Ododo 43

Yocwa Odoko Latela

MOSES mito cito Kanaan kacel ki Luicrael. Pi meno en openyo ni: ‘Jehovah, wek angol Kulu Jordan, ci anen lobo maber-ri.’ Ento Jehovah owaco ni: ‘Dong oromo! Pe dok inwo lok meno!’ In ingeyo pingo Jehovah owaco meno?

Pi gin mutimme i kare ma Moses ogoyo pata got ca. Wi myero opo ni, en gin ki Aron pe guketo deyo i kom Jehovah. Gin pe guwaco bot lwak ni Jehovah aye onongo tye ka kelo pii ki i pata got ca. Pi tyen lok man Jehovah owaco ni en pe ebiye gidonyo i Kanaan.

Pi meno dwe manok keken i nge to pa Aron, Jehovah owaco bot Moses ni: ‘Kwany Yocwa, ci iwek ocung i nyim lalam dog Eleajar ki i nyim lwak. Ki kunnu i nyim lwak ducu, tit bot jo ducu ni Yocwa aye latela manyen.’ Moses otimo kit macalo Jehovah owaco kwede, kit ma ineno kwede i cal-li.

Ci Jehovah owaco bot Yocwa ni: ‘Bed ma cwinyi tek, dok pe ilwor. Ibitelo Luicrael me donyo i lobo Kanaan ma acikke pire botgi-ni, dok an abibedo kwedi.’

Lacen Jehovah owaco bot Moses me ito malo i wi Got Nebo ma tye i lobo Moab. Ki malo kunnu Moses twero neno loka Kulu Jordan ci oneno lobo Kanaan maber tutwal-li. Jehovah owaco ni: ‘Man aye lobo ma akwongnge me miyo bot lutino pa Abraim, Icaka ki Yakobo. Amiyo ineno gire, ento pe abiye ni idony iye.’

Moses oto i wi Got Nebo kunnu. Mwaka me ditte onongo dong tye 120. En onongo pud tek, dok wange bene onongo pud neno piny maber. Lwak cwinygi oton dok gukok pi to pa Moses. Ento cwinygi obedo yom pien Yocwa aye latelagi manyen.

Wel 27:12-23; Nwoyo Cik 3:23-29; 31:1-8, 14-23; 32:45-52; 34:1-12.