Ododo 50

Mon Aryo ma Cwinygi Tego

KA LUICRAEL gupoto i peko, gin gikok bot Jehovah. Jehovah winyo kokogi ci cwalo co ma cwinygi tego me konyogi. Baibul lwongo lutela magi ni lungolkop. Yocwa aye obedo langolkop mukwongo, dok lungolkop mogo ma gulubo ngeye aye nyinggi Otiniel, Ekud ki Camgar. Ento jo ma gukonyo Icrael bene obedo mon aryo ma nyinggi Debora ki Yayeri.

Debora obedo lanebi ma dako. Jehovah miye lok i kom gin ma tye anyim, ci en tito bot lwak gin ma Jehovah waco. Debora bene obedo langolkop. En bedo i te yat otit mo i lobo godi, ci dano gibino me nongo kony ki bote pi pekogi.

I kare man Jabin aye onongo kabaka me Kanaan. En onongo tye ki gadigadi lweny 900. Lumonnye onongo gitek tutwal ma omiyo Luicrael mapol kidiyogi me doko lutic pa Jabin. Lawimony pa Kabaka Jabin onongo nyinge Cicera.

I nino mo acel Debora olwongo Langolkop Barak, ci owacce ni: ‘Jehovah owaco ni: “Kwany co 10,000 dok i telgi i tergi i wi Got Tabor. Abikelo Cicera boti kunnu. Abimiyo en ki lumonnye ducu i cingi.” ’

Barak owaco ki Debora ni: ‘Abicito ka in bene ibicito kweda.’ Debora owoto, ento owaco bot Barak ni: ‘Pe ibinongo deyo me loyo lweny man, pien Jehovah obimiyo Cicera i cing dako.’ Dok man aye gin ma otimme.

Barak olor piny ki i wi Got Tabor me rwatte ki lumony pa Cicera. Jehovah otugi kelo pii aluka woko atura, ci pol lumony pa aduyi-ni gumwony woko. Ento Cicera opye piny ki i wi gadigadine ci oringo woko.

I nge kare manok Cicera obino i kema pa Yayeri. En ojolle, ci omiye cak mo. Man okelo nino i wange, ci cutcut en onino woko. Ci Yayeri okwanyo yat lagur kema ci oguro i wi laco man marac-ci. Lacen, ka Barak obino, en onyuto bote Cicera ma dong oto woko! Pi meno in dong itwero neno ni gin ma Debora owaco ocobbe kakare.

I ngeye lacen, Jabin bene kineko woko, ci Luicrael gubedo dok ki kuc pi kare mo.

Lungolkop 2:14-22; 4:1-24; 5:1-31.