Lugibeon Mayrek
Ododo 48
Lugibeon Mayrek
POL boma me Kanaan kombeddi dong guyubbe woko me lweny ki Icrael. Gitamo ni gitwero loyo. Ento jo me boma me Gibeon ma tye cok-ki pe gitamo kumeno. Gitamo ni Lubanga tye ka konyo Luicrael, dok pe gimito lweny ki Lubanga. Pi meno ingeyo gin ma Lugibeon gutimo?
Gumoko tamgi me timme wek onen ni gikwo ka mabor adada. Pi meno co mogo guruko bongo muti muyec-oyec ki war cilipa ma otum obale woko. Gutingo lupuku muti muyec-oyec i wi kanagi, dok gukwanyo mugati mogo muri mutwo woko. Ci gucito bot Yocwa guwaco ni: ‘Wan wa a ki i lobo mabor tutwal, pien wawinyo pi Jehovah, Lubangawu muywek-ki. Wawinyo jami ducu ma en otimo piwu i Ejipt. Pi meno lutelwa guwaciwa ni wayub cam mo me wot dok me bino me waco botwu ni: “Wan luticwu. Wukwonge ni pe wubilweny i komwa.” Wun wutwero neno ni bongowa oyec woko pi wot mabor ki ni mugatiwa dong ori dok otwo woko.’
Yocwa ki lutela mukene-ni guye lok pa Lugibeon. Pi meno gukwongnge pe me lweny i komgi. Ento lacen i nge nino adek gungeyo woko ni Lugibeon kara gitye ka kwo cok kenyo.
Yocwa openyogi ni: ‘Pingo wuwaciwa ni wua ki i lobo mabor?’
Lugibeon gugamo ni: ‘Watimo meno pien wawinyo ni Lubangawu Jehovah ocikke me miyowu lobo me Kanaan ducu. Pi meno wabedo ki lworo ni wubinekowa woko.’ Ento Luicrael gugwoko kwongngegi, ci pe guneko Lugibeon. Ma ka nekogi gulokogi gudoko luticgi.
Kiniga omako kabaka me Jerucalem pien Lugibeon gumako lurem ki Luicrael. Pi meno en owaco bot kabaka angwen mukene ni: ‘Wubin wukonya me lweny ki Gibeon.’ Dok meno aye gin ma kabaka abic magi gutimo. Lugibeon mono gutimo gin me ryeko i mako larem ki Icrael, ma dong omiyo kabaka magi bino me lweny i komgi-ni? Wabineno.
