Ododo 60

Abigail gin ki Daudi

IN INGEYO dako ma nen ma mwonya tutwal ma tye ka bino me rwatte ki Daudi-ni? En nyinge Abigail. En tye ki niang matut, dok en ojuko Daudi ki i timo gin marac. Ento ma peya wakwano lok meno, wanenu kong gin ma obedo ka timme i kom Daudi.

Ma Daudi dong oringo woko ki bot Caulo, en okanne i boro. Omegine ki jo me ode ducu guwoto bote kunnu. Jo ducu ma gubino bote cokcok romo 400, ci Daudi odoko latelgi. I ngeye Daudi dong ocito bot kabaka me Moab ci owaco ni: ‘Tim ber wek wora ki maa gubed boti nio wang ma angeyo gin ma bitimme i koma.’ Lacen Daudi ki jone gucako kanne i godi.

I nge man aye dong Daudi orwatte ki Abigail. Cware Nabal obedo won ngom ma lalonyo. En onongo tye ki romi 3,000 ki dyegi 1,000. Nabal obedo laco ma ger dok ma wany. Ento dakone Abigail onongo nen mamwonya mada. En bene onongo ngeyo kit me timo gin ma tye atir. I kare mo en bene olaro jo me ode. Wanenu kong kit ma otimme kwede.

Daudi ki jone gubedo ka timo ber bot Nabal. Gin gukonyo me gwoko romine. Pi meno i nino mo Daudi ocwalo jone bot Nabal pi penyo kony mo. Jo pa Daudi gubino i kare ma Nabal ki jo ma konye onongo gitye ka ngolo yer ki i kom romi. Man obedo nino me karama, dok Nabal onongo tye ki jami mapol mabeco me acama. Pi meno man aye gin ma jo pa Daudi guwaco: ‘Wan watimo ber botwu. Pe wakwalo romoni mo, ento wakonyo gwokogi aye. Kombeddi, tim ber, miniwa cam mo.’

Nabal owaco ni: ‘Pe atwero miyo camma bot jo macalo wun-ni. En oloko i yo me cac adada, dok oloko jami maraco i kom Daudi. I kare ma jo-ni gudok ci gutito lokke bot Daudi, kiniga omako Daudi tutwal. En owaco ki jone ni: ‘Kwanyu pala lucwanwu!’ Ci gucako wot me cito ka neko Nabal ki jone.

Dano pa Nabal mo acel, ma owinyo lok maraco ma Nabal oloko, otito bot Abigail gin mutimme. Cutcut Abigail otugi yubo cam mo. En oketo i wi kana mogo ci ocako wotte. I kare ma en orwatte ki Daudi, en olor ki i wi kanane, ogungo piny ci owaco ni: ‘Tim ber, ladit, pe iket cwinyi i kom cwara Nabal. En laming, dok en timo jami me mingo. Mot mo en. Tim ber igam, ci itimwa kica pi gin mutimme-ni.’

Daudi ogamo ni: ‘In idako maryek. Ijuka woko ki i neko Nabal me culo pi racce. Dok dong paco ki kuc.’ Lacen, ka Nabal oto, Abigail odoko ngat acel ki kin mon pa Daudi.

1 Camuel 22:1-4; 25:1-43.