba. Abicito cok wek kong anen maber.’ I kare ma en onyiko cok, dwan mo oa ki i latin yat-ti, ma waco ni: ‘Pe ibin cok makato kenyo. Luny war woko ki i tyeni, pien icung i ngom maleng.’ Lubanga aye onongo tye ka lok kun tiyo ki lamalaika, pi meno Moses oumo wange woko.
Lubanga owaco ni: ‘Atyeko neno deno can pa jona ma i Ejipt. Pi meno an abigonyogi woko, dok in aye ngat ma abicwalo me telogi me a woko ki i Ejipt.’ Jehovah onongo obikelo jone i lobo Kanaan maber tutwal-li.
Ento Moses owaco ni: ‘An pe a ngatti mo. Atwero timo man nining? Ket kong ni acito gire. Luicrael gibiwacca ni: “Anga ma oori?” Ci dong abiwaco ango?’
Lubanga agamo ni: ‘Man aye gin ma ibiwaco, “Jehovah Lubanga pa Abraim, Lubanga pa Icaka ki Lubanga pa Yakobo aye ocwala botwu.” ’ Jehovah dok omedo ni: ‘Man aye nyinga matwal.’
Moses odok iye ni: ‘Ento ka ce awacigi ni in aye iora, ci ka gin pe guye lokka kono.’
Lubanga openye ni: ‘Meno gin ango ma i cingi-ni?’
Moses ogamo ni: ‘Odoo.’
Lubanga owaco ni: ‘Bol piny i ngom.’ Ka Moses obolo, odoo-ni odoko twol. Jehovah pud dok onyuto tango mukene bot Moses. En owaco ni: ‘Rwak cingi i bongoni.’ Moses orwako, ento ka owoto cinge woko, onongo tar calo pee! Cinge onongo nen calo two marac ma kilwongo ni dobo omako. I nge meno Jehovah omiyo Moses teko me timo tango me adek. Me agikki en owacce ni: ‘Ka itimo tango magi Luicrael gibiye ni aori.’
I nge meno Moses odok paco ci owaco ki Yecero ni: ‘Tim ber iwek adok bot wadina i Ejipt me neno kit ma gitye kwede.’ Pi meno Yecero ociko Moses, ci Moses ocako wotte me dok cen Ejipt.
