Aco Ma Cwinye Tek
Ododo 7
Aco Ma Cwinye Tek
IKARE ma wel dano ocako medde i wi lobo, polgi gutimo jami maraco calo Kain. Ento laco acel onongo kite dok pat. En aye laco eni, kilwonge ni Enoka. Enoka obedo laco ma cwinye tek. Dano ma i ngete ducu onongo gitimo jami maraco adada, ento Enoka gire omedde ki tic pi Lubanga.
In ingeyo pingo jo me kare meno gutimo jami maraco mapol tutwal? Tam kong, anga ma omiyo Adam gin ki Kawa gukwero winyo Lubanga, dok ma omiyo gucamo nyig yat ma Lubanga owaco ni myero pe gucam? Ada, man nongo obedo lamalaika marac. Baibul lwongo en ni Catan. Dok en tye ka temme wek dano ducu gutim gin marac.
Nino mo acel Lubanga Jehovah oweko Enoka owaco bot dano gin mo ma onongo pe gimito winyone. Lokke onongo ene: ‘I nino mo Lubanga bityeko jo maraco woko ducu.’ Dano myero obed igi owang tutwal me winyo lok man. Myero obed gin bene gutemo neko Enoka. Pi meno onongo mitte ni Enoka obed ki tek cwiny tutwal me waco bot dano gin ma Lubanga obitimo.
Lubanga pe oweko Enoka obedo kwo pi kare malac i kin jo maraco-ni. Enoka okwo pi mwaka 365 keken. Pingo wa wacci “mwaka 365 keken”? Pien dano i kare meno onongo gitek loyo me kare-ni dok gikwo pi kare malac makato. Ada, Metucela wod pa Enoka okwo pi mwaka 969 kulo!
I nge to pa Enoka, rac pa dano omedde ameda. Baibul waco ni ‘tam ducu ma cwinygi lwodo kare ducu kemo bal keken,’ dok ni ‘lobo onongo dong opong ki bwami.’
In ingeyo tyen lok acel ma omiyo ayelayela onongo dwong tutwal i lobo i kare meno? Pien Catan onongo tye ki yo manyen me tero dano i timo jami maraco. Meno aye gin ma wabipwonyo ma lubo man.
Acakki 5:21-24, 27; 6:5; Jo Ibru 11:5; Juda 14, 15.
